Bôk khay 3 mhe rlau Đảng bộ, n’gâng kan ndrel ƀon lan xã Yaly, nkuăl Sa Thầy ndơn nau ntrŭnh bah UBND n’gor Kon Tum kơp dơn xã Yaly geh tŏng nau dơi ƀon lan mhe. Wa A Thoải, Bí thư Chi bộ nkre Kruanh thôn Chứ, xã Yaly ŭch ngăn bah nau aơ. Yor âk năm rlau aơ, wa hăn leo lor rmôt chi bộ, ntĭm mbơh, bonh đă 262 rnăk thôn Chứ rgâl nau mĭn, nau kan nkre hun hao văng sa, nkre nsôih râng nau kan nsum bah ƀon lan, rgop n’hâm ndâk njêng ƀon lan mhe. Wa A Thoải mbơh, tâm nau bonh đă ƀon lan, ŭch ngăn nau nsôih, nau gĭt:

 ‘Rnôk bôk năp âk nŭih mô gĭt, jêh ri klach geh nau roh hoach jêh ri kŏ geh nau blau nau mĭn tât nau dơi geh nsum. Ăp đảng viên tâm chi bộ kŏ nsôih nkoch trêng, bonh đă ƀon lan janh leo dŏng ăp nau kan mhe tâm nau kan tich tăm ndrle kơl an nau hăn nti bah kon nơm”.

Jêh 12 năm nsôih ƀư đah nau ndâk njêng ƀon lan mhe, xã Ua Ly, nkuăl Sa Thầy rgum geh rlau 30 rmen nkra trong ƀon lan, nkra trong dak mương, nkra ngih săm ƀŭt, ntĭm nti ndrel kơl an ƀon lan hun hao tuch tăm. Ndrel ma nê, tâm 3 ƀon rnoi mpôl đê̆: Chứ, Tum ndrel Chờ rnôk aơ mô hôm ngih truh sat. Rnoh rnăk ach o bah xã huch tâm dâng 8%, nau geh du hê bôk nŭih rlau 42 rkeh prăk. Bí thư Đảng uỷ xã Yaly Phan Chí Thiện lah rjăp, gay njêng nau mhe tâm nau ndâk njêng ƀon lan mhe, ân geh nau leo trong lor bah Bí thư chi bộ 3 ƀon rnoi mpôl đê̆, ma ntoh ngăn kơt Bí thư chi bộ ƀon Chứ, Wa A Thoải:

‘Tâm nau ndâk njêng ƀon lan mhe kŏ kơt lah ăp nau kan bah xã ri đồng chí A Thoải  ntrŭnh âk nau kan rjăp ngăn. Đồng chí A Thoải rđau ăp rnăk geh ndung ndrôk mô kloh ri leo ntrơn ndâk ntŭk êng. Bonh đă, nkoch trêng du đê̆ rnăk ƀon lan pă êng neh gay nkra trong ƀon lan mhe. Jêh ri ndrel ma Chi bôk tăm kao, răk ndrih-kloh-ueh”.

Nau ngăn ân saơ, rmôt Bí thư chi bộ tâm ăp thôn, ƀon rnoi mpôl đê̆ n’gor Kon Tum geh nau dơi khlay ngăn tâm nau ndâk njêng Đảng ndrel nau kan hun hao văng sa, rêh jêng tâm dâng. Nua aơ lơn ma geh ƀư rjăp nau ntrŭnh du nâp nau dơi bah Bí thư nkre Kruanh ƀon, tât rnôk aơ n’gor Kon Tum hŏ geh 410/756 Bí thư ƀư nkre Kruanh ƀon, kruanh Tổ dân phố. Bí thư Chi bộ A Sao, kruanh ƀon Kon Teo Đăk Lấp, xã Đăk Long, nkual Đăk Hà mbơh, nau kan âk lơn yơn nơih tâm nau rđau, ƀư nau kan bah thôn, Tă bahnau leo trong ndrel rđau bah A Sao, 230 rnăk ƀon lan, đah1.200 nŭih rnoi Xơ đăng tâm thôn Kon Teo Đăk Lấp tâm ăp năm êp aơ hŏ ntrơn neh tăm bun, mbo, ba mir gay tăm cà phê, cao su ndrel tơm sa play:

‘Nau kan bah nŭih dâk bôk tâm thôn hên nsôih bonh đă ƀon lan geh mir ndăn nau mât rong, tăm tơm sa play. Nơm ân geh ƀư ân dơi ri mơ ƀon lan kơt tĭng. Ƀư ân kônh wa saơ, tĭng dơi rgop nau ân ƀon lan nơm geh dơi văn hoá, ăp nhoat geh dơi rklaih ach o nâp nâl”.

 Gay ƀư ueh dơi nau kan bah rmôt Bí thư chi bộ tâm ăp thôn, ƀon rnoi mpôl đê̆ tâm nau ndâk njêng ƀon lan mhe, ăp Đảng bộ tâm dâng bah n’gor Kon Tum mro ƀư nau kơl an nau ntĭm nti ndrel mbơh nau mhe gay rmôt Bí thư chi bộ mât nâp nau ntrŭnh, nkre kŏ tŏng nau dơi ntĭm mbơh, kuăn ty ntĭm nau kan ân ƀon lan tâm nau kan tuch tăm. Wa Trần Ngọc Trực, Bí thư Đảng uỷ xã Đăk Long, nkuăl Sa Thầy mbơh, nau kan ma Rnâng kan Đảng uỷ xã ƀư gay ueh nau kan bah 5 Bí thư chi bộ thôn rnoi mpôl đê̆ tâm nau ndâk njêng ndrel pơk hvi nau kan hun hao văng sa, rnăk vâl:

‘Bah nau kan rđau, đă, Đảng uỷ ƀư ăp rơh ân ăp đồng chí Bí thư chi bộ tât mbơh, kơt tĭng ăp nau kan ueh. Tât rnôk aơ, ntrŭnh geh 5 nau kan hun hao văng sa n’hao prêh nau săk geh đah nŭih rnoi mpôl đê̆. Rnoh rnăk ach o huch âk rđil ăp năm bah năp. Rnăk vâl ri kŏ geh hun hao âk”.

 Tât rnôk aơ, n’gor Kon Tum hŏ geh 44 xã geh kơp dơn tŏng dơi ƀon lan mhe, tâm nê geh 4 xã geh dơi ƀon lan mhe n’hao prêh geh kơp dơn ndrel du xã geh tŏng dơi ƀon lan tĭng nau mhe. Bol ma ăp thôn, ƀon rnoi mpôl đê̆ tâm n’gor Kon Tum ngăn lah tâm nkuăl jru, nkuăl ngai, yơn tât rnôk aơ kŏ geh 45 thôn, ƀon geh tŏng nau dơi ƀon lan mhe. Gay ndâk njêng ƀon lan mhe tâm nkuăl rnoi mpôl đê̆ tâm n’gor geh âk nau mhe, nau rêh ndrel nau kan tuch tăm bah ƀon lan, ntrơn rgâl ueh ngăn mro geh nŭih leo trong lor nê lah Bí thư chi bộ tâm ăp thôn, ƀon./.