Cao Bằng lah n’gor mpeh yôk yang geh trong n’har bri jong, yôk nor hưt prêh đah nô nău luh  lăp mô geh nău way geh âk duh jêr. Bah meng nê, ta du đêt nkual nău rêh bah nuĭh ƀon lan hôm mâp âk jêr jŏt, nău gĭt blău hôm đêt... aơ lah ăp ntŭk dơh an ăp nuĭh tih djơh tăch rgâl nuĭh gŭ hăn. An ƀư trong nchrăp 8, Hội Liên hiệp bu ur n’gor Cao Bằng hŏ uănh khlay ƀư ăp trong leo nkoch trêng njrăng n’gang nău tih tăch rgâl nuĭh.

Khay 2/2023, Tahen n’har bri n’gor Cao Bằng hŏ lơh chrai chuyên án CB223p mpeh nău tih tăch rgâl nuĭh, nuĭh geh bu tăch lah oh bê mô hŏ tŏng du khay deh. Mpôl kan dơi kan hŏ nhŭp kân Lê Thị Mỹ Lệ n’hanh Phạm Thành Sinh (ndrel gŭ ta nkuâl Krông Pắc, n’gor Dak Lak). Ăp nuĭh dja geh ban nhŭp rnôk dôl ndu oh bê hăn rlău n’har bri (mpeh n’har xóm Tềnh Quốc, xã Cần Nông, nkuâl Hà Quảng). Khay 7/2023, Công an n’gor Cao Bằng lơh chrai tay chuyên án mbrô 623M, kơl 2 hê bu druh lah nuĭh geh mpôl tih djơh tăch rgâl nuĭh bah Myanmar sĭt Việt Nam.

Nkoch mpeh nău tăch rgâl nuĭh hŏ tă geh ta ntŭk he, yuh Hứa Thị Thạch, Kruanh Hội Liên hiệp bu ur xã Cần Nông, thị trấn Thông Nông, nkuâl Hà Quảng, n’gor Cao Bằng an gĭt:

Xã Cần Nông lah xã n’har bri. Mpeh nău tăch rgâl nuĭh rlău n’har bri ri nha hôm geh mbro ta  ntŭk đŏng, lơn lah tâm ăp năm mhe aơ nơh hŏ geh 1, 2  hê nuĭh ta xã đŏng. Du nău dŭt mhe lah tâm khay 2 năm 2023 geh du hê oh bê bu klô 16 nar deh geh mpôl tăch rgâl nuĭh meng uănh n’hanh geh nău nchrăp ndu leo tât Trung Quốc yơn hŏ geh mpôl kan dơi kan ban saơ ta n’gâng n’har bri 614 xã Cần Nông. Lôch rnôk ăp n’gâng kan dơi  kan ban saơ n’hanh nhŭp kân ri săk gâp nơm lah Kruanh Hội bu ur xã lôch tăng geh nău lư hŏ hăn tât mât chăm na nê̆ oh bê ta pôih n’har bri n’hanh rgŏ jă ăp rnăk geh oh bê kơl bok ao n’hanh kơl dak toh rgŏ jă prăk nkrem ntrŭt nsôr hăn nti bah nkuâl kơl an 2 rkeh prăk gay rvăt dak toh an oh bê đŏng, lôch nê gâp jao tay oh bê an Ntŭk rgum mât kơl lam rêh jêng kon nuĭh n’gor gay mât chăm n’hanh pêt mât oh bê.

Gay nking nchăng mpôl tih djơh klach rvê dja, rlău ma  nău lăp kan rlăch ndăng lĕ n’hâm  suan bah mpôl kan dơi kan kơt Công an, Tahen n’har bri, tâm trôm tĭng ƀư ăp nkô̆ trong nchrăp 8 “Tĭng ƀư tâm ban bu ur bu klô n’hanh nkra ăp nkô̆ nău jăch ndăn đah bu ur n’hanh kon se”, Hội Liên hiệp bu ur n’gor Cao Bằng hŏ geh âk trong nkoch trêng mhe n’hanh geh nău tam. Yuh Hứa Thị Thạch, Kruanh Hội Liên hiệp bu ur xã Cần Nông an gĭt tay:

Tâm nău gĭt êng bah kônh wa ta aơ, ri nău tăch rgâl oh kon rlău n’har bri gay hăn kan thuê, gay sŏk sai dak bah dih….ri rŭ hôch âk n’hanh dôl geh đŏng. Mpôl hên nkoch trêng ta ntŭk ri way hăn nkoch trêng tât kônh wa ƀon  lan, tât nuĭh geh ma nău tăch rgâl nuĭh ri mpôl hên rblang kloh mpeh ăp năư kan tih leh rnôk ƀư tăch rgâl nuĭh n’hanh n’hao nău gĭt êng tay lah nău  dơn kan bah nsum mpôl ƀon  lan tâm nău lah phong ăp nuĭh tih  djơh rnôk ma he lah nuĭh ƀon lan gŭ dăch  n’har bri ban saơ ăp nuĭh mô way bên ma saơ geh nău kơt nê ri ân mbơh đah  n’gâng kan ta ntŭk mô lah mpôl kan dơi kan gay nkra năn ngăch dĭl.

