Tâm bri duh nar bôk khay 4 bah yan vai Tây Nguyên, hên mâp đảng viên Y Tuyên Bkrông (rnoi Rđe), 53 năm, ƀon Dray H’ling, xã Hoà Xuân, nkuăl ƀon têh Buôn Ma Thuột, păng ndrel ma du đê̆ nŭih dôl poh phân ân tơm cà phê tŏ dak rơh 3 ân mir tăm nsum ma tiêu ndrel sầu riêng. Wa nkoh, đah lah nŭih đảng viên ri wa mro ƀư ueh nuih n’hâm leo trong tâm nau pah kan jan sa jut n’huch ach o. Jêh âk năm tăm, rnôk aơ geh rlau 200 rkeh/năm tơm bah 1.500 tơm cà phê, 400 n’gâng tiêu ndrel 40 tơm sầu riêng. Rnôk văng sa geh, wa kơl an ăp nŭih êng tâm ƀon. Wa Y Tuyên Bkrông, nkoch:

‘Gâp lah nŭih hăn kơt tĭng ntĭm nti tâm xã aơ mpeh nau kan tăm, mât chăm cà phê, tăm tiêu ndrel sầu riêng. Tâm rnôk ntĭm nti ri gâp mra ntĭm ân kônh wa tay nau tă geh nau dơi mpeh tuch tăm ân ƀon lan kơt tĭng blau nau kan tuch tăm, mât chăm cà phê”.

 Nô Y Vinh H’đơk, rnoi rđe, 38 năm, gŭ tâm ƀon Cư Dluê, xã Hoà Xuân, nkual ƀon têh Buôn Ma Thuột, n’gor Dak Lak lah đảng viên gơih tâm nau kan, gơih tâm ăp nau êng đŏng. Leo trong pah kan lor bah nuih n’hâm đảng viên “janh mĭn, janh kan’, ăp năm nô geh rlau 200 rkeh tă bah nau tuch tăm ndrel ƀư tơm nŭih ndâk nkra ngih vâl. Jêh âk năm pah kan jan sa, dŭt năm 2023 mhe rlau, nô geh dơi nkra ngih nâp ueh, hvi 100m2, rnoh khlay ma rhiăng rkeh prăk. Nô Y Vinh nkoch:

 ‘Jêh rnôk lôch sĭt hăn tahen, gâp săch nau kan ndâk nkra ngih vâl, jêh ri hăn pah kan ân ma bu ndrel ndơn tay ngih bu gay ma nkra ăp ngih cấp 4, geh năm ri ndơn 3-4 ngih, geh năm mô âk nau kan ri geh 2 ngih. Gâp jă tay oh nô thợ tâm ƀon, geh 7-8 nŭih, 4 thợ chính mô lah 2 nŭih kơl, gâp ân ma bu 400-500 rbăn/nŭih/nar nsing tâm nau blau, nŭih geh nau blau ri 320 rbăn ndrel nŭih hăn kơl ri nklăp 300 rbăn/nŭih/nar. Lah nsum gâp geh tă bah cà phê ndrle n’ăp ma ndâk nkra ngih vâl ntơm 150-200 rkeh/năm”.

 Tahen ơm nkual ƀon têh Buôn Ma Thuột, rnôk aơ geh 8.800 nŭih, tâm nê, geh 2.691 nŭih đảng viên, nklăp 600 nŭih rnoi Rđe, Mông, Tày, Nùng, Dao Thái, Bunong...Wa Nguyễn Công Tình, Kruanhr môt tahen ơm nkuăl ƀon têh Buôn Ma Thuột rnê lah, ăp năm rlau aơ, ăp đảng viên tâm rmôt kŏ ƀư ueh nau kan leo trong lor, n’hao nuih n’hâm “Đảng viên hăn lor, ƀon lan tĭng ba kơi”. Ăp tahen ơm aơ mro ƀư ueh nuih n’hâm, nau jang kan bah “Tahen Wa Hồ” tâm nuih n’hâm kan mhe, đah nau gơih, mô klach nau jêr jŏt tâm rnôk pah kan jan sa, jut n’huch ach o. Ntơm bah nê, geh nau rgop âk ngăn đah nau hun hao văng sa, rêh jêng bah nkual ƀon têh Buôn Ma Thuột, ndâk rmôt kan lơn ma nâp ăp ntil, pơk pă nau kan ân âk nŭih, đah nau geh đăp mpăn. Ăp đảng viên Y Tuyên Bkrông, Y’Vinh H’đơk lah nŭih leo trong kơt nê. Wa Nguyễn Công Tình, mbơh:

 ‘Tâm ăp rơh rƀŭn, hên hŏ mbơh ăp nŭih ntoh lư kơt nô Y Vinh ndrel Y Tuyên gay ma nkoch tâm ăp chi hội tâm dâng gay geh bu kơt tĭng hun hao văng sa. Ngăn lah ăp nŭih lạh rnoi mpôl đê̆ mô lăng geh nau jang, nsôih pah kan jan sa, ƀư văng sa geh dơi kơt 2 nô Y Vinh ndrel Tuyên. Tă bah nê, njêng n’hâm rêng tâm rmôt tahen ơm lam nkuăl ƀon têh ndrel tâm ƀon lan”.

 Mra dơi lah, ăp đảng viên rnoi Rđe tâm rmôt tahen ơm nkuăl ƀon têh Buôn Ma Thuột kơt nô Y Tuyên mô lah Y Vinh hŏ ndrel dôl pơk nau nsôih, nau rnơm ndrel n’hâm rêng gay ăp nŭih êng  kơt tĭng, mô lah kơt kônh wa tâm nkuăl ƀon têh Buôn Ma Thuột, ƀư kơt tĭng gay ma rklaih ach o mô lah ƀư ndrŏng, rgop nau ndâk nkual ƀon têh Buôn Ma Thuột lah êng ndrel Dak Lak lah nsum lơn ma têh ndrŏng./.