Ntoh nau tâm nar rƀŭn, Kruanh Quốc hội Vương Đình Huệ mbơh, tâm nkuăl neh ATK Việt Bắc, năm 1948, Kruanh Hồ Chí Minh ntoh nau kuăl jă tâm rlong rŏng dak ndrel bonh đă “Tâm rlong lah rŏng dak, rŏng dak ri tâm rlong, ăp nŭih tâm rlong lah ăp nŭih rŏng dak ngăn”. Lôch 75 năm rlau aơ, nuih n’hâm nê lah nau nsôih ngăn bah nau tâm rlong rŏng dak hun hao mô rlu, rhop nau ƀư jêng ăp nau dơi têh, khlay tâm nau hun hao nau ndâk njêng ndrel mât neh dak Việt Nam, ndâk nau dơi neh dakânrr aơ.

Tuyên Quang lah n’gor leo trong bah lam dak mpeh nau mât ndrel hun hao bri. Neh bri geh 76% rnoh neh chăt êng. N’gor ƀư ueh nau rgum 3 ntil bri; rgum ƀư ueh nau mât ndrel hun hao bri, tăm mhe rlau 11 rbăn ha ăp năm, njêng nkuăl geh bri dŏng bơi tât 200 rbăn ha, rnoh nkŭm n’hâm rlau 65%, mât âk ntil, nâp, rgop nau mât kon ntil ndrel njêng ăp ntil ndơ geh bah bri, nchrăp njrăng rdâng mih dak lip, sial, rluh neh...ân nkuăl Bắc Bộ. Kruanh Quốc hội Vương Đình Huệ lah rjăp, năm 2023, Tuyên Quang ân ƀư ueh nau kan vay ơm ŭch rong ƀon tơm cách mạng ndrel ăp nau tă dơi geh, ntrŭt dăng lơn tay nau tâm rlong rŏng dak, njêng n’hâm bonh đă cán bộ, đảng viên ndrel ƀon lan ăp rnoi nsôih ƀư ueh ăp ntil ndrel ăp nkô̆ nau, nau nchrăp luh:

‘Di rnôk aơ, gâp đă ăp ntŭk kan Trung ương, ê lor ndrel ngăn lah N’gâng kan tuch tăm ndrel hun hao ƀon lan kơl an n’gor Tuyên Quang ƀư dăng lơn tay nau dŏng nau kan prêh tâm nau mât dnrel hun hao bri, hun hao văng sa tuch tăm, geh nsum ma tăm bri, mât bri ndrel hun hao nau nâp ntŭk ntu mât bri ndrel pâl n’aih ma bri, mât nau ơm ueh ndrel ndâk njêng ƀon lan mhe”.

Kruanh Quốc hội đă ăp gưl, ăp ntŭk kan lŏ rgâl mhe ndrel ntrŭt dăng ân tâm ban, ngăn ndrel săk tam lơn tâm nau kan tâm rlong rŏng dak ndrel ma nau ntĭm nti ndrel ƀư tĭng nau mĭn, nau rêh, nau kan bah Kruanh Hồ Chí Minh, mô rlu ƀư ueh nuih n’hâm tâm rnglăp, n’hâm dăng bah lam ntrong kan chính trị, tâm ban nuih n’hâm, tâm rgop bah lam ƀon lan ƀư ueh ăp nau ntrŭnh bah Đảng, nau ntrŭnh bah Quốc hội mpeh hun hao văng sa, rêh jêng ndrel tơm prăk Ngih dak năm 2023 gay ƀư ueh nau dơi, ntrŭt dăng hun hao văng sa, rêh jêng, mât đăp mpăn nau rêh đah nau tơm lah n’hao nau rêh bah ƀon lan.

Bah ăp nau kan, ăp nkuăl, ăp ntŭjk, rmôt kan lŏ ƀư ndrel rđau ngăn ăp nau tâm rlong đah nkô̆ nau ngăn, tâm di, ăp nau kan, ăp nkuăl, ƀư nau tam rlong jêng nau mơng ăp nar, jêng nau ŭch tâm dăch, bonh đă têm nkrem, nsôih njrăng, rdâng ngăn sa khâm, mpŭng lir, rgâl mhe hành chính, ngăn lah ƀư ueh nau saơ, ntĭm nti, pơk hvi nau kan ân tam, rgâl mhe nau rnê nkhôm, njêng nau nsôih bonh đă ăp rmôt, ăp nŭih ƀư jêh nau kan bah nơm, ƀư ngăn di nkah 75 năm nar Wa Hồ kuăl jă nau tâm rlong rŏng dak (11/6/1948-11/6/2023).

Kruanh Quốc hội lah rjăp, năm mhe Quý Mão 2023 lŏ lah tết năm tơm si geh ndâk tă bah năm mhe Canh Tý lôch 63 năm bah năp nơh tĭng nau kuăl jă bah Kruanh Hồ Chí Minh, lah nau ton bah nau ƀư tĭng nau đă bah Ban Bí thư tâm nau rđau mrô 13 bah Trung ương mpeh nau n’hao nau rđau bah Đảng đah nau mât ndrel hun hao bri gay ma ndâk ƀư “nau văng sa ndrih” hun hao nâp nâl.

‘Dĭng lĕ ƀư ân geh nau dơi nau tơm khlay nê lah: Ăp nŭih tăm bri ân geh rêh tă bah bri ndrel ndrŏng tă bah bri, nsôih ƀư ân ngăn nkô̆ nau ndâk njêng Tuyên Quang lah ntŭk kan tăm bri dŏng nau kan prêh ndrel ntŭk kan tuch tăm, ê nkra si nkuăl Trung du ndrel nkuăl yôk Bắc Bộ tĭng nau ntrŭnh mrô 11 bah N’gâng kan chính trị mpeh nau rƀŏng hun hao văng sa, rêh jêng, đăp mpăn neh dak, rnă njrăng nkuăl Trung du ndrel gôl yôk Bắc Bộ tât năm 2030, rƀŏng tât năm 2045, aơ lah nkô̆ nau ƀư rgum”.

Đah nau kan mhe, nau nsôih mhe, nau kan ueh, Kruanh Quốc hội rnơm lah “Tết tăm tơm si mro mrăng nkah gĭt Wa Hồ” năm mhe Quý Mão 2023 bah n’gor Tuyên Quang ngăn lah mra geh âk nau dơi ueh lơn, rgop nau ndâk neh dak Việt Nam ueh, ndrih, hun hao nâp nâl, kơt nau mpŏng ŭch tă bah ơm bah Kruanh Hồ Chí Minh “Năm mhe lah rnôk tăm tơm si, ƀư ân neh dak lơn nar lơn mhe”./.