Hun hao tâm mbluh nthoi “nkual” lah trong nchrăp rloh rlău, sŏng di bah Đảng n’hanh Ngih dak he gay mât dŏng, ntik uĕh săk geh, dơh soih bah ăp “nkual” n’hanh ăp n’gor tâm lam dak gay hun hao wăng sa- rêh jêng kon nuĭh, đăp mpăn njrăng n’gang neh dak, rnă njrăng n’hanh n’hao săk geh nău rêh, nuih n’hâm bah nuĭh ƀon lan. Nghị quyết Đại hội Đảng XIII hŏ ntrŏng: hun hao ăp kôp n’hanh njêng luh trong tâm mbluh nthoi nkual, ăp “nkual”; nkre, rƀŏng hun hao ăp “nkual” tĭng trong rƀŏng “mât dŏng  uĕh lơn n’hanh hun hao dŭt uĕh ăp dơh geh bah ăp “nkual” mpeh  mbluh nthoi ntung trong, bri dak neh ntu ơm geh êng, ntŭk wăng sa- chính trị, tơm nuĭh kan n’hanh n’hao dăng tâm mbluh nthoi “nkual nơm” n’hanh “mbluh nthoi bah dih nkual”gay râng tâm ăp rêng rnoh khlay lam ntŭr neh, njêng ntŭk hun hao mhe... 

Gay tâm mbluh nthoi nkual ri ndơ lor bôk năp ân geh lah ndơ dŏng n’hanh tâm mbluh nthoi ntung trong. Tĭng wa Trần Văn Hảo - Giám đốc Sở Công Thương n’gor Hải Dương, tâm ăp ndơ dŏng tơm khlay ri ntung trong dơh soih, mbluh aih đah ăp n’gor lah ntŭk nsing gay mbluh nthoi nkual n’hanh tâm rlong nkual n’hanh  tâm ntêng lêng nkual tâm ban kơt njêng luh ăp ndơ dŏng khlay êng ƀa ƀă:

       Dăn đă ăp Bộ, n’gâng kan Trung ương, UBND ăp n’gor, nkual ƀon têh ơm rgum ntrŭt ntrôl ngăch rdâk njêng ăp trong nthoi nkual ăp kôp đah ăp n’gor, nkual ƀon têh tâm nkual gay n’hao dăng mbluh nthoi nkual, ntrŭt ntrôl jêng hun hao ăp trong nduar công nghiệp, ăp rkŭm công nghiệp tâm rgop n’gâng kan n’hanh nkrum wăr công nghiệp, rhŏ dŏng; ŭanh khlay ntuh kơl rdâk njêng mhe mô lah pơk hvi ăp ntŭk rgum Logictics têh ta Hải Phòng, Quảng Ninh, Hà Nội, Hải Dương n’hanh ăp n’gor săk geh gay rdâk njêng ăp ntŭk rgum Logictics nđơn rdeng tay, gay hun hao n’hanh ntik uĕh săk geh nău dơi tâm dâl tăch rgâl, tâm ntop kơl nsum, geh nău tam hŭch bah ir roh huach prăk dŏng kan an ăp doanh nghiệp n’hao nău dơi tâm rlong njêng suan ntrôl an hun hao tâm lĕ ma nkual…

        Ntơm nău ngăn geh bah Nkual Đồng bằng sông Hồng – ntŭk khlay mha êng mpeh chính trị, wăng sa, văn hoá, njrăng n’gang neh dak , rnă njrăng n’hanh tâm boh dak bah dih bah neh dak. Đah găr ntil lah Thủ đô Hà Nội – lah 1 tâm 2 “bôk leo tơm” wăng sa, suan ntrôl hun hao bôk năp lam dak, tâm bah ri aơ, nơm geh nău tâm mbluh nthoi, tâm boh, tâm rsong tăch rgâl ma du đêt n’gor tâm Nkual ĐBSH hŏ geh nău hun hao đăt ndal mpeh ntung trong, logistics… Bol kơt nê̆, tĭng wa Lê Việt Nga – Groi Vụ trưởng Vụ Thị trường tâm dak, Bộ Công Thương hôm geh dŭt âk nău ma n’gâng kan ăp n’gor tâm nkual ân tâm rgop nsum tâm nău an tĭng ƀư mhe mbra rgâl muh măt n’gâng kan tăch rgâl bah nkual n’hanh lam dak:

Geh ăp trong kan ma mpôl hên saơ lah geh nău tâm mbluh nthoi nkual ri hôm mô hŏ ndăn dŏng lĕ. Ntĭt kơt đah dăp rgum mpeh ntŭk rgum Logistics ri nkual đồng bằng sông Hồng dŭt geh rong dơh rnôk ma Thủ tướng Chính phủ hŏ uănh an dŏng ta Quyết định mbrô 1012 năm 2015 an nkual đồng bằng sông Hồng geh êng du ntŭk rgum Logistic gưl 1 gŭ ta nkual bah lơ Hà Nội; ntŭk rgum Logistic gưl 2 gŭ ta bah dâng Hà Nội; n’hanh tât năm 2030 hôm geh lĕ ma ăp ntŭk rgum Logistic geh rnoh hvi tât 50 hecta dơi nthoi đah ăp ndrâm nsrŭng – bah ndrâm ndeh păr tât ăp ndrâm dak lêng tâm nkual, yơn an tât aƀaơ he  nha mô hŏ geh. Kơt nê̆ ri pah kan wăch rgum ntuh kơl tâm trong dja dŭt ŭch geh nău ndrel hăn tâm mbluh nthoi bah ăp n’gor nsum…)

