Ăp năm bah năp, nău rêh nkual rnoi mpôl đêt ta Bình Thuận dŭt n’hâm jêr jŏt, nău ƀư sa hôm e rlŭk mâl, mô dơi tâm di nău ŭch hun hao bah nău rêh. Ntop tâm nĕ, trong kan nchrăp rnăk wâl deh kon đêt mô hŏ dơi uănh tât, uănh khlay, âk rnăk wâl geh bah 5 tât 8 nuĭh kon đê̆ đŏng 10 kon lah geh đŏng. Bah năp đaơ, dơi joi rnăk deh kon bah 3 let bah dâng dŭt jêr. Nău rêh âk kon n’hanh mbak jâk joi nău rêh lĕ jêng plơ̆ sĭt plơ̆ hăn. Lah kơt bu ur rnoi mpôl đêt ta ăp nkual prêh tăch săk an mir ba ri bu ur rnoi mpôl đêt dôl gŭ rêh ta nkual rđŭng an rgum tâm lŏ.

Ta xă  Đông Giang, nkuăl Thuận Bắc, yuh K’Thị Thủy, rnoi nuĭh K’ho bah năp đaơ rnăk wâl tâm rnăk ach o. Knơm Ngân hàng Chính sách xã hội an manh 50 rkeh prăk tĭng bôk nău kan hun hao wăng sa-rêh jêng nkual rnoi mpôl đêt, yuh ntuh kơl tăm tơm điều n’hanh tơm bum jêng ăp năm geh rlău 100 rkeh prăk. Jêh 3 năm ntêm nkrem, tât aƀaơ rnăk yuh lĕ rklaih luh ach o n’hanh dơi ndâk ƀư jay têh uĕh, ndâk njêng rnăk wâl rgâl hao, uĕh lăng. Yuh K’Thị Thủy lah du hê ntoh ang an mpôl bu ur nti, ƀư tĭng. Yuh K’Thị Thủy an gĭt:

Ăp gưl hội nta an oh yuh bu ur he manh prăk. Tă bah nău manh prăk nĕ oh yuh lĕ dŏng an nkra njêng, hun hao wăng sa rnăk wâl kơt mât ndrôk, mât sŭr, mât djăr. Geh âk yuh ƀư ntŭk tăch ndơ jêt gay hun hao wăng sa rnăk wâl.

Dơi nău uănh tât bah Đảng n’hanh Ngih dak bah ăp nău kơl nău rêh nuĭh ƀon lan ta ăp xă nkual prêh, nkual yôk, nkual rnoi mpôl đêt ta Bình Thuận lĕ geh trong hun hao dăng. Khân pơng mô knŭng mât ƀư tơm bah nơm mô knŭng tâm nău deh kon, ma hôm tâm trong kan jŭt n’hŭch ach o. Đah âk ntrong leo ma ăp gưl, hội n’gluh an ăp oh yuh dŭt n’hâm râng n’hanh nsĭt tay săk rnglăy âk.

Ngoăy tâm âk nău ƀư dơi uănh lah nsôch tơm bah ăp gưl hội bu ur n’gor Bình Thuận đah ăp xă nkual prêh, nkual rnoi mpôl đêt ta ntŭk tâm năm bah lah nău ndâk njêng ăp ntrong kan bu ur hun hao wăng sa. Săk rnglăy bah ntrong kan lĕ kơl rmôt kan bu ur rklaih luh ach o, hao ƀư ndrŏng. Wa Bùi Thị Thịnh, Groi Kruanh Hội liên hiệp Bu ur nkuăl Tánh Linh, n’gor Bình Thuận an gĭt, nuĭh bu ur ƀư tơm khlay tâm nău ndâk njêng nău rêh rnăk wâl. Gay dơi geh nău ngơi nsum, joi cán bộ ban chấp hành ta ăp chi, rmôt kan ngăn ngên ngăch prăl, djăt nău rgop bah tĭng nuĭh tâm chi hội jêh nĕ n’gluh an tâm nchră ta ăp nar rgum rƀŭn nsum:

