Đồng Nai Thượng lah xã ngai ngăn bah nkuăl Cát Tiên, rnoh nŭuh rlau 440 rnăk, 1.800 nŭih, tâm nê rnoh rnoi mpôl đê̆ geh tât 95%. Êng nau ndơn mât njrăng bri, tuch tăm ƀư mir lah nau geh bah ƀon lan ta aơ. Yơn lah, tĭng wa K’Minh, tâm Thôn Đa Cọ, xã Đồng nai Thượng, yor bri duh nar hô, mô tŏng dak ƀư âk rnoh neh bri ŭnh sa, huch rnoh geh hô:

‘Ƀon lan nơm kăl e geh nau ndĭng “bôk năp ân geh dak tŏ, tal bar geh phân, tal pe gơih kan, tal puăn ntil jêng”, ndri ma lah mô geh dak tŏ ri kônh wa mô dơi ƀư ôh. Đồng nai Thượng lah nkuăl jru, ngai, nkuăl jêr đŏng ri ma ŭch Đảng, ngih dak kơl an tât ƀon lan hên, yor mô geh dak tŏ ri tơm sầu ruêng khĭt êng, rŭng êng play ri ma ŭch geh dak lơn ơm lơn ueh gay kơl an tuch tăm ân kônh wa”.

  Ăp năm rlau aơ, nŭih ƀon lan Đồng Nai Thượng hŏ nsôih ntrơn rgâl tơm tăm, leo rlau 100 ha tơm điều ranh, mô jêng gay tăm tơm jŏ nar êng, kơt bơ, sầu riêng, cà phê, tiêu...leo tât nau săk geh văng sa âk. Ngăn lah, kônh wa hŏ ndâk dơi mro nkuăl tăm sầu riêng gay ma tăch đah rnoh rlau 120 ha, tiêu leo săk tơ Tiêu sọ Đồng Nai Thượng hŏ geh rnoh kơp dơn OCOP 3 sao gưl n’gor. Aơ lah ăp ntil ndơ tuch tăm tơm, kơl an Đồng Nai Thượng geh nau dơi rklaih ach o, ndâk ƀon lan hun hao. Ndri ma, nau kan mô nchrăp geh tơm dak tŏ khuch ngăn tât nau săk tam tuch tăm ndrel nau rêh bah ƀon lan ta aơ.

Cử tri Nguyễn Văn Quy, tâm Thôn Bu Sa, xã Đinh Trang Thượng, mbơh, rnôk aơ trong nglau dak tâm nkuăl mô âk, tâm rnôk nau ŭch tŏ ân tơm tăm lơn ma âk...lah nkô̆ ƀư ma rhiăng ha tơm tăm dôl ma kro tâm yan vai aơ:

 ‘Đạ Rông geh 3 tơm dak tŏ, yơn lah mih tât ri păng hoch tâm dak me Đồng Nai lĕ. Ta aơ lah nkuăl yôk prêh ri ma geh mih ri geh dak, ma lôch mih lah dak suăt kroh. Bol ma nơm kuih ntu jê̆ yơn dak kŏ mô âk, yor păng hoch tĭng trong dak dơl. Gâp đă ân geh nchăng lơi trong dak bât aơ gay ma mât dak ndrel njêng trong dak dơl ân ƀon lan lam nkuăl gay ma kơl an tơm tăm”.

Tâm rnôk mâp cử tri, rmôt kan ntoh măt Quốc hội Lâm Đồng kơp dơn nau đă mbơh bah cử tri ndrel đă ăp n’gâng kan, ntŭk kan, n’gor Lâm Đồng uănh kơl an nau kan njrăng rdâng nau prăng bri, geh nau kan đăp mpăn dak tŏ jŏ jong, nâp nâl ân nŭih ƀon lan./.