          Ndrel tâm ban đah nău mĭn dja, wa Trần Thị Phương Lan – nuĭh dơi manh ƀư Giám đốc Sở Công Thương nkual ƀon têh Hà Nội lah rjăp n’hanh nău khlay kan bah Bộ Công Thương tâm nău hun hao ndơ dŏng logistics tâm mbluh nthoi nkual n’hanh tâm rgop nkual:

Tĭng gâp mĭn ri âk n’gor tâm nkual geh ndơ ma hun hao logistics tâm trong ndeh, trong mpăr, trong dak lêng, trong dak me… jêng gâp dŭt ŭch lah tâm trong kan dja ri Bộ Công Thương mbra dâk ƀư tơm gay rƀŏng trong, têk ndrêng leo ăp n’gor, n’hanh he nchŏng kloh ăp ntŭk gay hun hao an păng bah tâm chong cheng, n’hanh ntĭk geh nău tam, mât dŏng dơi ăp njăr trong ma he dơh geh tâm  nkual…)

        Nău ntrôl dăng tâm mbluh nthoi, tâm boh đah ăp n’gor tâm nkual gay rdâk njêng ăp ntŭk ntô ndơ dŏng khlay kơt ntung trong, nchuăn rdeng, logistics, lam trong kan tăch rgâl… mbra njêng nău dơh soih an nchuăn rdeng, tâm pă tăch ndơ. Wa Triệu Đăng Khoa - Giám đốc HTX Trạm bạc Đồng Xâm (mpeh Hiệp hội ƀon hăr blău ti kan Trạm bạc Đồng Xâm, nkuâl Kiến Xương, n’gor Thái Bình) an lah:

Rnôk njêng dơi nău tâm mbluh nthoi ri dơh an ndơ geh ƀư bah ƀon hăr blău ti kan Trạm bạc Đồng Xâm đŏng yor ăp nuĭh dơi gĭt tât, hôm lĕ rngôch ăp nău tâm rsong tăch rgâl lam hvi ri ăp ndơ geh ƀư Trạm bạc Đồng Xâm nklăp mbra dơi ring lam hvi lơn…)

        Tĭng nuĭh rnâng kan wăng sa, PGS. TS Trần Đình Thiên, lôch hŏ geh ăp ntŭk ntô ndơ dŏng ntung trong tâm mbluh nthoi, gay geh nău tâm ntêng lêng ngăn ri  ân geh nău tâm boh bah ăp doanh nghiệp ta ăp n’gor tâm nkual n’hanh tâm mbluh nthoi nkual:

Nău lor bôk năp tâm mbluh nthoi nkual lah ân ƀư jêng tât geh tâm n’guăk ƀư njêng, mhâm ƀư ma ăp đơn vị, ăp n’gor mbra dơi tâm mbluh nthoi nsum. Nău lor bôk năp lah nău ŭanh têh jong tâm dăp rgum đah nkual lah ân njêng luh ăp rkŭm hun hao n’gâng kan, n’hanh kơt nê ri mơ dơi tâm mbluh nthoi. Tâm n’guăk êng wăng sa ăp doanh nghiệp ân ntuh kơl tâm nê lah ân tâm rgop kan nsum. Tâl bar lah mpeh nău way trong  nchâp đă tĭng kan, ri ăp nău năl tâm bah ri  aơ lah he geh nkual ri păng lah nkual neh tâm ƀah  ngai dơm, hôm lah nkual gay tâm boh hun hao lah mpeh nău way nchâp đă trong tĭng ƀư he mô hŏ geh. Ân geh ăp trong nchrăp kan tâm mbluh nthoi nkual ân đăp mpăn lah ăp ntŭk nchrăp kan nê  lah păng nkre tâm mbluh nthoi nkual nsum gay mô geh kol khan....lah aƀaơ đah 2 n’gor geh rnôk tâm ƀah nsum du mblâm gạch ma mô dơi tâm mbluh nthoi nsum.

 Nău dŭt khlay nê lah rdâk njêng, ƀư lôch jêh trong nchâp đă tĭng leo ƀư n’hanh mô rlu rgâl dơh uĕh ntŭk ntuh kơl bah tĭng n’gor an tât nkual n’hanh tâm mbluh nthoi nkual, bah nê mơ nta trong dơh gay wăch rgum ntuh kơl hun hao tâm buăt nthoi ntung trong tâm mbluh nthoi nkual têh dăng mhe n’hanh dơh ntơ kơt nău bah wa Nguyễn Thị Bích Ngọc Thứ trưởng Bộ Kế hoạch - Đầu tư:

Chính phủ ăp năm hŏ n’gluh an dŏng Nghị quyết bah Chính phủ mpeh rgâl uĕh ntŭk ntuh kơl tăch rgâl. Jêng, mpôl hên dăn đă ăp n’gor tâm nkual ân rgum an ƀư du trong geh nău tam ăp Nghị quyết dja gay rgâl dơh glêh siƀŭt, nta ăp trong dơh gay hun hao wăch rgum ntuh kơl tâm hun hao ntŭk ntô ndơ dŏng. Ăp n’gor tâm nkual ri ân lor nchrăp tâm mbluh nthoi, way ƀư ăp rơh  tâm  nchră ntrŭt ntrôl ngăch ntuh kơl tĭng nkual n’hanh rdâk njêng, n’gluh an dŏng ăp trong nchrăp wăch rgum ntuh kơl tĭng trong ƀư PPP lvang năm 2021-2030 nkre đah ăp trong nchâp đă tĭng ƀư, trong kơl dơh gay wăch rgum ntuh kơl, bah nê kơl doanh nghiệp gĭt wât kloh lơn n’hanh njêng nău nsing nơm rnôk râng ntuh kơl hun hao buăt nthoi ndơ dŏng ntung trong..)../.