Rgop nau mpeh nau ntrŭnh đah Uỷ ban Rnâng kan Quốc hội ndrel rmôt kan ntoh Kruanh Uỷ ban Trung ương MTTQ (ntơ lah 525) mpeh nau mâp cử tri bah ăp ntoh măt Quốc hội, ăp ntoh măt nchŏng kloh “ntoh măt hăn mâp cử tri yơn knŭng gŭ djăt”. Kruanh Rnâng kan mêt uănh nau kan ƀon lan ƀư tơm Dương Thanh Bình mbơh, bah 10 năm ƀư nau ntrŭnh mrô 525, âk ntoh măt Quốc hội nchrăp, ngăn ƀư nau mâp cử tri đah âk nau kan êng êng, rgum, mĭn ndrel njoăl âk nau đă bah cử tri tât ăp ntŭk kan geh nau dơi rklaih. Yơn lah, Groi Kruanh Quốc hội Trần Quang Phương lah kloh nau kan ân geh nkra mpeh nkô̆ nau, kŏ kơt lah mâp cử tri, ngăn lah nau kan “ntoh măt hăn mâp cử tri yơn knŭng gŭ djăt”:

 ‘Mâp cử  tri rnôk aơ mhe knŭng lah “ntoh măt cử tri” kơt lah cử tri lah geh đă tă bah cán bộ, công chức ăp gưl, ăp ntŭk kan bah xã, du đê̆ nŭih cán bộ ƀư nau kan ơm bah cách mạng, nŭih rlu ranh geh bu rnơm hôm ăp nŭih ri mô lăng âk, yơn lah nŭih ân geh râng ri âk. Nau kan geh âk ntrong gay ƀư: tâm mâp ƀa ƀơ, mâp tĭng nkô̆ nau, mâp đah trực tuyến, đah nau rƀŭn sŏng...ri ân geh rgâl mhe. Nau kan rgum ân tâm di nau đă bah cử tri, rklaih ndrel ơh nau đă ndrel uănh nau kan rklaih nau nê”. Hôm Groi Kruanh Quốc hội Nguyễn Khắc Định ri mbơh nau êng:

  ‘Geh n’gor hăn tĭng ntoh măt tât rmôt săch kan ndrel hăn tât mro lôch năm kan. Ndri, 3 ntoh măt geh ân geh săch tâm 3 nkuăl lah mro mrăng tâm ndơn rgâl bah 3 nkuăl nê. Du ntoh măt dâk mbơh nkoch nau, du hê ƀư nau kan tâm ntŭk dêh lơn, geh rnôk knŭng gŭ ân tât lôch. Hôm ntoh măt geh nau kan prêh ngăn ri dâk djăt, mbơh nau. Ndri ma, geh ăp ntoh măt hăn mâp cử tri yơn knŭng hăn djăt, nê lah nau ngăn”.

Ăp ntoh măt đă ăp nkuăl geh âk nŭih ntoh măt Quốc hội ri ân geh pă jêng âk rmôt gay tâm mâp ma cử tri âk tŏ lơn. Nkre lah tâm rnôk mâp ân geh rgum tâm nau kan kơt nau rêh, nau kan, neh ntu...Ăp nau kan geh nau dơi bah nkual, khuch ngăn tât nau geh dơi bah cử tri. Ndri ma, âk nŭih ân geh rđau kan bah nkuăl mâp cử tri gay ma djăt, nau kan geh tât nau dơi.

Tâm rnôk rƀŭn, Kruanh Quốc hội Vương Đình Huệ lah rjăp: Ntoh măt Quốc hội lah nŭih ntoh măt ân nau ŭch bah ƀon lan tâm ntŭk săch nơm ndrel bah ƀon lan lam dak, ndơn nau kan bah năp cử tri ndrel Quốc hội. Ri ma, nau kan mâp cử tri mô knŭng lah ntŭk săch ma hôm lah ntŭk kan:

‘Tâm nau dơi bah ntoh măt Quốc hội kŏ nkoch lah ntoh măt ân geh tâm mâp ma ƀon lan, djăt nau bah ƀon lan geh ƀon lan rnơm. Luật ƀư nau kan Quốc hội rgâl năm 2020, geh mbơh: Ntoh măt Quốc hội ân geh mâp cử tri gay ma gĭt nau mĭn ŭch bah cử tri. Ntoh măt Quốc hội lah mâp cử tri tĭng nau mâp cử tri bah rmôt kan ntoh măt Quốc hội lah du ntil. Ntil tal 2 lah mâp cử tri ta ntŭk gŭ ndrel ntŭk pah kan. Nau ntrŭnh tât aơ kŏ ân geh nkoch kloh nau aơ, mhâm nau kan jêh ri mbơh kloh”.

Uỷ ban Rnâng kan Quốc hội tâm ban nau nkra, ntop nau ntrŭnh mrô 525 ba, leo lăp bôk nau kan ndâk nau ntrŭnh bah Uỷ ban Rnâng kan Quốc hội, jao ân Ban Dân nguyên ƀư tơm tâm rgop ma ntŭk kan geh tât ndâk nau ntrŭnh tĭng tâm di nau ntrŭnh bah pháp luật.

Kŏ tâm nar rƀŭn aơ, Uỷ ban Rnâng kan Quốc hội uănh nau mbơh nau kan bah ăp nŭih kan ntoh măt Quốc jhội khay 5 ndrel khay 6 mhe rlau. Kruanh uỷ ban Tư pháp Lê Thị Nga mbơh nau ngăn me mbŏ kon se dăp hàng lôch măng gay ndŏ săm ƀŭt ân kon lăp jrâu 10, nê lah du nau jâk đah kon se nti:

‘Nau jâk bah kon se lăp tâm jrâu 10 ta Hà Nội, nkuăl ƀon têh Hồ Chí Minh lah nau kan tâm âk năm. Lăp tâm jrâu 10 rnôk aơ lah nau jêr rlau ma lăp nti Đại học. Ndri gĭt nơm mô tŏng ngăn ngih săm ƀŭt ntĭm nti gưl 3 đŏng lah mô ndrel nau ngân aơ mhâm ƀư gay ma rklaih? Chính phủ hŏ đă N’gâng kan ntĭm nti mbơh ri hên đă ân geh leo nau aơ tâm nau mbơh mpeh nau kan bah rnâng kan mât nau kơl an ƀon lan”./.