Ur sai yuh Lâm Thị Ngọc Hoa, rnăk ach o rnoi Khmer ta ấp Xẻo Cóc, xã Lai Hòa, nkual ƀon têh Cần Thơ, mhe aơ dơi uănh năl ntop kơl ntrong kan mât rong bê kơt du "kônh kơl nău rêh", pơk luh nău dơi hun hao đăp mpăn nău rêh. Yuh Lâm Thị Ngọc Hoa an gĭt: "Uănh lah uĕh mô lĕ đŏng, năm aơ dơi ntop kơl bar mblâm bê ntil. Aƀaơ nsrôih mât chăm gay jêh aơ tay hao rnoh âk, geh wăng sa đăp mpăn, ntêm nkrem ƀư jay. Aƀaơ, gâp hăn koh pih ăp nar, hôm sai gâp hăn mât ndrôk an bu, rnôk gŭ ta jay ri kơl mât bê.

 Wa Diệp Phước Nghĩa, phường Mỹ Xuyên, knơm dơi manh tơm prăk kơl an 50 rkeh prăk bah 2 tơ̆ manh, lĕ ntuh kơl tăm kao ta rnoh neh 4 công neh. Wa hôm ntuh kơl trong tŏ dak mpêt nkrem, kơt dŏng khoa học kỹ thuật n'hanh cơ giới hóa tâm nău kan tuch tăm, jêng nău geh rlău 50 rkeh prăk ăp năm. Bah nău ntop kơl bah Ngih dak ndrel nău nsrôih nsan hao êng, wa lĕ ƀư jay têh uĕh n'hanh lĕ rklaih luh ach o tâm năm 2024:

"Aƀaơ tăm mbo mô hôm hoach âk nŭh kan rnôk dŏng trong tŏ ntruh, dŏng mô-tơ bơm tŏ, mpêt nkrem dơi âk prăk dŏng kan. Rlău ma nĕ, trong hăn dơi ƀư tât ta mir jêng nuĭh rwăt lăp rvăt dơh. Kônh wa geh neh dăch nsum kŏ rgŏ jă ndrel mât chăm gay ma geh âk play.

Nkual ƀon têh Cần Thơ lôch nglăp nsum geh nklăp 495.000 nuĭh rnoi mpôl đê̆, tâm nê dŭt âk lah nuĭh Khmer đah rlău 411.000 nuĭh. Tâm năm rlău aơ, nkual ƀon têh hŏ an ƀư geh nău tam Bôk nău kan gưl neh dak hun hao wăng sa - rêh jêng kon nuĭh nkual rnoi mpôl đê̆, đah lĕ rngôch tơm prăk rlău 305 rmen prăk. Bah nê, âk ntŭk ntô ntung trong, ntĭm nti, dak si dơi ntuh kơl; jay gŭ n'hanh tơm prăk manh dơi ntop kơl, kơl nuĭh ƀon lan hun hao tuch tăm, tĭng kơn n'hao nău rêh drăp ndơ n'hanh nuih n'hâm. Tât aƀaơ, rnoh rnăk ach o tâm ƀon lan Khmer bah nkual ƀon têh hŭch hôm nklăp 1.900 rnăk. Wa Lê Trung Tuấn, Groi Kruanh UBND xã Thạnh Thới An, nkual ƀon têh Cần Thơ an gĭt:

"Bah meng nău mbơh ƀư ăp trong kơl đah ƀon lan rnoi mpôl đê̆, xã hôm uănh khlay trong kan ntĭm nti nău kan tă bah ăp jrô tiăr nti kỹ thuật mât rong, khuyến nông, ntĭm nti nău kan… Tă bah nĕ kơl nuĭh ƀon lan n'hao nău blău kan, rhŏ an hun hao wăng sa mô lah râng pah kan ta ăp công ty gay n'hao nău geh an rnăk wâl.

Tâm let năp tay, nkual ƀon têh Cần Thơ mbra ƀư tĭng tâm ban ăp nău kan, trong mkra hun hao wăng sa - rêh jêng kon nuĭh; ntrôl ngăch ăp nău kan, nău nchrăp ƀư mpeh ăp bôk nău kan rƀŏng tĭng lam dak; đăp mpăn nuĭh ƀon lan dơi geh tŏng ăp, ngăch ăp nău kơl tĭng nău ntrŭnh, bah nĕ tĭng kơn n'hao nău rêh.