Kêng măng nđaơ (23/1) ta Ngih Chính phủ, Bí thư Trung ương Đảng, Groi Thủ tướng Chính phủ Lê Minh Khái-Kruanh Ban Ntĭm rđău ƀĭt joet rnoh khlay ƀư tơm rơh rƀŭn mpeh săk rnglăy trong kan mât uănh ƀĭt joet rnoh khlay năm 2023 n’hanh nchrŏng trong năm 2024. Gay nchrăp rdâng đah nău jêr ntoh hao mhe, Chính phủ, thủ tướng Chính phủ, Groi Thủ tướng-Kruanh ban Ntĭm rđău ƀĭt joet rnoh khlay lĕ ntĭm rđău ăp n’gâng kan, nău kan, ƀon lan mbơh ƀư dŭt n’hâm âk trong mkra wăng sa têh kơt đăp mpăn pă ndoh ndơ dŏng n’hanh ndơ ƀư ngih wâl khlay bah nkra njêng.

Groi Thủ tướng Lê Minh Khái lah rjăp: Gay ƀư tĭng nău kan Quốc hội n’gluh an, trong kan mât uănh, ƀĭt joet tâm năm 2024 an mât uĕh tay săk rnglăy lĕ dơi geh, nchroh mbơh tĭng nu nău ngăn, ƀư tĭng du trong nchrăp lor, ngăch, đăp mpăn ƀư tĭng uănh nđôi uĕh ntoh hao khlay mhe tĭng rnoh an Quốc hội n’gluh an, Groi Thủ tướng Lê Minh Khái lah bah lơ 1/7/2024 mbra ƀư tĭng n’hao prăk khay, bah meng nĕ rnoh an hao jêng manh prăk hao đŏng, âk nkô̆ nău jêr njrăng kơt rgâl hao rnoh khlay bah du đêt ndơ dŏng, yor nê an nchroh mbơh nu nău ngăn, dŭt n’hâm njrăng, mô dơi thơ tha, gay nchrăp ăp trong mât uănh, ƀĭt joet rnoh khlay tâm di, ngăch, săk rnglăy.