Rnơm geh nau kan mrô 8 ma yuh Châu Thị Ngọc Điệp tâm ấp Đại Nghĩa Thắng, xã Đại Tâm geh râng âk nau kan nkoch trêng bah nkuăl. Ntơm bah nê, yuh nkoch mbơh ân ăp rnăk êp nơm gĭt ndrel n’hao nau mât, kơl an bu ur ndrel kon se:

 ‘Gâp geh râng nau kan ri kŏ hăn nkoch trêng ân kônh wa oh nur nơm ndrel ma mô dơi lơh dong oh kon kơt ntơm nơh ôh, mât ân bu ur ndrel kon se tâm nkuăl nơm”.

 Bôk nau kan mrô 8 geh ntrŭnh tâm 3 ấp jêr ngăn ngên bah nkuăl Mỹ Xuyên. Nê lah ấp Đại Nghĩa Thắng, xã Đại Tâm; ấp Sóc Bưng, xã Thạch Phú ndrel ấp Phú Giao, xã Thạch Quới đah âk nau kan ngăn dôl geh ƀư. Yuh Dương Thị Mỹ Niên, Kruanh rmôt bu ur ấp Phú Giao, xã Thạch Quới, nkuăl Mỹ Xuyên, n’gor Sóc Trăng nkoch:

 ‘Tâm rơh tât, bu ur ấp Phú Giao, xã Thạch Quới mra tâm rgop ueh ma rmôt kan ba lơ ndrel ăp gưl n’gâng kan, ƀư ueh nau kan mrô 8. Aơ lah ngoai tâm âk nau kan têh, khlay geh tât bu ur ndrel kon se, rƀŏng tât nkô̆ nau tâm ban bu ur bu klô ndrel rgum rklaih ân geh nau tam du đê̆ nau kan ndal ngăn bah bu ur ndrel kon se nkuăl rnoi mpôl đê̆”.

 Rơh rlau aơ, rmôt bu ur nkuăl Mỹ Xuyên rgum tâm 3 nkô̆ nau tơm. Nê lah nkoch trêng, bonh đă rgâl nau mĭn nau kan, rgop nau jut jăng lơi nau mô tâm di tâm rnăk vâl ndrel ƀon lan, ăp nau rluk mâl ơm geh khuch ndrel du đê̆ nau kơl an ân bu ur ndrel kon se; Ndâk ndrel pơk rêng ăp nau kan ƀư rgâl nau mĭn kan, n’hao nau dơi văng sa ân bu ur; Ntrŭt dăng nau tâm ban bu ur bu bu klô ndrel kơl an ân bu ur n’hanh kon se; đăp mpăn nau ngơi ndrle nau râng bah bu ur ndrel kon se gay hun hao văng sa rêh jêng bah bon lan, uănh ndrel kơl an bu ur geh pah kan tâm ntrong kan chính trị. Wa Trần Hồng Ni, Kruanh rmôt bu ur nkuăl Mỹ Xuyên, n’gor Sóc Trăng mbơh:

  ‘Gay ƀư ân ueh nau kan rmô 8, rmôt bu ur nkuăl Mỹ Xuyên n’hao nau nkoch trêng, ndâk ăp nau kan tâm di đah nau dôl geh bah nkuăl ndrel rklaih nau kan ân tâm ban bu ur bu klô tâm âk nau kan đah bu ur ndrel kon se bu ur nkuăl rnoi mpôl đê̆, jăng lơi nau mĭn ơm, nau rluk ơm, nau mơng mô tâm di, rgop nau dơi tâm tỏng hun hao nsum bah nkuăl”.

 Jêh ntrŭnh ƀư nau kan rmô 8, nau tâm bah bu ur bu klô mpeh nau dơi geh hăn nti, kan pah, mât chăm n’hâm soan bah bu ur tâm Sóc Trăng geh rgâl, ngăn lah bu ur tâm nkual jru, ngai, nkuăl rnoi mpôl đê̆. Nau dơi, nau kan bah bu ur lơn geh ƀư rjăp tâm nau rêh ndrel rnăk vâl. Nau tâm ƀah mpeh bu ur bu klô geh nau mhe lơn, geh pơk trong ueh lơn. Tĭng rnoh geh kơp tât dŭt năm e, lam n’gor geh 109 xã, phường, nkuăl têh geh nau kan njrăng, rdâng tâm lơh tâm rnăk vâl đah bơi tât 180 ntŭk kan, bơi tât 650 rmôt njrăng, rdâng nau tâm lơh tâm rnăk vâl, rlau 800 ntŭk geh bu rnơm tâm ƀon lan, bơi tât 850 mrô điện thoại geh kuăl mbơh nau ndal./.