Đah kônh wa rnoi Bahnar tâm ƀon Klah, xã Kon Chiêng, nkuăl Mang Yang, bu ranh Hip kơt lah “kon sĭm leo bôk”, leo ƀon lan rlet nau jêr, ndâk njêng nau rêh đăp mpăn. Hŏ rlau 75 năm, rlau ma bu êng, bu ranh Hip lah nŭih gĭt kloh nau ntrŭnh tâm di bah Đảng, Ngih dak ân kônh wa rnoi mpôl đê̆, kŏ kơt lah gĭt nau mĭn, nau ŭch bah kônh wa. Ndri ma wa mro rvê mhâm ƀư ân ƀon lan rklaih nau ji ngot, ach o. Mĭn lah ƀư, wa Hip đă kônh wa rgop prăk nsum bah ƀon gay ma kơl an rnăk ach o manh gay hun hao văng sa, nkre ndâk nau kan “ân manh ndrôk, kon ndrôk” Tĭng nê, ăp rnăk geh ndơn du mlâm ndrôk, du mlâm be, rnôk rnôk deh ri nơm mât kon, hôm me păng jao ân rnăk êng rong. Ntơm bah nau kan ueh aơ, âk rnăk hŏ ăp nhoat rklaih ach o. Wa Hip mĭn, hôm rêh nơm hôm kơl an ăp nŭih tĭng nau wa Hồ:

            “Djăt nau Đảng, Wa Hồ, moh nau ueh ân ƀon lan ri nơm ƀư nau nê.

 Mô lah moh ndơ ueh ân nơm kơt ri nơm kơt tĭng ân ƀon lan. Ân geh nkoch trêng, mhâm ƀư ân nkoch trêng, mhâm ƀư ân kônh wa nơm saơ mô geh nau kan ƀư ri ma lŏ geh ndơ sa, nơm ân oah kan, blau kơt tĭng nau mhe, nau ueh ri mơ rklaih ach o. Gâp nkoch trêng ân kônh wa kơt nê”.

Rnôk mhe gŭ êng, rnăk nô Bzyich lah rnăk ach o ngăn tâm ƀon Klah, xã Kon Chiêng, nkuăl Mang Yang, geh bu ranh Híp kơl an. Bu rang rƀŭn ƀon, tâm ban kơl an ân rnăk nô Bzyich manh prăk bah ƀon nơm gay ma rvăt ndrôk rong ân deh kon. Lah nŭih geh nau blau, bu ranh Hip tât ntĭm mbơh ân nô mât chăm mir nơm ân geh tay prăk. Knŭng đê̆ năm, nau văng sa bah rnăk nô Bzyich lơn ma geh ngăn.

            ‘Rnơm bu ranh ƀon, rnơm n’hâm soan dak rhal bah lĕ ma ƀon hŏ kơl an gâp manh rnoh prăk 10 rkeh gay ma ndâk nau kan mât rong, rong ndrôk, hun hao nau mât rong ntơm 4, 5 năm ma aơ hŏ jêng đăp mpăn. Dăch tât gâp mra nsôih lơn tay gay ma hun hao tơm jŏ năm, tâm rgop nsum ma nau mât rong”.

            Đah nau mĭn, hun hao văng sa ân geh nsum ma nau mât nau ơm yau bah rnoi nơm, bu ranh Hip hŏ geh âk nau nsôih ndrel dŏng âk mông nar gay ma ntĭm nti nau tur chĭng ân bu mom tâm ƀon. Bah ăp nau ntĭm nti, nau nkoch, bu ranh Hip ŭch rmôt druh ndăm tâm ƀon mra geh nau blau mât, hun hao nau ueh ơm bah rnoi nơm:

            ‘Rnôk aơ gâp ranh hôm, knŭng ŭch ƀon lan nơm mât âk nau ueh bah mbŏ nô nơm, moh nau ueh ri nơm ƀư, nau mô mhik nơm der. Tâm ƀon ri mô dơi tâm nkhah rnoi oh, nơm ân tâm rnglăp, tâm mbơh gay ndrel hun hao. Rnôk aơ ri ƀon geh âk ngih têh, ueh, phung kon se ăp nŭih geh hăn nti, gâp rhơn ngăn”.

            Nau ngơi ueh geh nsum ma nau kan, bu ranh Hip lah du Đảng viên mro geh kônh wa ŭch rŏng. Mô êng kơt nê, bu ranh hôm geh ăp gưl, n’gâng kan rnê ryơk. Wa Đinh Y Rươm, Kruanh Uỷ ban MTTQ Việt Nam xã Kon Chiêng, nkuăl Mang Yang, mbơh: Bu ranh Hip lah nŭih geh nau kan ueh, geh bu rnơm ndrel nau kan rjăp, lah du hê cán bộ gơih nau kan, lah n’gâng tơm bah nau tâm rnglăp:

            ‘Wa mro nkoch trêng ân kônh wa mô geh tĭng nau prêh nau ngai ôh, ma dŭt n’hâm tâm dăch dơh ma kônh wa, ăp kônh wa hôm âk nau jêr ri păng ntĭm mbơh. Ƀon lan rnơm ngăn păng. Gâp saơ ân geh kơt tĭng păng âk ngăn, rnơm păng ma lŏ geh ueh nau kan nkoch trêng, mbơh kơl an hên tâm nau kơl an kônh wa, ƀon lan nar lơn ma hun hao”.

            75 năm deh, rlau 30 năm Đảng, bu ranh Hip mro ntoh nuih n’hâm kơl an nau leo trong lor, sŏk nau kơl an ƀon lan ƀư nau ueh răm. Kônh wa rnoi Bahnar ta aơ ăp nŭih kŏ ŭch nkoch nau lah ueh ma bu ranh Hip, nŭih hŏ nkoch trêng n’gâng ŭnh leo trong ân nau hun hao văng sa, ntrŭt jăng nau rluk mâl, kơl an ƀon lan geh nau rêh hơm răm./.