Ta nâm nău rđău kan bah Đảng, nău lăp kan lam lĕ rngôch trong kan chính trị, rmôt bu ranh ƀon, Nuĭh geh nsing nơm nkual rnoi mpôl đê̆ hŏ rgop khlay tâm n’gâng kan Tâm rnglăp lam rnoi nuĭh.

         Rlău 70 năm deh, yơn bu ranh ƀon Ma An, buôn Trí A, xã Krông Na, nkuâl Buôn Đôn, n’gor Dak Lak hôm ngăch ngăr, rah rơch đah săk ntô kruanh tâm ban kơt tơm ndru yău nklang bri têh Tây Nguyên.  Năm 2002, Tây Nguyên jêng du ntŭk duh chính trị đah nău hao jêng bah du mpôl rlơn lơh tay neh dak, wa Ma An jêng ntŭk nsing nuih n’hâm bah nuĭh ƀon lan. Du njăr trong jong, grêt dêh đah rnăk wâl, păng nkoch trêng, rgŏ jă ntĭm nti kônh wa năl kloh muh măt ngăn bah ăp mpôl rlơn lơh neh dak gay nuĭh ƀon lan n’hao âk nuih n’hâm njrăng, mô djăt tĭng nău mpôl mhĭk djơh mplư rlăm:

        He gŭ ta aơ lơi dĭng djăt, he way rƀah gĭt nâp nău rđău đă bah đảng, trong kơl bah ngih dak, way krêp dêh đah gung trong bah Đảng gay mhâm ƀư uĕh an nuĭh ƀon lan ntŭk he.

        Rnôk duh hô hŏ đăp mpăn, bu ranh ƀon, nuĭh geh nsing nơm lah nuĭh tĭng leo lor tĭng ƀư jăp trong nchrăp, gung trong bah Đảng, pháp luật bah Ngih dak. 54 năm dâk tâm rmôt bah Đảng, wa Y Thương K’Măn ta xã Bông KRang, nkuâl Lắk, n’gor Dak Lak way râng ăp rơh sinh hoạt nsum mpôl ta ƀon lan, rgŏ jă ƀon lan ăp rnoi nuĭh tĭng jăp trong kơl, pháp luật bah Ngih dak, nsrôih rdâk njêng tâm rnglăp lam rnoi nuĭh. Wa Y Thương an gĭt, bol neh dak nar lơn ma hun hao yơn nău rêh bah ƀon lan ăp rnoi mpôl đê̆ nha hôm âk jêr jŏt, ăp bu êh rkeh hôm nde tâm nău dja gay nsŭk nsôr têk klônh kônh wa lơh chrai nău dơi cách mạng đŏng. Jêng ăp đảng viên kơt păng ân way lah n’gâng tơm, lah ntŭk nsing khlay gay ƀon lan djăt tĭng he:

         Đảng n’hanh Nhih dak dŭt uănh khlay tât nău rêh ƀon lan rnoi mpôl đê̆ dŭt âk ntil, bôk năp lah điện ăp rnăk hŏ geh da dê, tâl bar lah hăn but săm ji lah mô roh prăk. Ăp ntil nău nê lah nău  mât uănh khlay bah Đảng, trong kơl bah Ngih dak hŏ uănh khlay tât kônh wa ƀon lan rnoi mpôl đê̆.

        Ma nău nsing nơm bah he, âk bu ranh ƀon hôm rgŏ jă ƀon lan nkre đah hun hao pâl nđaih nsum mpôl đah mât ndray săk tơm văn hóa. Tĭng bu ranh Y Nuel Niê, buôn Akô Dhong, nkual ƀon têh Buôn Ma Thuột, n’gor Dak Lak, nău dja nkre kơl kônh wa hôm geh tay nău dêh rŏng, uănh khlay rup uĕh văn hóa way ơm bah rnoi nuĭh, nkre kơl khân păng ntop geh tay tơm wăng sa an nău rêh đăp mpăn, nâp  dăng:

Mât ndray văn hóa way ơm mbra jêng luh ăp rnoh tơm wăng sa gay ntuh kơl an kon său kơt nti tâm ban kơt nta joi geh nău kan an oh kon tâm ƀon lan. Rdâk tay, nkoch n’hơ văn hoá nuĭh Rđe he mô dơn an năch tâm dak ma hôm dak bah dih đŏng. Hun hao săk tơm văn hoá hăn ndrel đah pâl nđaih gay geh tơm wăng sa an ƀon lan.

        Tây Nguyên aƀaơ geh rlău 3.700 bu ranh ƀon, nuĭh geh nsing nơm, khân păng mô dơn lah ăp nuĭh ntĭt văn hoá nklang ƀon an ma hôm lah laih ti nthoi jong bah n’gâng kan tâm nkoch trêng trong kơl, pháp luật, hăn lor bôk năp tâm trong tĭng ƀư ăp trong nchrăp, rgop đăp mpăn nău rêh, rnă njrăng tâm ƀon lan./.