Geh nău mât kơl bâh đảng, ngih dak bâh ăp bôk nău kan, nău nchrăp kan, aƀaơ nău rêh ta ƀon căn cứ cách mạng ƀon H’Ngô A, xã Hoà Phong, nkuăl Krông Bông, n’gor Dak Lak geh âk nău ueh mhe đah trong hăn têh hvi, điện sĭt ta ăp rnăk, ngih nti geh ƀư ueh kloh…wa H’Ngan Byă, 70 năm deh rnoi Rđe ta ƀon H’Ngô a an gĭt, aƀaơ rlău ma nău geh bâh tuch tăm, mât rong, wa ta aơ hôm nha geh mât bri jêng lah geh tay prăk nkhôm mât bri. Wa rđil mpeh nău rgâl mhe ta ƀon tơm cách mạng Krông Bông.

 “Nău rêh aƀaơ lĕ rgâl dŭt âk. Ntơm nơh jêr jŏt ngăn, mpôl hên rêh tâm bri, sa ƀăng dơm. Jêr jŏt ngăn. Hôm aƀaơ mpôl hên lĕ tŏng sa, geh piăng sa, ao nsoh. Ngih jay ueh têh, ngih dak kơl an , mât uănh bâh phe sa, dak măm, boh, geh pă an ăp năm Ngih dak way hăn ndrel đah ƀon lan rlet rlău nău jêr jot.

  Hăn ta trong bê tông mhe ƀư bah bôk nău kan Rƀŏng tĭng lam dak ndâk njêng ƀon lan mhe, wa Hlưk, deh năm 1957, ƀon Dơk Dơng, xă Glar, nkuăl Đăk Đoa, n’gor Gia Lai an gĭt, bah năp năm 1975, nău rêh bah kônh wa xă Glar dŭt ach o n’hanh mô geh dah rŏng, yor nău ntŭn mpet, uănh nđôi bah rlăng. Jêh nar neh dak dơi rklaih đăp mpăn lĕ rngôch, kônh wa Bahnar dah rŏng, dơi ƀư tơm nău rêh bah nơm. Ndrel đah nău kơl, nkoch trêng n’hanh ntĭm bah n’gâng kan ƀon lan, nsum mpôl, kônh wa gĭt tăm cà phê, tăm ba. Bah ach o, ji ngot, mô tŏng sa, mô tŏng nsoh, âk rnăk lĕ geh ngih wâl kloh uĕh. Wa Hlưk lah:

 “Rnôk tâm lơh tâm su nău rêh kônh wa dŭt jêr jŏt. n’ăp nău hăn ƀư mir, ŭch hăn ƀư ơm mô lah sĭt la lơn mô dơi đŏng, yor geh nking n’gang, ăp ntil. Hôm aƀaơ neh dak rklaih đăp hôm, dah rŏng jêng nău pah kan jan sa yor săk nơm ƀư tơm hăn pah kan moh mông dơi đŏng. Mpeh ntung trong ri bah năp đaơ lah trong neh dơm, mô geh trong chay kơt aƀaơ, aƀaơ trong chay kloh uĕh, trong hăn ăp thôn ƀon, trong lĕ bê tông hăn nsong dŭt dơh. Dŭt lah uĕh Ngih dak lĕ uănh mĭn ntuh kơl”.

 Bâh rlău 35 năm rdâk njêng n’hanh hun hao, 10 năm ƀư rĭng bôk nău kan nkô̆ mpŏng ngih dak mpeh rdâk njêng nkual ƀon lan mhe, nkuăl Lâm Hà, nkual wăng sa mhe bâh nuĭh Hà Nội ta neh Lâm Đồng aƀaơ lĕ geh dak hun hao lĕ rngôch ta lĕ ăp trong kan. Lah nkuăl tal 5 bâh n’gor Lâm Đồng geh Thủ tướng chính phủ kơp dơn lah nkuăl tâm di nkual ƀon lan mhe lvang năm 2016-2020; n’hanh rơk rnê geh kruanh dak pă an Huân chương lao động hạng pe. Ta năp nău rgâl mhe bâh ntŭk nơm gŭ, bu ranh Kră jan K’Nhang, ta ƀon Đam Pao, xã Đạ Đờn, nkuăl Lâm Hà an gĭt,

