Di nkah 83 năm Nar bu ranh âk năm bah Việt Nam (6/6) ndrel ntrŭnh ƀư “Khay kơl an yor nŭih bu ranh Việt Nam” năm 2024, n’gor Dak Lak hŏ geh âk nau kan ngăn, mât chăm nŭih bu ranh tâm n’gor. Tâm kêng măng 5/6, rmôt hăn kan bah rđau kan n’gor Dak Lak hŏ tât khâl ndrel pă nklâm ndơ ân bu ranh 100 năm tâm nkuăl Krông Pách, ôp khâl Rnâng kan ntoh măt Bu ranh âk năm bah n’gor, Rmôt kan bah ăp cán bộ rlu ranh ndrel bu âk năm tâm n’gor, Ntŭk mât kơl an bah n’gor.

Ăp nkuăl tâm n’gor kŏ ôp khâl, pă nklâm ndơ ân 1.113 nŭih bu ranh 90 năm ndrel 100 năm. Rnoh prăk pă nklâm ndơ ndrel rhơn bu ranh tâm rnôk aơ bơi tât 1,35 rmen. Rmôt nŭih bu ranh bah n’gor Dak Lak mbơh: Ndrel ma nau kan mât chăm kơl an drăp ndơ, ăp mrôt kan lŏ ntrŭt dăng nau mât kơl an mpeh nuih n’hâm, nau ueh tâm nau rêh bah bu ranh, rêh ueh, rêh geh nau dơi./.