Tâm nchră ta ngih rƀŭn, âk ntoh măt ân lah, ân geh ntrơn rgâl Luật mât tơm dak dŏng, kơl an ƀư jêh trong kan pháp luật mpeh nau mât tơm dak tâm rnôk n’hao đăp mpăn tơm dak, rklaih nau kol tâm nau mât dak. Rgop nau tâm nau nchrăp luật, wa Dương Tấn Quân, Rmôt kan bah Bà Rịa, Vũng Tàu ân lah, hôm geh nkô̆ ê tâm ban mpeh nau mât ngih dak mpeh ndơ ơm, ân geh uănh der nau tâm rkăng:

 ‘Ăp điều khoản geh nau ntrŭnh mpeh nau mât tơm dak tă bah ăp ntŭk kan, n’gâng kan Trung ương kŏ kơt lah bah nkuăl ê geh ƀư nau kan rjăp kloh, n’hêl, ê tŏng nau jăp ndrel ăp ntil. Ê geh nau ntoh nau kan bah N’gâng kan nchră nau mhâm ƀư mpeh nau tâm boh lam ntur neh mpeh tơm dak bah dak nơm, dak ba dih, nau kan bah N’gâng kan Công an, N’gâng kan neh dak mpeh nau mât tơm dak, đăp mpăn tơm dak mô lah nau ê dơi bah tơm dak”.

Nau ngăn rnôk aơ tâm nkuăl jru, nkuăl ngai, nkuăl văng sa hôm jêr mô lah nkualư mô geh âk dak ri ƀon lan mô tŏng dak kloh dŏng. Mô lah, âk ntŭk tâm nkuăl ƀon têh kŏ mô geh dak, geh ntŭk geh dak ma mô blau dŏng yor ƀŏ. Gay rklaih nau aơ, âk nau đă, rgâl Luật tĭng nau rgum nkô̆ geh tât tơm dak, jao nau kan ân n’gâng kan mât tĭng di nau dơi geh ntrŭnh tâm luật geh tât. Wa Tráng A Dương, rmôt kan bah N’gor Hà Giang, mbơh:

 ‘Âk nau ƀư jêng nau khuch tât tơm dak geh tât âk nau kan kơt: nau ƀư njêng mhe nkuăl têh, lơh kăl si, dŏng phân hoá học, dak si mât tơm tăm tâm nau kan tuch tăm, dak hoch công nghiệp, ê nkra tăch rgâl ƀư nau kan...Gâp đă ntŭk nchrăp săch lŏ mĭn, kơp, ntop ăp nau kan bah N’gâng kan, ntŭk kan, rmôt kan, êng nŭih geh tât tâm nau mât njrăng, rdâng nau khuch bah tơm dak, gay njêng nau kan pháp lý tyŏng tâm nau kan dŏng, mât tơm dak, đăp mpăn tơm dak tŏ bah neh dak”.

Mpeh nau đăng ký, pă săm ƀŭt ân dŏng tơm dak, du đê̆ nau ân lah, ân geh kơp, ntoh kloh ntŭk đăng ký, ntŭk geh pă săm ƀŭt, ntŭk mô kâp đăng ký, pă săm ƀŭt der nau tâm rkăng mô llah lơi dơm, ƀư kloh nau dơi, nau kan đah đăng ký, pă dŏng tơm dak. Wa Khanh Thị Mào, rmôt kan bah Yên Bái, ân lah:

 ‘Nau ntrŭnh mpeh đăng ký, pă săm ƀŭt dŏng tơm dak geh ntrŭnh ta aơ geh kơp rnoh nŭih lah ăp ntŭk kan geh nau dơi đăng ký pă nau dŏng, dŏng tơm dak, yơn mô ntrŭnh nau ƀư, nau kan đah ăp ntŭk kan. Kơt nê, mô kloh nau dơi bah ăp ntŭk kan ntŭk tât, gâp ân lah ân geh rgâl nkra, ntop nkô̆ nau aơ tĭng nau ntrŭnh mpeh nau dơi bah ntŭk kan ngih dak, tâm nau pă săm ƀŭt an dŏng tơm dak”.

Geh tât nau ntrŭnh ntuh kơl, hun hao ntrong pă dak dŏng, mbơh nau kan tâm nkuăl, wa Cha Ma Lé Thị Thuỷ, rmôt kan bah Ninh Thuận đă, ân geh ntop nau kan dŏng tơm dak, sŏk nau rgop bah ƀon lan, ngăn lah ƀon lan geh ntŭk tơm dak:

 ‘Nau geh bah nglau dak tâm Ninh Thuận ngăn lah jê̆, vay mô tŏng dak tŏ tâm yan vai, yơn lŏ pơk dak tâm yan vai. Cử tri hôm mro kâp rnơm tâm ngih dak ntuh kơl gay ndâk ăp ntŭk pă dak gay ndăn tơm dak tâm yan dak lip gay ma dŏng tâm yan vai. Yơn lah, tĭng gâp nau kan kơl an ân geh nau tâm rgop n’hêl ndrel tâm kơl. Ăp nau ntrŭnh bah Luật tơm dak dŏng (rgâl nkra) knŭng geh nau dơi lah đăp mpăn ƀư bah ăp tơm dak tă bah nau kan kơt: nau ntrŭnh rgum ntuh kơl, mpeh nau kan ndâk, pă ndrel ntop tơm prăk ân năn ndrel tâm di”.

 Ăp ntoh măt kŏ đă ân geh ndâk ntrong kan pháp lý ân nau mât tơm dak dŏng neh dak tâm nau kan mro. Tĭng wa Thạch Phước Bình, rmôt kan bah Trà Vinh, ân ntrơn rgâl nau kan mât tơm dak tĭng nau dơi, rgop nau mât đăp mpăn hun hao văng sa ndrel mât tơm dak. Mbơh tât nau kan ntoh măt ntoh nau tâm rnôk tâm nchră Kruanh n’gâng kan Tài Nguyên ndrel Môi trường Đặng Quốc Khánh, Kruanh n’gâng kan Bộ Tài Nguyên ndrel Môi trường Đặng Quốc Khánh, mbơh:

 ‘Ăp nau pă gưl nau kan tâm Bộ luật nsôih nkah luh, mât nau kan Ngih dak. Rnôk aơ, nau kan  dak aơ geh ăp N’gâng kan, n’ăp ma Tài Nguyên ndrel Môi trường, N’gâng kan mât tơm dak kloh đô thị, Bộ Công tưuơng, N’gâng kan tuch tăm mhâm ƀư mô ân geh tâm ntrŭp ăp nkô̆ nau tâm ăp nau nchrăp Luật kơt njrăng rdâng trôk nar lơh, Luật thuỷ lợi, Luật mât bri, ntŭk săch kan mra lŏ kơp uănh luật khoáng sản, mhâm ƀư gay ăp luật mô tâm ntrŭp ndrel pă gưl pă kan ân tŏng ndrel kloh. Tâm nau nchrăp Luật mra kơp uănh ăp nau kan tâm nê geh nau têm dak, dŏng dak, dŏng khoa học mât mpeh nau pă hoch dak. Rnôk aơ, nơm dôl ma dŏng dak ê geh săk tam, ri ma tâm luật bonh đă dŏng dak ân ueh săk tam ngăn, lŏ kơl an ndâk njêng ntŭk trong hoch dak, prăng bri mô tŏng dak tâm yan vai, geh dak lip tâm yan mih, ri ma nau kan pă, dŏng, mât tơm dak ân geh đăp mpăn lah nau khlay”./.