Tâm rnoh bơi tât 40 nau mbơh đă bah cử tri tâm nar mâp, âk ngăn nkah tât nau in pit neh đah ƀon lan ndrel công ty, ntŭk kan geh Ngih dak jao neh. Tĭng cử tri, nau in, pit neh aơ jŏ âk jêt năm yơn ê geh rklaih lôch. Cử tri Nguyễn Hữu Tân, ntoh măt ân rlau 60 rnăk tâm thon Hiệp Hoà, xã Ninh Gia, ngơi:

 ‘Lơ 29/8/1988, UBND n’gor jao ân ntŭk kan yơng kon ntil Lâm Nghiệp Lang Hanh lah 200 ha yơn tâm nê geh neh bah kônh wa hên dôl ƀư. Tâm nau ntrŭnh ta điều 3 mbơh kloh, đah rnoh neh bah kônh wa dôl tuch tăm ri đă ăp gưl, ăp ntŭk kan rklaih tĭng luật ntrŭnh, yơn ntơm bah nê tât rnôk aơ mô geh rklaih. Kônh wa ƀon lan hên đă ntơm bah xã tât nkuăl, tât n’gor, jêh ri n’gor lŏ leo tât xã”.

 Ndơn saơ ăp nau kan geh tât nau mât, dŏng ndrel tâm pit neh tâm xã Ninh Gia jêr ndrel jong, wa Phan Đình Trạc, Uỷ viên Bộ chính trị, Bí thư Trung ương Đảng, Kruanh Ban nội Chính trinh ương đă rđau kan n’gor Lâm Đồng ndal kơp, rklaih năn ăp nŭih n’hêl. Đah ăp nkô̆ nau geh nau dơi, rmôt kan ntoh măt Quốc hội n’gor Lâm Đồng mra geh nau đă N’gâng kan neh dak lăp rklaih. Wa Phan Đình Trạc ngơi:

‘Nau kan geh tât neh ntu, gâp đă Groi Kruanh UBND n’gor Nguyễn Ngọc Phúc, N’gâng kan Tài nguyên ndrel môi trường ndrel ăp đồng chí ta aơ rđau rklaih tĭng ăp nŭih n’hêl. Kônh wa lah ôp nkuăl ri nkuăl lŏ mbơh n’gor ê geh nau đă, hôm n’gor ri lah tâm nau dơi bah nkuăl, tâm rnôk jur hao kônh wa mô hôm gĭt ntŭk ma mbơh. Êng neh ntu geh tât Nông Lâm trường 78 ri gâp đă Jrâu kan nchrăp săm ƀŭt mbơh bah Rmôt kan ntoh măt Quốc hội n’gor ân nkoch kloh ăp nau kan rnôk aơ bah nông lam trường gay ma ma njoăl n’gâng kan neh dak, khân păng ƀư tơm, tâm rgop ma n’gor, ma Học viện Lục quân gay ma rklaih ân năn”.

 Bah năp nê, tâm xã Trạm Hành, nkuăl ƀon têh Đà Lạt, Uỷ viên Bộ chính trị, Bí thư Trung ương Đảng, Kruanh Ban nội chính trung ương Phan Đình Trạc ndrel rmôt kan ntoh măt Quốc hội n’gor Lâm Đồng hŏ tâm mâp ma công nhân pah kan ndrel cán bộ, đoàn viên công đoàn.

  Tâm nar mâp, âk cử tri đă rmôt kan mât njrăng bri lah nŭih tơm ƀư nau kan tâm ntŭk, yơn nau dơi bah rmôt kan aơ ê geh kơl an ndrel mô geh uănh lah nau kan jâk jêr, khuch khat kơt kiểm lâm viên. Cử tri đă ân geh uănh, ntrơn rgâl nau ntrŭnh mpeh nau aơ gay mât nau dơi ân rmôt ƀư nau kan mât njrăng bri tâm nkuăl, ntŭk geh rnoh nkŭm n’hâm bah bri geh in rlau n’gul rnoh neh lam n’gor.

Ntoh nau tâm nar tâm mâp, wa Phan Đình Trạc, Uỷ viên Bộ Chính trị, Bí thư Trung ương Đảng, Kruanh Ban nội chính Trung ương ân lah ăp nau rgop, đă bah cử tri lah nau tâm di. Rmôt kan ntoh măt Quốc hội n’gor Lâm Đồng mra kơp dơn, rgum ndrel mbơh tât ntŭk kan gưl Trung ương.

‘Mpeh nau kan rmôt ƀư nau kan mât njrăng bri ê geh dăp tâm rnoh nau kan khih khuch, jêr kơt kiểm lâm yơn nau tât khuch jâk bah nau kan tâm ban ma kiểm lâm viên, nau aơ gâp đă rmôt kan ntoh măt Quốc hội n’gor Lâm Đồng kơp dơn gay geh nau mbơh ma Chính phủ. Êng nê, ăp nau kan mpeh dak si, ntĭm nti, công đoàn, kan pah...hên kŏ mra kơp dơn n’hêl gay ma mbơh tât gưl kan tâm Trung ương’.

Rơh aơ, rmôt kan ntoh măt Quốc hội n’gor Lâm Đồng hŏ pă 20 nklâm ndơ ân rnăk vâl dơi kơl, nŭih geh n’hâm, nŭih geh nau rêh jêr jŏt tâm xã Trạm Hành, nkuăl ƀon têh Đà Lạt, 20 nklâm ndơ ân ăp rnăk dơi kơl, nŭih geh n’hâm, geh nau rêh jêr jŏt tâm xã Ninh Gia, nkuăl Đức Trọng, n’gor Lâm Đồng./.