Tĭng yuh Hoàng Trang Định, Kruanh Hội Liên hiệp bu ur thị trấn Thông Nông, nkuâl Hà Quảng, đah nău ƀư lah nuĭh nkoch trêng, rgŏ jă n’hanh ntop kơl bu ur, kon se geh bu tăch plơ̆ sĭt đah ƀon lan, ăp hội viên bu ur lah du hê nuĭh nkoch trêng tâm dâng. Nău dja mbra kơl pah kan nkoch trêng tâm  dâng pơk hvi nău nkoch trêng tât bu ur ŭch geh nău ntop kơl:

Mpeh pah kan nkoch trêng njrăng n’gang tăch nuĭh ri tâm ban ri aơ nơh dơi gưl ủy đảng, n’gâng kan dŭt mât uănh khlay đŏng. Tâm ăp năm bah năp nơh ri geh 1 hội viên bu ur geh bu tăch tât Trung Quốc đŏng. Lôch plơ̆ sĭt, yuh hội viên bu ur dja ji đit prêng, tât bah kơi nơh dơi geh ăp nsum mpôl tâm ban kơt ăp gưl Hội mât uănh khlay nta trong dơh n’hanh lor nchrăp rƀah gĭt nău lư ŭch rŏng, nkoch bri di trong rƀŏng n’hanh geh ăp nău rgŏ jă ri yuh bah nău đit prêng bah săk nơm n’hanh mbrơi mbrơi lăp nsum tâm nău rêh n’hanh yuh nê hŏ nănh lơn, lor nchrăp lơn râng ăp rmôt mpôl tâm dâng.

Tâm bah ri aơ nơh, Hội Liên hiệp bu ur n’gor Cao Bằng uănh nău nkoch trêng njrăng, n’gang tăch rgâl nuĭh lah ngoăy tâm  ăp nkô̆ glo tơm tâm nău tĭng ƀư tâm ban bu ur bu klô n’hanh nkra ăp nkô̆ nău jăch ndăn khlay geh tât bu ur n’hanh kon se ta n’gor. Tĭng wa Nông Thị Tuyết, Kruanh Hội Liên hiệp bu ur n’gor Cao Bằng, gay tĭng ƀư geh nău dơi ăp nkô̆ bah trong nchrăp 8, lơn lah nkoch trêng njrăng, n’gang tăch rgâl nuĭh ân geh trong tât dăch, leo ƀư mhe rƀŏng tât n’hao nău dơi tam ngăn ngăn pah kan njrăng n’gang tăch rvăt bu ur, kon se; n’hao nău gĭt êng tâm hội viên, bu ur bah sâm brôi bu ur, tâm lah tâm janh đah bu ur, tăch rvăt bu ur, kon se.

Tĭng Kruanh Hội Liên hiệp bu ur n’gor Cao Bằng đŏng, mhe aơ nơh, Hội hŏ rđău đă ăp rmôt nkoch trêng ân nkoch trêng âk geh ma nău khuch djơh bah tăch rvăt nuĭh; quy định pháp luật rmal nău tih tăch rgâl nuĭh n’hanh trong nkra lơh rnôk ban saơ nuĭh tăch rgâl bu ur, kon se mbra geh ngăn tâm nău rêh; du đêt trong kơl n’hanh rhŏ dŏng bah hội bu ur ăp gưl ntop kơl, mât njrăng nuĭh geh bu tăch plơ̆ sĭt...

Ăp trong leo nkoch trêng nău lư ta Cao Bằng an saơ nău rgâl mhe, blău ƀư mhe bah ăp gưl hội, nău khlay kan, nău dơn kan bah ăp cán bộ, hội viên bu ur, rmôt nkoch trêng tâm ƀon lan tâm  nău njrăng, n’gang tăch rgâl nuĭh, nsum ti rdâk njêng ntŭk gŭ rêh đăp mpăn an bu ur n’hanh kon se bu ur./.