Đah nau njrăng kan, nâp ndrel ƀư rjăp, ta rơh rbŭn tal 6, Quốc hội ntrŭnh ntruch tay rnôk nchră nau nchrăp Luật neh ntu (rgâl nkra) gay ma mât ân nâp nau tât bah nau kan, đăp mpăn ăp Luật rnôk geh ntrŭnh ân tŏng dơi nau đă bah nau rêh, ngăn lah mô geh nau tâm rkeh, rkăng, ntrŭp đah ăp luật êng. Nau aơ ndơn geh nau kơl an bah ntoh măt Quốc hội. Yơn lah, wa Phạm Văn Hoà, rmôt kan bah n’gor Đồng Tháp ân lah, nau kan ntoch ê geh jong, ê nchră Luật neh ntu mra jêng nau jêr ân ƀon lan:

            ‘Ê geh nchră Luật neh ntu (rgâl nkra) gâp mĭn aơ lah nau khlay. Yơn lah, Luật neh ntu ân geh nchră luh tâm năm aơ mô ah bôk năm tât yơn mô dơi ân ntoch jong ôh. Lah nơm ntoch jong lah nau tih tâm Luật neh ntu kŏ hôm mâp nau jêr, nau ji nuih bah ƀon lan. Ndri ma Luật neh ntu ê geh nchră ri geh du rơh rƀŭn ndal dŭt năm mô lah bôk năm 2024”.

            Tât lôch khay 12/2023, bôk nau nchrăp Luật neh ntu (rgâl nkra) hŏ kơp rjăp geh 232/265 điều. Jêh kơp, hôm 35 rmôt điều, khoản geh ăp ntŭk kan tâm ban nau lŏ rgâl, ntop. Uỷ ban văng sa bah Quốc hội ân lah, ƀư rƀŭn Quốc hội ndal tâm khay 1/2024 đah rnoh nau kan âk, nar ndal, nau mbơh Quốc hội yor ri nchră lah nau ntul rlong.

            Rnôk aơ geh 3 nkô̆ nau lŏ geh mbơh bah Uỷ ban Rnâng kan Quốc hội đă Chính phủ ƀư kloh lơn, geh nau đă ngăn ndrel mbơh nau kan n’hêl: Mpeh nŭih geh dŏng neh ntu bah neh dak đăp mpăn tâm rgop ma nau kan pah kan jan sa, ndâk văng sa, mpeh nau dơi ndrle nau kan bah tahen, công an dŏng neh, đăp mpăn geh nsum ma nau tuch tăm, ndâk văng sa, mpeh nkô̆ nau kan năl rnoh neh ndrel nau dơi dŏng kan.

            Kruanh Quốc hội Vương Đình Huệ mbơh nau nchrăp Luật neh ntu (rgâl nkra) khlay. Ndri ma, nau rgâl, ntop tay nau nchrăp luật aơ hŏ rlau 3 rơh rƀŭn yơn hôm âk nkô̆ nau ân geh nkah. Kruanh Quốc hội đă uănh nau kan ndrel nau ndâk nkra luật. Tâm ăp nkô̆ nau têh, knŭng hôm tâm nchră mpeh 3 nkŏ têh ndrel du đê̆ nkô̆ nau êng. Kơt lah, hĭ geh nau dơi gay ma nchră tât nau mbơh Quốc hội nchră luh nau nchrăp Luật neh ntu (rgâl nkra) tâm rơh rƀŭn tal 5:

            ‘Mô ntruch tay nau nchră Luật neh ntu (rgâl nkra) tay ôh. Yor nau ntrŭnh mrô 18 mbơh kloh ân geh ƀư jêh Luật neh ntu tâm năm aơ. Lah kâp tât rơh rƀŭn tal 7 ri mô knŭng êng 2 luật aơ ôh. Ma rơh rƀŭn tal 7 nchră luh 9 luật. Lah ntop n’ăp ma 2 luật aơ jêng 11 nau nchrăp luật ri hôm âk nkô̆ đŏng”.

            Nchrăp, rơh rƀŭn ndal tal 5 bah Quốc hội gưl XV mra rƀŭn nchră 3 nar, ntơm tâm lơ 15/1/2024 tât aơ uănh ăp nkô̆ nau khlay, ndal gay ma tŏng dơi nau ŭch bah hun hao neh dak, tâm nê geh nau nchrăp Luật neh ntu (rgâl nkra)