Pơh rlau aơ, uỷ viên Bộ chính trị, Bí thư TW Đảng, Kruanh Ban nội chính Trung ương Phan Đình Trạc ndrel rmôt kan ntoh măt Quốc hội n’gor Lâm Đồng hŏ mâp cử tri lah cán bộ, công chức nkuăl ƀon têh Đà Lạt. Êp ăp nau đă geh tât nau kan prăk khlay, prăk kơl ân cán bộ pah kan tâm dâng hôm dêh, cử tri nkuăl ƀon têh Đà Lạt (Lâm Đồng) ngăn ngên uănh khlay tât nau kan njrăng rdâng sa khâm. Cử tri Lê Xuân Ninh, mbơh nau:

 ‘Ăp năm êp aơ, nau kan njrăng rdâng sa khâm săk tam ngăn. Yơn lah, tâm nê geh đŏng ăp ntŭk kan, ntŭk pah kan ê geh nau ueh. Đă ân geh n’hao nau kan njrăng rdâng ân rjăp lơn, tâm dăch lơh, nsôih lơn. Rnôk uănh rklaih ăp nau kan têh mpeh văng sa, gâp đă sŏk lơi lĕ ăp ntil drăp ndơ geh roh hoach bah Ngih dak”.

Ntoh nau tâm nar mâp, wa Phan Đình Trạc, Uỷ viên Bộ chính trị, Bí thư Trung ương Đảng, Kruanh Ban nội chính Trung ương ân lah, ăp nau đă ndrle nau rgop bah cử tri lah nau kan khlay. Rmôt kan ntoh măt Quốc hội n’gor Lâm Đồng mra kơp dơn, rgum ndrel njoăl tât Quốc hội tâm rơh rƀŭn êp tât. Êng nau kan njrăng sa khâm, wa Phan Đình Trạc mbơh, ntơm bôk năm tât rnôk aơ, lam dak hŏ ƀư nau mhal tih, uănh rlau 1.800 nau tih, đah 3.493 nŭih tih sa khâm, văng sa ndrel nau kan, hao 63,8% rnoh tih ndrel 44,8% rnoh nŭih tih rđil rơh aơ năm e. Nau kan mô nsrŭng, rlu, mô geh ntŭk mô ân ndrel mô geh nau mô dơi:

‘Tâm âk nau tih êp aơ, nau ntrŭnh đă mêt uănh, kơp, rdâng lơi drăp ndơ, drăp ndơ gay ma đăp mpăn nau tih geh Rnâng kan rđau đă kơl an rđau tă bah bôk ndrel nar lơn ma geh săk tam. Nua mhe ntoh ngăn tâm 4 khay bôk năm mpeh nau kan njrăng rdâng sa khâm lah ntơm bah nau mhal bôk năp mpeh ăp nau tih văng sa kơt lah mô ndŏ soay, tih nau ntrŭnh mpeh đấu thầu, tih nau mât dŏng neh ntu, drăp ndơ ngih dak lơh khuch khat...ntŭk kan mêt uănh hŏ ƀư kloh ndrel mhal ăp nau tih dôih mpeh sa khâm hăn tâm di ma nau dơi lơn”.

Kŏ tâm pơh rlau aơ, rmôt kan ntoh măt Quốc hội n’gor Dak Lak hŏ geh nar pah kan ma UBND n’gor ndrel ăp ntŭk n’gâng kan. Tâm nar pah kan, ăp rđau kan bah ăp ntŭk kan tâm n’gor Dak Lak mbơh nau jêr ndrel đă Trung ương uănh, doh nau nkol ân hun hao văng sa rêh jêng tâm nkuăl tâm rơh tât. Tâm nê, nau kan kơl an lah hun hao trong hăn nthoi lam nkuăl Tây Nguyên. Wa Võ Ngọc Tuyên, Giám đốc N’gâng kan nchrăp kan ndrel ntuh kơl n’gor Dak Lak, đă:

‘Tâm rnôk rƀŭn aơ Quốc hội mra ntrŭnh nau ntrŭnh bah ăp nkô̆ nau ntuh kơl Gia Nghĩa-Chơn Thành ri gay hun hao ân săk tam, bar đŏng lah tĭng dơi nau ŭch bah ƀon kan Tây Nguyên kŏ jănh ƀư nau kan lơn gay ma đă leo ăp trong Buôn Ma Thuột-Gia Nghĩa drel Gia Lai-Gia Nghĩa lăp ntih kơl bah năp năm 2030. Bah năp nơh geh nau nchrăp nkra trong cao tốc Việt Nam tâm lvang năm bah kơi 2030. Nơm ân geh dăp ân nau kơl an lor năm 2030 ri mơ dơi nthoi tâm ban đah ăp trong cao tốc tâm nkuăl Tây Nguyên”.

 Geh tât nau ƀư ăp nau kan neh ntu, ăp nau đă Quốc hội uănh nau rđau bah ăp n’gâng kan, ntŭk kan lŏ kơp ƀư ăp nau ntrŭnh geh tât pháp luật gay ma der nau tâm rkăng. Wa Đỗ Đức Hà, Groi Giám đốc N’gâng kan tư pháp Dak Lak lah rjăp:

 ‘Nau ngăn mpeh nau kan nkô̆ nau bah neh dak mpeh nau ngăn ri păng mô di lah nau ntrŭnh quy phạm pháp luật, yơn lah gay ma ntrŭnh ƀư ri tâm nkuăl ân geh ntrŭnh ƀư nau ntrŭnh bah pháp luật ƀư, ma nau kan aơ tĭng nau ntrŭnh ngăn lah geh nau dơi bah nau tih luật. Bol ma rnôk aơ dôl ƀư ăp nau kan nkô̆ nau bah neh dak nơm ân geh ntrơn rgâl ân tâm di gay ma tâm ban”.

Tâm nar pah kan, ăp ntoh măt kŏ đă âk nkô̆ nau geh tât nau kan: Khoáng sản, bảo hiểm, tư pháp, rgâl prăk khay, ngih gŭ, kơl an ân nŭih pah kan, biến chế ân nau kan ntĭm nti, nau kan rgum, dŏng neh...Rmôt kan ntoh măt Quốc hội n’gor Dak Lak djăt, rgum ăp nau đă gay njoăl tât Quốc hội ndrel ăp n’gâng kan uănh ƀư./.