Lôch 20 năm bah năp, wa Đặng Thị Dẩn lah ngoai tâm ăp rnăkbôk năp hăn gŭ tâm nkuăl neh Nậm Sò tĭng nau ntrŭnh ntrơn gŭ tât nkuăl n’har bri. Nar nê nơh, ntŭk aơ lah neh krŏng, trong hăn mô geh, neh tăm mô tŏng. Nau rluk mâl ơm, nau vay mô tâm di ƀư nau ji ngot, ach o mro tât đah ăp rnăk rnoi Mông, Dao. Mô rvê nau jêr, đah nau ƀư Kruanh thôn wa Dẩn nsôih ƀư nau kan rgâl mhe gay ƀư rgâl nau mĭn bah ƀon lan. Wa Dẩn nkah:

‘Bôk năp kônh wa ta aơ bu ŭch deh âk kon, kônh wa lah ngih geh âk kon mơ ueh, yơn rnôk geh nkoch trêng ndrel saơ neh ntu mô âk rnôk ma ngih dak pă tŏng, đăp mpăn ri kônh wa knŭng dơi deh 1-2 kon dơm. Mpeh nau njŭn sông ti kônh wa mô dơi sŏk drăp âk, ân kon gŭ ur, gŭ sai ri ân tât 18 năm mơ ndrel ƀư ueh tĭng pháp luật bah ngih dak”.

Rnôk nŭih ƀon lan jut n’huch lơi nau rluk mâl, ntơm “gŭ đăp mpăn”, wa Dẩn hŏ hăn lôch ntŭk gay leo nau kan ueh, tơm tăm mhe tât đah Nậm Sò. Bu ur đảng viên aơ hŏ bonh đă ƀon lan leo tơm prit nkŏ, tơm quế, tơm prit gay ma tăm, jêh nê lŏ rong ndrôk, rpu, tui ka. Nkoch tât nau dơi jêh 10 năm nsôih ƀư hun hao văng sa đah nau kơl an bah bu ur kruanh ƀon Đặng Thị Dẩn, wa Tần Thị Tích, nŭih thôn Nậm Sò, xã Bản Phiệt, nkuăl Bảo Thắng, n’gor Lào Cai, ngơi:

            ‘Jêr jŏt ri yuh Dẩn ntĭm ân nơm pah kan. Đă tăm tơm si, tăm quế, tăm prit nkŏ geh tăch sŏk prăk, jêh ri rnăk vâl hên geh oi đê̆ đŏng. Kăl e nơh mhe tât gŭ ri rêh jêr jŏt ngăn”.

Jêh 20 năm khai hoang, Nâm Sò rnôk aơ hŏ geh nau rgâl mhe ăp nar ngăn. Ăp ngih prêh dăp hŏ geh ndâk tâm nâm tơm si ndrih ueh, ăp trong bê tông kloh, nau rêh mhe dôl geh tâm nkuăl n’har bri aơ hŏ geh nau rgop âk ngăn bah ăp đảng viên leo trong lor kơt wa Dẩn.       

64 năm rêh, 23 năm lăp đảng, ăp nau nsôih bah bu ur đảng viên rnoi Dao Đặng Thị Dẩn hŏ ntop tay n’hâm, nau rnơm ân kônh wa tâm thôn nkuăl n’har bri. Djăt tĭng nau Đảng, Wa Hồ, ăp nŭih ƀon lan Nậm Sò hŏ ndrel dôl nsôih ndâk nkra trong đăp mpăn, nâp nâl ndrel hun hap. Đảng viên Đặng Thị Dẩn, ngơi:

‘Ăp nau nơm kŏ leo trong lor, nơm ngơi ndrel ma ƀư nkre. Mô dơi ƀư ri mô dơi ngơi. Ngơi tâm di ri mơ djăt. Ƀon lan kơt tĭng ueh nê lah nau nsôih ân gâp pah kan mô blau jâk rgănh. Dâk ntŭk prêh nơm uănh jêr mơ saơ kơt lah du nkuăl ƀon têh kon jê̆ tâm nkuăl neh rđŭng aơ. Ƀon lan tâm rnglăp, gâp mra geh nau nsôih lơn”.

 Nau nsôih gah njêng săk nơm jêng ntŭk ang tâm nau hun hao văng sa bah Nậm Sò nar aơ la ăp nau tă geh rnơm ăp nau nsôih mô rlu, mô rgănh, dĭng lĕ nê yor ƀon lan bah Đảng viên rnoi Dao, Đặng Thị Dẩn./.