Lăp nău ntĭm nti bah Wa, âk đảng viên ta Dak Lak way mât nuih n'hâm uĕh, lah nuĭh  leo lor trong chrat ang an rơh kơn bah kơi kơt tĭng. Nău nchih "Ăp găr mblar chrêk" bah phóng viên Hương Lý, way gŭ kan ta Tây Nguyên nkoch mpeh ăp nuĭh ntoh lư dja.

 Wa Phan Thế Dĩnh ta xã Ea Tóh, nkuâl Krông Năng năm aơ hŏ 102 năm deh n'hanh 79 năm năm Đảng, lah đảng viên geh năm Đảng dŭt âk bah Đảng bộ n'gor Dak Lak. Tâm du bông râng kan cách mạng, bol ta ah ntŭk, dơn nău  kan, ntŭk gŭ pah kan, păng way mâp nuih n'hâm uĕh cách mạng đŏng, mpư n'hao nuih n'hâm tâm rnglăp tâm mpôl kan Đảng tâm ban kơt ăp nău tâm boh lam rêh jêng kon nuĭh. Păng hôm lah nuĭh leo lor trong chrat ang, tĭng sŏng, trong gŭ rêh dêh bên, âk nuih n'hâm tâm rŏng, dơi ƀon lan uănh khlay, rhơn răm. Tât aƀaơ, bol năm hŏ ranh săk hŏ djôr Phan Thế Dĩnh hôm nkah kloh rvah, way djăt radio gay rƀah gĭt nău lư ăp nar đŏng. Păng n'hao êng săk mpeh nău hun hao bah neh dak nar aơ. N'hao êng săk mpeh nuĭh cộng sản tĭng sŏng kơt păng way mât nău nsing nơm đah Đảng cộng sản Việt Nam, wa Phan Thế Dĩnh lah:

          "Dŭt khlay bah mpôl kan đảng lah way mât gay kon nuĭh nê jêng nuĭh ntĭt leo lor an nsum mpôl ƀon lan, an ăp nuĭh kơt tĭng. Lah trong ntĭt leo nê mô kloh rvah ri khuch ngăn tât Đảng. jêng kơt nê ma nuĭh đảng viên way tâm ôp tâm rgâl gay jêng nuĭh đảng viên ntĭt leo lor ngăn, jêng đảng dŭt uănh khlay tât nkô̆ nău dja".

          Đah jŏ rêh rlău du rach năm n'hanh âk mbâl nău kan cách mạng, wa Phan Thế Dĩnh lah nuĭh leo lor trong chrat ang an ăp đảng viên mom ta ntŭk, lah suan ntrôl gay kon său n'hanh ăp rơh druh ndăm kơt nti ngăn, an lĕ n'hâm suan nău gĭt blău ma neh dak. Wa Hồ Văn Thái, Bí thư Đảng ủy xã Ea Tóh, nkuâl Krông Năng, n'gor Dak Lak an gĭt:

          "Wa Phan Thế Dĩnh lah đảng viên gŭ ta ntŭk ntơm bah rnôk nar ntơm njêng xã. N'hanh lah nuĭh ntĭt leo lor bah ăp băl tâm ăp nău kan dŭt ryôt ryăt, n'hanh nău mĭn Cộng sản bah păng dŭt uĕh. Aơ lah nău n'hao êng săk bah n'gâng kan ta ntŭk, n'gâng kan uănh aơ lah nuĭh ntĭt leo lor gay ntĭm nti rơh kơn mom ndăm mpeh nău mĭn di cách mạng n'hanh nău dơn kan bah đảng viên đah nuĭh ƀon lan".

          "Du nuih n'hâm tĭng Đảng, tĭng Wa Hồ" lah du trong di dơi wa Y Thương K’Măn ta xã Bông KRang, nkuâl Lăk nchih nkah. 54 năm dâk tâm rmôt bah Đảng n'hanh aƀaơ hŏ âk năm yơn păng hôm way râng ăp nău kan sinh hoạt nsum mpôl ta ƀon lan, rgŏ jă ăp rnoi mpôl đê̆  tĭng jăp gung trong, trong kơl pháp luật bah Ngih dak, nsrôih rdâk njêng tâm rnglăp lam rnoi nuĭh. Y Thương an gĭt, bol nău rêh hŏ đăp mpăn, neh dak nar lơn ma hun hao yơn nău rêh bah ƀon lan ăp rnoi mpôl đê̆ hôm âk jêr jŏt, ăp bu êh rkeh hôm nde tâm nău dja gay nsŭk nsôr mplư rlăm kônh wa lơh chrai nău dơi cách mạng. Jêng ăp đảng viên kơt păng ân lah n'gâng tơm, lah ntŭk nsing khlay gay ƀon lan he kơt tĭng.

"Tâm bah ri aơ nơh Đảng n'hanh Ngih dak dŭt ŭanh khlay tât nău rêh nuĭh ƀon lan rnoi mpôl đê̆ dŭt âk ntil, bôk năp lah điện ăp rnăk hŏ geh đŏng, tâl bar lah rnôk bŭt săm ji mô roh prăk. Ăp ntil nău nê lah nău mât uănh khlay bah Đảng, trong kơl Ngih dak hŏ uănh khlay tât kônh wa ƀon lan rnoi mpôl đê̆ he".

Uănh năl nău khlay kan bah ăp đảng viên kơt wa Y Thương Kmăn, wa Võ Ngọc Tuyên, Bí thư huyện ủy, nkuâl Lăk an lah: aơ lah mpôl kan mha êng, lah ntŭk nsing bah ƀon lan rnoi mpôl đê̆. Ăp đảng viên kruanh rđău kan ơm hŏ mpơl kloh han săk chính trị, lah găr ntil ntoh lư tâm pah kan nkoch trêng, rgŏ jă kônh wa ƀon lan tĭng jăp trong nchrăp, gung trong bah Đảng, trong kơl, pháp luật bah Ngih dak. Wa Võ Ngọc Tuyên an lah:

          "Mpôl hên way ntrŏng ăp đảng viên lah du kao si tâm mir kao, lơn lah ăp đảng viên geh năm đảng âk khân păng lah ăp nuĭh ntĭt leo lor, lah sol trong chrat ang an ƀon lan hăn tĭng. Yor kơt nê̆ mpôl hên dŭt uănh khlay tât nău ôp khâl, rgŏ jă gay ăp đảng viên ntik hvi nău tă ơm gĭt kan rgop an n'gâng kan ta ntŭk. Di lah ăp nuĭh ntĭt leo lor ntoh lư lah ăp găr mblar lơp chrêk tâm gưl ủy chi bộ n'hanh mpôl kan đảng tâm dâng".

Đảng bộ n'gor Dak Lak aƀaơ geh rlău 85.000 đảng viên, tâm nê geh rlău 5.000 đảng viên geh năm đảng bah 50 năm đảng let lơ. Ăp đảng viên âk năm Đảng hôm an n'hâm suan nău gĭt blău an n'gâng kan cách mạng đŏng. Khân păng lah nuĭh ntĭt leo lor trong chrat ang an rơh đảng viên mom kơt tĭng, lah găr mblar lơp chrêk dơi ntôl tho rlău tĭng mông nar di kơt nuih n'hâm Kruanh Hồ Chí Minh tă nchih tâm tác phẩm “Đạo đức cách mạng” bah he "Mblar lơn ma ntôl tho lơn ma chrêk lơp, Maih lơn ma nkret lơn ma rsang rnglăy".