Hội liên hiệp bu ur nkuăl lĕ uănh mĭn dŭt n’hâm tât ăp nău ƀư ntrong leo bah hội viên lah bu ur rnoi mpôl đêt, an êng ăp nău kan an bu ur rnoi mpôl đêt. Ntĭt nsa, mpôl hên uănh mĭn ntop kơl mpeh gŭ âm, mpôl hên tât râng ăp nar rgum rƀŭn bah ăp chi hội gay kơl an oh yuh geh nău wât mpeh ăp ntil tâm nău rêh, nti n’hanh pah kan n’hanh hun hao wăng sa rnăk wâl.

Ăp năm, Hội liên hiệp bu ur n’gor Bình Thuận lĕ ntĭm rđău ăp gưl hội ƀư hăn uănh nău ŭch, nău rêh bah hội viên ngăn lah hội viên nuĭh rnoi mpôl đêt mpeh hun hao wăng sa rnăk wâl, uănh lah tĭng gưl hội viên, rnăk wâl ach o, mĭn joi gĭt nkô̆ nău gay geh âk trong mkra ntop kơl tâm di. Tâm ăp năm bah năp, Hội lĕ nsrôih mĭn joi ăp ntrong kan nkra njêng mhe, ăp trong hăn tâm di đah nău geh wăng sa ta ntŭk n’hanh dơi râng bah ăp hội viên. Tă bah nĕ, ntrôl dăng trong kan nkoch trêng, rgŏ jă hội viên bu ur ăp nkual rnoi mpôl đêt n’hao nuih n’hâm, ntơm rlet rlău jêr jŏt, nsrôih râng ntrong leo “bu urr ƀư wăng sa blău”, “Bu ur tâm kơl hun hao wăng sa”, bu ur nsrôih nti, mĭn ƀư mhe, ndâk njêng rnăk wâl uĕh lăng”. Wa Nguyễn Thị Ánh Nguyệt, Groi Kruanh hội liên hiệp Bu ur n’gor Bình Thuận an gĭt:

Mpôl hên uănh khlay dăp uănh lĕ rngôch, nâp nâl ƀư hun hao hội viên, n’hao uĕh n’gâng tơm bah ăp ntrong leo ta ăp nkual gay đăp mpăn trong ƀư ta ntŭk “ntŭk geh bu ur ri ntŭk nĕ geh nău ƀư hội”. Rlău ma nĕ, ăp gưl hội mpôl hên tâm rgop ăp ntil trong tâm nđŭr ndâk njêng oh nô đah ăp xă n’hanh nkual rnoi mpôl đêt.

Tĭng Hội Liên hiệp bu ur n’gor Bình Thuận, đah nău ƀư tơm lah ngih pah kan ƀĭt joet mbơh ƀư “Ƀư tĭng tâm ban bu ur bu klô n’hanh mkra ăp nău khlay đah bu ur n’hanh kon se” ta ntŭk, Hội LHPN n’gor lĕ tâm rgop Ban Dân tộc n’gor, ăp n’gâng kan, nău kan tâm ôp tâm nchră UBND n’gor an Trong nchrăp lvang mbơh ƀư tât ăp ngih pah kan, ntŭk kan n’hanh ƀon lan. Nău nchrăp ƀư tĭng ta 20 thôn/12 xă ta 4 nkuăl nkual yôk lah Tánh Linh, Bắc Bình, Hàm Thuận Bắc n’hanh Hàm Thuận Nam. Rgum tâm 4 nkô̆ nău lah nkoch trêng, rgŏ jă rgâl “nău mĭn, trong ƀư”; ndâk njêng n’hanh pơk hvi ăp ntrong kan n’hao dơi wăng sa an bu ur; đăp mpăn nău ngơi n’hanh tât râng ngăn ngên bah bu ur, kon se tâm ăp nău ƀư hun hao wăng sa-rêh jêng; n’hao soan ƀư tâm ndôp ăp cán bộ tâm trong chính trị, bu ranh ƀon, kruanh thôn, chức sắc tôn giáo n’hanh Nuĭh nsing nơm.