Kon se rnoi Cơ tu Clâu Ân, tâm xã Tr’hy, nkuăl Tây Giang, n’gor Quảng Nam ơm rêh kon đơi. Ngih geh 3 oh nô, Ân lah kon tal 2 bah rnăk vâl. Ăp nau kan ăp nar ri knŭng nsing tâm U păng ranh rlau 70 năm hôm. Piăng sông ri knŭng sa ma byăp bri, rnôk U păng ji kuet mô dơi hăn mir ri lŏ ât sa. Yŭ nau rêh bah U sau Ân, ri ƀon lan bu ân phe, ân byăp tât kơl. Nau hăn nti ri mô nơih.

Năm 2020, Đồn Biên phòng A Xan pah kan ma rnăk vâl, nkuăl gay ma ndơn Ân rong. Tât rêh bah ăp kônh tahen Biên phòng, Clâu Ân geh pă jrâu bich hvi, geh ntŭk gŭ nti, geh ăp ntil săm ƀŭt ndơ dŏng ăp ntil...Clâu Ân geh ăp kônh tahen rong ueh ngăn, mât rong ngêt sa, bĭch dâm ndrel hăn nti, ntĭm nti ăp nau. Ân dôl nti jrâu 8 ngih săm ƀŭt Phổ thông dân tộc bán trú, Trung học cơ sở Lý Tự Trọng. Ân nkoch:

‘Nau rêh bah rnăk gâp ri jêr ngăn, geh kônh tahen dê mât rong gâp rhơn ngăn. Kônh tahen mât răk ân ngêt sa ndrel hăn nti lah du rnăk vâl nơm hôm. Gâp lah ueh ma kônh tahen âk ngăn. Ta aơ gâp geh ngêt sa tŏng, kah, geh kho ao mhe, ăp kônh tahen Biên phòng ntĭm nti ân đŏng”.

 Mô geh nau janh oi kơt Clâu Ân, Hốih Đức Hữu hôm prêng ngăn. Rnăk Hữu ri ach o. Mbŏ păng ji play leh âk năm. Ndơ ngêt sa tâm rnăk vâl kâp rnơm tâm Me păng. Năm 2019, Hữu geh Đồn Biên phòng A Xan ndơn rong. Nar bôk năp tât rêh tâm Đồn Biên phòng, Hốih Đức Hữu ji kop mro yor nkah ma rnăk vâl, ŭch sĭt đŏng. Cán bôk, tahen Đồn Biên phòng A Xan mro tâm dăch, bonh đă, kơl an păng mơng ma nau rêh mhe. Tât ta aơ, ăp kônh uănh păng kơt kon sau tâm rnăk vâl. Bar “tahen jê̆” geh hăn nti, mông nar rjăp tâm ban ma ăp kônh tahen, lŏ blau phăp phông nah ueh đŏng.

            Đồn Biên phòng A Xan rnôk aơ ndơn rong 2 mon tâm ntŭk ndrle kơl an 7 kon se êng dôl gŭ ma rnăk vâl. Thiếu tá Nguyễn Văn Lợi, chính trị viên Đồn Biên phòng A Xan, nkuăl Tây Giang, ngơi:

            ‘Đah ma ăp mon geh tâm rnoh Kon rong đồn biên phòng, hên dôl ndơn rong 2 mon geh nau rêh jêr ngăn, hên leo sĭt ta aơ geh nau dơi gay ma mât chăm ân ăp mon lah n’hao nau rêh ndrel geh nau dơi hăn ntĭm nti ueh lơn. Ăp mon hŏ tâm rnglăp ueh, ntĭm nti ueh geh nau dơi lơn. Ntơm bah nê ntrŭnh ƀư ndrel pơk rêng, đah tơm prăk bah gưl kan ba lơ ndrel cán bộ tahen tâm lam mrôt rgop prăk kơl an ăp khay lah 600 rbăn prăk/khay”.

Ăp đồn biên phòng tâm n’gor Quảng Nam dôl ndơn rong 18 kon se tâm bôk nau kan “Kon rong biên phòng”. Ăp kon se gŭ nkre tâm đồn, geh râng ăp nau kan, nau ntĭm nti, ƀư ueh nau dơi, nau blau. Đồn biên phòng mât ueh nau tâm nchră ma nkuăl, gĭt nau ntĭm nti, nau rêh ăp mon. Bôk nau kan “N’hao nhoat jâng kon se tât ngih săm ƀŭt” bah ăp rmôt tahen Biên phòng hôm ndơn kơl 164 kon se geh nau rêh jêr, tâm nê, geh 6 kon se bah dak băl Lào. Ăp kon se geh kơl an 500 rbăn/khay tât rnôk lôch nti jrâu 12. Nau kan “Kon rong đồn biên phòng” geh nau ueh, njêng ntŭk rnơm ân ăp kon se geh nau rêh jêr jŏt, ndrel ăp gưl n’gâng kan n’hao nau blau, rgâl nau rêh tâm nkuăl n’har bri. Đại tá Hoàng văn Mẫn, Chính trị viên Tahen Biên phòng n’gor Quảng Nam, ngơi:

“Aơ lah nau kan geh dŭt n’hâm khlay, ndri ma hên dôl ma rgŏ jă ăp rmôt kan gay ma tâm rgop đah nkuăl ndrel ăp ngih săm ƀŭt kơp uănh, săch ndrel lŏ pơk hvi nau ndơn ăp kon se rêh mâp nau jêr gay ma ƀư kon rong đồn biên phòng. Bah nê pơk trong ân hăn nti, ân geh ntŭk gŭ rêh ueh lơn, đăp mpăn ân ăp kon se geh nau rêh ueh ang lơn. Bah nau kan đah rmôt gưl uỷ Đồn biên phòng ndrel nkuăl ndrel ƀon lan 2 ntrong n’har bri tâm rgop tâm dăch lơn ndrel geh nau rêh ueh lơn”.

Bôk nau kan “Kon rong tahen biên phòng” ndrel “Kơl nhoat jâng oh hăn nti” bah cán bộ tahen biên phòng lah ntŭk nsing nâp ân ăp kon se rêh kon đơi rnoi mpôl đê̆ jêr jŏt tâm nkuăl jru, nkuăl ngai. Ăp kon se nê jêh aơ mra têh tâm nau ŭch rŏng ndrle geh du nau rêh ueh lăng lơn. Ăp nau nkoch mpeh “Kon rong Đồn biên phòng” lơn ma ƀư ueh tay nau tâm boh tâm rnglăp đah tahen biên phòng ndrel nŭih ƀon lan nkuăl n’har bri./.