Ăp năm mhe aơ, nkuâl Trà Bồng, n’gor Quảng Ngãi hŏ an ƀư bôk nău kan gưl neh dak n’hŭch ach o  jŏ jong grêt dăch đah ngăn ngăn, n’hao nău dơi  tam pah  kan n’hŭch ach o. Âk rnăk ƀon lan dơi kơl mpeh jay gŭ, kơl wăng sa, klaih rlău ach o jŏ jong.

Rnăk nô Hồ Văn Lách ta thôn Trung, xã Trà Sơn, nkuâl Trà Bồng mpeh rnăk ach o. Năm 2023, bah bôk nău kan gưl neh dak n’hŭch ach o jŏ jong, rnăk nô Hồ Văn Lách dơi  ntop kơl 2 mblâm ndrôk ntil gay rơ̆ jêng. Ur sai nô dơi năp nti trong ƀư ndrung n’gar, tăm pih mât rong ndrôk. Nô Lách nănh  manh 50 rkeh prăk bah Ngân hàng Chính sách xã hội đah deh prăk kon đêt, ntop đah tơm prăk kơl ƀư jay gŭ bah bôk nău kan gưl neh dak n’hŭch ach o jŏ jong, nô ƀư geh du mblâm jay nâp uĕh. Nô Hồ Văn Lách rhơn rnôk ur sai hŏ geh nău  kan đăp mpăn, nsan hao klaih rlău ach o:

“Geh tay ndrôk ri  lơn ma uĕh lơn, uănh nsum mpôl hên hŏ dơi kơi năp nti hôm.  Ndrung n’gar ri ƀư an têh hvi, pih ri tăm âk an ndrôk sa. Rnôk ru ri hăn tiăp, hôm  lah mô ru ri, hăn rek pih an ndrôk sa. Nơm geh ngih dak mât uănh ntuh kơl, uănh nsum lah uĕh ngih dak hŏ ntop kơl”.

N’gâng kan nkuâl Trà Bồng, n’gor Quảng Ngãi ƀư âk jrô kơi năp nti an rnăk ach o n’hanh ƀon lan rnoi mpôl đê̆, ntĭm  nti kônh wa trong tuch tăm, mât rong gay n’hao nău dơi tam kan tuch tăm mât rong, klaih rlău ach o. Năm aơ, xã Trà Sơn, nkuâl Trà Bồng nsrôih ndơ̆ rlău 200 rnăk klaih rlău ach o. Wa Đinh Văn Phong, Kruanh UBND xã Trà Sơn, nkuâl Trà Bồng an gĭt, lơn âk rnăk ach o ta xã lah ƀon lan rnoi Cor, nău gĭt blău hôm đêt. Cán bộ xã hăn ôp uănh na nê̆, sŏk nău rgop bah tĭng rnăk mpeh nău ŭch geh ndơ  ntop kơl, lôch nê tâm pă  tơm ndơ kơl kônh wa. Wa Đinh Văn Phong an gĭt tay: n’gâng kan đă ăp rnăk ach o ton dŏng  tơm prăk ntop kơl di nău kan:

“Ăp n’gâng kan nsum mpôl an ƀư jŭr tât tâm dâng sŏk nău rgop bah nuĭh ƀon lan mô di ân kâp nchâp đă. Ntĭt kơt ău dja mô tŏng neh, ău dja mô geh  jay, ău dja ân geh ntop kơl mpeh neh tuch tăm, ŭch geh ndrôk mô  lah ŭch geh mpeh kon si ntil, xã tâm pă ntil. Hăn na nê̆, ƀon lan ŭch sơch êng, khân păng geh nău ton, nsrôih klaih rlău ach o”.

Năm 2020, rnoh âk rnăk ach o bah nkuâl Trà Bồng, n’gor Quảng Ngãi âk rlău 42% ri tât kêng dŭt năm 2023 dơn hôm rlău 29%. Nơm geh nău ntop kơl bah âk bôk nău  kan gưl neh dak, tât aƀaơ, nău way mât chăm bah kônh wa hŏ rgâl. Lơn lah ƀon lan rnoi Cor ta  nkuâl Trà Bồng hŏ dŭt bah nău ntrơn du tĭng mir tĭng ba, kônh wa dơi jao neh, jao bri tăm, nău rêh geh âk săk ntơr. Năm aơ, nkuâl Trà Bồng nsrôih jut jăng 1.500 rnăk ach o bah bôk  nău kan gưl  neh dak jut jăng ach o jŏ jong. Wa Nguyễn Văn Dũng, Bí thư Huyện ủy Trà Bồng an gĭt: Huyện ủy ƀư hăn ôp uănh na nê̆ pah kan n’hŭch ach o ta 16 xã ta nkuâl, rƀah gĭt nău ŭch geh na nê̆ bah tĭng thôn, rnăk ƀon lan gay geh trong nkra rđău đă pah kan n’hŭch ach o:

“Mhe aơ nơh, Bí thư Huyện ủy hŏ hăn lam 16 xã, hăn tât ta thôn gay hăn ôp uănh nău tĭng ƀư ntop kơl rdâk njêng jay gŭ, trong gŭ rêh mhâm ƀư n’hanh moh geh ndơ hôm jêr jŏt, ân rhuăt luh nău tă ơm gĭt kan n’hanh hŏ geh trong rƀŏng rđău đă tĭng xã đah ăp nău mha êng geh trong ntĭt leo êng. Ta du xã yơn ma ta thôn dja êng đah thôn ri. Trong rđău đă oh nô rlău ma trong nchrăp nsum ân dŏng si  tăm  ndơ mât, ntĭm nti kônh wa mhâm ƀư ân tâm di tĭng thôn, tĭng rnăk mô dơn rđău đă nsum”.