Nau ntrŭnh mpeh nau săch wa Trần Thanh Mẫn ƀư Kruanh Quốc hội gưl XV hŏ geh ăp ntoh măt Quốc hội yor ty ân, đah 475/475 ntoh măt râng ŭch (geh 97,54% rnoh ntoh măt Quốc hội). Kruanh Quốc hội Trần Thanh Mẫn, ton nau:

‘Tâm nau n’ha cờ chăng mănh êr huêng khlay bah neh dak, bah năp Quốc hội ndrel kônh wa cử tri tâm lam dak, gâp-Kruanh Quốc hội dak Cộng hoà xã hội chủ nghĩa Việt Nam dăn ton: Mro mrăng ƀư nau kan ma Neh dak, ma ƀon lan, đah Hiến pháp dak Cộng hoà xã hội chủ nghĩa Việt Nam; nsôih ƀư ân lôch jêh nau kan ma Đảng, Ngih dak ndrel ƀon lan jao ân”.

Ntoh nau jêh rnôk ndơn nau kan, Kruanh Quốc hội Trần Thanh Mẫn ntoh nau nkanh lah ueh ngăn tât Kruanh Hồ Chí Minh; nkah ngăn ăp nŭih rđau kan hăn lor, rđau kan cách mạng, Mẹ Việt Nam janh dăng, Nŭih janh dăng bah rmôt tahen, janh dăng tâm nau pah kan, ăp rnăk vâl tahen khĭt, ăp tahen sôt rmanh, ăp rnăk vâl geh n’hâm kơl an neh dak; ryơk lah ueh mpeh nau rđau kan, rđau đă tâm di, tâm dăch bah Rnâng kan rđau kan Trung ương, Bộ Chính trị, Ban Bí thư, bah đồng chí Tổng Bí thư Nguyễn Phú Trọng.

Nau ntrŭnh mpeh nau săch wa Tô Lâm ƀư Kruanh dak Cộng hoà xã hội chủ nghĩa Việt Nam geh ăp ntoh măt yor ty ân ƀư, đah 472/473 ntoh măt râng ân. Ntoh nau tâm nar ndơn nau kan, Kruanh dak Tô Lâm ton mra ƀư ân rjăp, tŏng ăp nau kan, nau dơi bah Kruanh dak hŏ geh pă đă ân, nsôih ƀư ueh nau kan tâm nchră tâm dak, dak ba dih, neh dak, rnă njrăng bah neh dak:

‘Ndơn gĭt kloh nau kan têh bah năp Đảng, Ngih dak, ƀon lan. Gâp ton mra ƀư ân rjăp, tŏng ăp nau kan, nau dơi bah Kruanh dak hŏ geh pă đă ƀư; nsôih rjăp lơn ƀư nau kan tâm nchră tâm dak, dak ba dih, neh dak, rnă njrăng bah neh dak; ndrel ma lam Đảng, lam ƀon lan, lam tahen nơm ndrel ăp ntŭk kan tâm ntrong kan chính trị ƀư ueh ngăn nuih n’hâm “nsôih êng, rnơm êng, nsôih n’hâm, rjăp nau kan, rnơm bah rnoi mpôl” nsôih ƀư ân dơi nau ntrŭnh, ntrong kan bah Đảng, ê lor lah nau ntrŭnh Đại hội ntoh măt lam dak tal XIII bah Đảng”.

Nau geh bah rnôk săch Kruanh dak, Kruanh Quốc hội đah rnoh phiếu âk ân saơ nau rnơm ngăn bah ntoh măt Quốc hội, kŏ lah nau nkoch nau ŭch bah ƀon lan. Kruanh dak Tô Lâm ndrel Kruanh Quốc hội Trần Thanh Mẫn đăp mpăn tŏng ăp nau dơi nsum bah Uỷ viên Bộ Chính trị, Ban Bí thư, geh nau rnơm prêh tâm lam Đảng ndrel ƀon lan. Wa Phạm Văn Hoà, Rmôt kan bah Đồng Tháp, ŭch:

 ‘Bar nau ntoh ngơi bah Kruanh dak, Kruanh Quốc hội, ăp nau ntoh ngơi aơ aơ nkoch kloh n’hêl săk gâp nơm ndrel nŭih ƀon lan dŭt n’hâm rnơm âk ngăn Kruanh dak, Kruanh Quốc hội nsôih rlet rlau nau jâk, nau nkol, nau jêr gay ƀư jêh ueh nau kan bah Đảng ndrel Ngih dak ndrel ƀon lan jao đă”.

 Tâm rnôk nau văng sa tâm dak ndrel dak ba ih mâp nau jêr, nau ƀư ân rjăp tay ăp nŭih rđau kan tơm mra kơl an ƀư nâp lơn tay nau rnơm, njêng nau nsôih gay lam ntrong kan chính trị rgum ƀư jêh nau kan hôm jêr bah năp. Wa Tạ Văn Hạ, Rmôt kan bah Quảng Nam rnê lah, Kruanh dak Tô Lâm ndrel Kruanh Quốc hội Trần Thanh Mẫn kŏ lah nŭih geh ntĭm nti rjăp, bah âk nau kan khlay, geh nau dơi, geh nau blau tâm nau kan:

 ‘Rơh rƀŭn rơh aơ geh tay du nau khlay ngăn ndrel kŏ geh cử tri ƀon lan ŭch kơl an, nê lah nau săch nŭih ƀư kan. Quốc hội săch Kruanh dak, Kruanh Quốc hội nchră nau nau tă geh săch gay ma ntoh nau mĭn nsôih ƀư nau kan bah ntoh măt Quốc hội mô knŭng lah đah ăp nŭih rđau kan ma geh săch nar aơ, ma hôm lah nau kan mhâm ƀư ân tâm di nuih n’hâm bah Đảng, nuih n’hâm ƀon lan tâm nau rđau kan neh dak”./.