 “ Bâh geh nău rgŏ jă, nkah mbơh bâh bu ranh ƀon, kruanh ƀon tâm ban kơt cán bộ ngih dak, ƀon lan hên lĕ n’hao nău mât rbăy văn hoá way ơ bâh mpôl rnoi, ndrel hun hao nsrôih pah kan jan sa gay ma dơi geh piăng sa ao nsoh. Tât tay ƀon lan hên geh n’hao tay nău tâm rnglăp lĕ mpôl rnoi, tâm ntĭm nti pah kan jan sa, mât rong kon său hăn ni, n’hanh ndrel rdâk njêng ƀon lan nơm ăp nar lơ ma hun hao tay lơn”.

 Hôm ta ƀon Ea Mdroh, xă Ea Mdroh, nkuăl Cư Mgar, n’gor Dak Lak, aƀaơ geh 265 rnăk, 1.200 nuĭh, dŭt âk lah nuĭh Êđê. Bah rnôk geh nău ntrŭnh ndâk njêng thôn ƀon mhe, trong hăn tâm ƀon dơi rgâl nkra nâp, bê tông chai têh hvi kơl an nău hăn nsong rdêng ndoh ndơ, n’hanh hăn nsoh dơh. Ndrel đah nĕ, điện ngih dak dơi nthoi tât ăp rnăk nta nơih an gŭ âm n’hanh nkra njêng. Knơm nĕ nău rêh nuĭh ƀon lan nar lơ rgâl, âk rnăk rwăt năm geh âk ndơ rhŏ dŏng gŭ âm n’hanh nkra njêng, hun hao wăng sa. Wa Y Kang Niê Kđăm-Kruanh ƀon Ea Mdroh an saơ.

“Đảng n’hanh ngih dak geh nău uănh mĭn ndâk njêng ngih sam ƀŭt, ngih dak si n’hanh aƀaơ pơk ăp trong hăn têh hvi hăn tât ƀon, trong điện ngih dak dơi ndrăng tât ăp jay. Ăp jay geh điện mpoh ang, kon se dơi hăn nti, bah 5 năm ăp mon dơi nti mẫu giáo. Nău rêh aƀaơ êng kăl e âk ngăn

 Gay ma mât n’hanh n’hao nău way ơm văn hoá rnoi nơm, bar pe jât năm ba năp, nghệ nhân Puih Đup, ta ƀon Blang 3, xã Ia Đêr, nkuăl Ia Grai lĕ tât râng ntĭm nti chĭng gong an roh mom đah nău ŭch lah nău ueh văn hoá bâh rnoi nơm mô geh roh rui. Nghệ nhân Puih Đup gĭt vât nău nteh n’hanh gĭt kra chĭng, blău ăp nău tŭr chĭng. Mô an geh roh ăp nău ơm geh khlăy bâh văn hoá mpôl rnoi, bar pe jât năm ba năp, wa tât râng ntĭm nti tŭr chĭng goh gong an bơi tât 50 mom ndăm tâm ƀon lan.

“Ăp nău mhe ueh bâh nău tŭr tât nău nkra chĭng, mât rbăy mhâm ƀư nĕ lah ăp nău ƀa ƀơ an geh kơt ni bâh ăp nghệ nhân êng kơt lah nuĭh Bahnar. Lôch nĕ lah mô gĭt rĭ mbra dơi geh ôp tay ăp nghệ nhân tâm bon ta nkuăl Ia Grai aơ. Mpôl hên hôm nha geh ntop tay ăp nau nkra chiưng gâr, trah mon rup, ƀư ngih môch, lôch nĕ njôt nău blău bâh nơm sĭt ta ƀon lan, sĭt ta nkuăl, lôch nĕ nti tay an  lĕ rngôch ap nuĭh gĭ vât ndrel gay ma ndâk nsơm, mât rbăy văn hoá way ơm bâh u che he nơm Ŭch bâh gâp nơm lah mbra mô an ăp nău hlay văn hoá ưay ơm bâh ƀon lan nơm geh roh rui.