Rnôk geh ôp mpeh nkô̆ bah 3 bôk nau kan bah neh dak mpeh nau ndâk njêng ƀon lan mhe, n’huch ach o nâp nâl ndrel hun hao văng sa, âk nŭih moh aơ lah ăp nau ntrŭnh pơk trong bah Quốc hội gay ân ƀon lan rklaih ach o, ăp nhoat hao tâm nkuăl neh bah nơm. Wa Hoàng Nhị Sơn, Bí thư nkuăl uỷ Xín Mần, n’gor Hà Giang mbơh, ntơm tơm prăk bah bôk nau kan n’huch ach o nâp nâl, bôk nau kan bah neh dak, nkuăl njêng ăp nau khlay mhe tă bah nau kan ê nkra gay tăch:

‘Nkuăl aơ âk nau jêr ngăn ri ma hên rgum ăp tơm ntŭk kan tăch rgâl gay ntrŭnh ăp nau kan tâm nau tuch tăm bah bôk nau kan n’huch ach o, bôk nau kan bah neh dak. Rnôk aơ phung hên geh ăp ntrong kan ƀư bum byăp cải, ƀăng gle bát độ, ka, chè, thảo quả, ê nkra puăch sur, puăch ndrôk, ăp ntŭk kan dôl ƀư rjăp đah kônh wa ƀon lan ueh ngăn”.

Lôch jêh rlau 2 năm ƀư 3 bôk nau kan bah neh dak mpeh nau ndâk njêng ƀon lan mhe, n’huch ach o nâp nâl, hun hao văng sa, rêh jêng nkuăl rnoi mpôl đê̆ ndrel gôl yôk hŏ saơ kloh, ntrong rƀĭng geh tâm ban đah rnoh ueh lăng nar lơn hao prêh bah ƀon lan. Yơn lah, tĭng nau geh mhe aơ bah Rmôt kan mêt uănh bah Quốc hội mbơh tâm rơh rƀŭn tal 6 Quốc hội gưl 15, ri nau ƀư ăp nau kan tâm âk ntŭk hôm geh âk nau ê blau nau ƀư. Mô lah geh ntŭk ƀư ăp nau kan tâm dăch ƀon lan ngăn ngên, cán bộ geh bu moh lah knŭng “mbơh nau dơm” ma ƀon lan, kơt lah nau bah Groi Kruanh UBND xã Thượng Trạch, nkuăl Bố Trạch, n’gor Quảng Bình, Nguyễn Trường Chinh:

            ‘Mbơh lah ngih gŭ. Năm 2022 mbơh, 2023 mbơh tay. Rnôk aơ ri ngih gŭ kơl an geh 44 rkeh, ma tĭng nau ntrŭnh mrô 28 ri kônh wa ta aơ mô manh, klach mô geh prăk trok mplŏ. Ngih tâm nkuăl ri ƀư ntŭk mât rong ăp ntil lĕ 130 rkeh prăk hôm, rnoh kơt nê jêr ngăn ân nkuăl. Năm 2022-2023 mô dơi geh ƀư du mlâm ngih ơm”

 Mô mâp nau jêr rnôk ntrŭnh ƀư kơt Quảng Bình, n’gor Hà Giang tât rnôk aơ hôm geh ƀư âk nau kan geh dơi 80% nkô̆ nau mpeh ngih gŭ ân rnăk vâl rnoi mpôl đê̆, gol yôk. Du đê̆ rnoh ƀư âk nkuăl, ngăn lah ăp n’gor tâm nkuăl jru, nkuăl ngai geh nau ŭch. Ndri kơt lah Hà Giang lŏ mâp âk nau jêr êng đŏng. Wa Dương Việt Hùng, Kruanh jrâu kan văng sa nkuăl Xín Mần, Hà Giang, hôm rvê:

            ‘Du đê̆ rnăk vâl rnôk geh kơp bôk năp tâm di nŭih. Yơn lah, tĭng nau kơp tă bah năm 2022 ndrel tât năm 2023 ntrŭnh, geh dơi tâm rơh nê đŏng, bu mra nkra êng tâm ngih, mô lah rklaih ach o mô lah ăp nau kan êng êng ri mô geh nŭih geh kơt an tay ôh”.

Mô geh nau kơl an, mô di lah nŭih ƀon lan lĕ rklaih ach o, yơn ndrel ma nau kan ma nkual mô dơi geh pă tơm prăk. Nau nkol tâm nau doh rklaih aơ lah nau âk rnôk ma ăp nkuăl ƀư 3 nau kan bah neh dak hôm. Jêh ri tât nau kan mô ngăn, mô nâp, nchrah nchrai, vĕ vĕ tâm nau pă gưl, pă nau kan ƀư ân ăp rmôt, ăp nau kan mô geh jêng săk tam ngăn. Tâm nchră ma phung hên, wa Hoàng Xuân Ánh, Kruanh UBND n’gor Cao Bằng kơp dơn:

 ‘Gay ân lah nkuăl hôm geh nau vĭ vĕ ngăn, kơt lah nau tâm rgop nau pă tơm prăk lah hên mô gĭt moh nau ma ƀư ơm. Ntŭ kan kơl mbơh nchră nau mbơh kơt aơ, ôi taơ dăn nau mbơh đă bah n’gâng kan lŏ jêng nau êng. Dăch dŭt mô dơi, mô luh dơi nau ntrŭnh kơl an”.

Nau mô tâm di lah tâm ntŭk, tâm rnôk mô tŏng prăk, mô geh nau kan ti prăk bah bôk nau kan lŏ geh tâm kho bạc, nkuăl dôl ma rvê mhâm blau gay dŏng gay ƀư kan. Mô lah geh ntŭk hŏ joi trong gay ma mplŏ tơm prăk, kơt lah n’gor Lạng Sơn. Tĭng wa Hồ Tiến Thiệu, Kruanh UBND n’gor Lạng Sơn, yor bôk nau kan bah du rmôt kan ƀư tơm, yơn nŭih geh kơl ri knŭng ngoai, ma tĭng nau ntrŭnh ri du hê nŭih mô dơi geh kơl du nau ntrŭnh, ƀư jêng nau tâm ntrŭp rnôk rgum ăp rnoh mrô ri ma nkuăl aơ geh nau tât mra mplŏ rlau 335 rmen tơm prăk bah bôk nau kan bah neh dak:

‘Tơm prăk ƀư nau ndâk kan ri păng jêr ngăn. Rnôk aơ hôm 355 rmen tơm prăk ƀư nau kan mô dơi geh dŏng ndrel phung hên đă mplŏ lơi ân Trung ương”.

Vĭ vĕ, jêr ƀư, mô blau geh trong ƀư tĭng nau ntrŭnh ntĭm mbơh. Ƀư ri klach geh nau tih, ŭch trok tơm prăk ân Trung ương ri lŏ rvê tât nau geh dơi bah nau rnê nkhôm, nau dơi ƀư bah gưl kan tâm dâng. Nau kan aơ dôl ƀư ăp nkuăl ntrŭnh ƀư 3 bôk nau kan bah neh dak ytup tâm nau “hăn ri kol yôk, plŏ ri kol dak”./.