Tổng thư ký Quốc hội, Kruanh Văn phòng Quốc hội Bùi Văn Cường, mbơh: Năm 2024, Uỷ ban Râng kan Quốc hội rgum nchrăp ndrel ƀư tơm ăp rơh rƀŭn Quốc hội; Nau kan ndâk pháp luật; nau kan mêt uănh, ntrŭnh ƀư bah ăp nau kan khlay, nau kan tâm nchră ma dak ba dih ndrel tâm boh đah lam ntur neh. Nau kan ƀon lan ŭch êng, ntĭm mbơh nau kan bah ntoh măt Quốc hội, rmôt kan ntoh măt Quốc hội ndrel đăp mpăn nau dơi kan bah ntoh măt Quốc hội, ntĭm mbơh nau kan bah HĐND ndrel ƀư ăp rơh rƀŭn bah Uỷ ban Rnâng kan Quốc hội tâm năm 2024.

            Ăp nau rgop ntoh nau tâm ban ngăn tâm nau n’hao nau kan, nau ƀư rjăp tâm nau ƀư Bôk nau kan, ngăn lah ƀư rjăp nau mhal, nau kan, đă ăp ntŭk kan geh tât gay ƀư ân tŏng, nchrăp ăp hồ sơ, săm ƀŭt, nau kan, gay Hội đồng dân tộc, ăp uỷ ban Quốc hội năl ndrel ăp nŭih kan bah Uỷ ban Rnâng kan Quốc hội geh nau dơi mĭn ân rjăp, rgop nau n’hao nau nâp bah rơh rƀŭn...

            Kruanh Quốc hội Vương Đình Huệ ân lah, nau ntrơn rgâl Bôk nau kan năm 2023 lah nau ngăn, yor nau nchrăp ndrel ƀư êng êng. Yơn lah, Kruanh Quốc hội tâm ban nau rgop bah ăp Uỷ viên Uỷ ban Rnâng kan lah ntrơn rgâl âk ir, nau aơ ân geh rhuăt đŏng:

            ‘Mô lah ăp khay dơm, ê nkoch ôh lah ăp năm mô lah ăp khay, rnôk hŏ leo lăp yơn tâm rnôk rƀŭn lŏ rhuăt luh, leo lăp. Nau aơ lah nau kan bah ăp tơm, ăp uỷ ban, rhuăt nau gay ma tâm rgop đah ăp ntŭk kan bah Chính phủ. Jêh aơ ngăn lah ân geh uănh tay tĭng ăp khay lah dŭm âk nau kan ndrel ân geh ntrơn rgâl ri moh ntŭk ƀư ndơn nau nê. Dăch ngăn ngên mơ rgâl ri lŏ ntrơn rgâl bôk nau kan. Mhe nơh, Quốc hội bu ƀư rjăp nau ăp. Gâp đă lah năm 2024 ƀư rjăp nau aơ, gay jao nau kan bah ăp nŭih, ntŭk kan geh tât hŏ ƀư mbrơi, ân geh nsôih ngăn ntŭk aơ”.

            Rgop nau tâm nau mbơh nau kan ƀon lan ŭch êng bah Quốc hội tâm khay 10 ndrel khay 11 năm aơ, Uỷ ban Rnâng kan Quốc hội ân lah, cử tri ân geh kơl an kơt nau kan mih dak lip tâm nkuăl miền Trung, rnoh xăng, rnoh điện, nau jêr bah ăp ntŭk kan bol ma hŏ geh ndâk yơn nau rêh bah ƀon lan tâm âk nkual hôm jêr, ngăn lah rnăk mô geh âk prăk, ăp nkuăl jêr ngăn ngên...Groi Kruanh Quốc hội Trần Quang Phương lah rjăp nkô̆ nau êp aơ nŭih ƀon lan rvê ndrel ji nuih kơt nau phung tih dôih, tâm nê geh âk nau ntŭng ndơ khuch. Nkoch tât nau rvê aơ, Kruanh n’gâng kan Công an Trần Quốc Tỏ mbơh:

            ‘Du đê̆ ăp nau ntŭnh geh tâm rnôk rlau aơ lah geh ngăn ndrel ƀon lan kŏ mpơl nau rvê. Ăp nau ƀư aơ geh ri phung hên đăp mpăn nau ngăch, năn gay ma joi năl ndrel rklaih mhal phung tih aơ ndal ngăn rjăp, nau ntrŭnh aơ lah nau đă. Yơn bah nau mêt uănh ri ân saơ lah tâm êp aơ Tết tâm rơh dŭt năm nau kan bah phung tih dôih hao âk tĭng nau vay. Tal bar đŏng, du đê̆ nŭih ngăn lah mơng dŏng ma tuý, geh nau mơng su âk. Tal pe, kŏ lah nkô̆ ma ăp nŭih geh bu lơh khuch bah nơm kŏ ƀư mô rjăp mpeh ntrong kan, nau ntrŭnh mpeh nau dơi nkah, mbơh ndrel nchrăp tâm rgop gay ma njrăng, rdâng nau aơ ri hên hŏ tâm rgop ma nkuăl đah rmôt kan tâm nê, ngăn lah ăp nŭih geh nau khuch gay ma ƀư kloh nau nkoch trêng, njrăng rdâng”.

            Uỷ ban Rnâng kan Quốc hội đă Chính phủ ơm rđau ăp N’gâng kan, ntŭk kan geh tât ndrel ăp nkuăl bah năp măt ơm geh nau rklaih ăp ntŭk rluh mô lah ntrơn leo lơi ăp rnăk lih bah nkuăl geh nau jêr gay ma đăp mpăn nau rêh ndrel tuch tăm. N’gâng kan Lao động, Thương binh ndrel Xã hội rklaih, đăp mpăn nau dơi ân ăp nŭih công nhân geh nau ji tât nau kan. N’gâng kan công thương geh ntrong kan mât nau kan tăch rgâl online gay đăp mpăn nau dơi ân nŭih dŏng,N’gâng kan công an n’hao ăp ntrong kan đăp mpăn, rnăk njrăng ƀon kan, ngăn lah tâm rnôk Tết Dương lịch ndrel Tết Nguyên đán dăch tât./.