Tâm nkual ƀon têh Buôn Ma Thuột, n’gor Dak Lak, Rmôt kan ntoh măt Quốc hội n’gor Dak Lak geh nar mâp cử tri ma ăp nŭih pah kan. Râng rƀŭn mâp cử tri geh Bí thư Trung ương Đảng, Kruanh Ban Dân vận Trung ương, ntoh măt Quốc hội gưl XV Bùi Thị Minh Hoài ndrel bơi tât 150 cử tri lah công nhân pah kan tă bah ăp rmôt, ăp ntŭk tâm n’gor.

Jêh rnôk djăt nau mbơh mpeh nkô̆ nau bah rơh rƀŭn tal 7, Quốc hội gưl XV ndrel nau tă geh bah nau kan bah rmôt kan ntoh măt Quốc hội n’gor ntơm jêh rƀŭn tal 6 tât rnôk aơ, ăp cử tri Dak Lak hŏ mbơh ăp nau đă rgum tâm ăp nkô̆ mpeh bảo hiểm, prăk khay, ngih gŭ, nau kơl an nŭih kan...Ngăn lah, cử tri đă pơk trong gay đoàn viên, nŭih kan geh rvăt bảo hiểm y tế geh trok rnôk khám săm ji tâm ăp ngih dak si bah mông kan, huch năm ân rlu ranh bah du đê̆ rmôt nŭih pah kan kơt nai nti mầm non, công nhân ƀư kan tâm ăp ntŭk kan geh nau khih, jâk jêr...Cử tri Ngô Thị Ánh Đào, Ntŭk kơl an ntĭm nti rnglăp kon se rven rvo n’gor Dak Lak, mbơh đă:

 ‘Đă Quốc hội, rđau kan n’gor đă đah ăp gưl kan geh nau dơi, geh ăp nau kan n’hêl gay geh ăp nau kơl an ndrel rnoh kơl an ân tâm di ma nau kan ntĭm nti mầm non kơt geh nau n’hao prăk kh, n’huch năm ân rlu ranh, leo nai ntĭm nti tâm rmôt nau kan jâk jêr ndrel khih gay ăp nai nti mầm non đăp mpăn pah kan ndrel tâm dăch ma nau kan”.

 Ndrel nê, âk cử tri đă Ngih dak kơl an, uănh, geh nau ndâk ngih gŭ kơl an, ngih gŭ rnoh thuk ân nŭih pah kan. Cử tri Nguyễn Thị thanh Thuỷ, Công ty cổ phần pâl n’aih Dak Lak lah rjăp, tâm rnôk rnoh ndơ hao khlay, prăk dŏng, mât chăm kon roh hoach âk, công nhân mô geh ndơ têm gay ma rvăt ngih:

‘Đă ngih dak kơl an uănh, geh nau ndâk nkra ngih gŭ kơl an, ngih gŭ rnoh thuk tăch rgop prăk mô lah ân cônh nhân pah kan manh prăk đah rnoh prăk kon dêh gay ma geh nau dơi rvăt ngih gŭ gay ma đăp mpăn nau rêh, đăp mpăn pah kan jan sa’.

Kŏ tâm rnôk rƀŭn mâp cử tri, Rmôt kan ntoh măt Quốc hội gưl XV dăch tât, rơh rlau aơ, rmôt kan ntoh măt Quốc hội n’gor Lâm Đồng hŏ ƀư mâp cử tri tâm ăp nkuăl tâm n’gor. Tâm ăp ntŭk mâp, cử tri ntoh nau rnơm tâm nau ntrŭnh ƀư tâm rnôk ntrŭt dăng nau hun hao văng sa, rêh jêng, nau kan rlet rlau nau jêr yor hao khlay ndơ văng sa bah Chính phủ, bah Quốc hội tâm ăp rơh rƀŭn râu aơ. Nkre lah, lŏ đă âk nau kan geh tât nau mât Ngih dak tâm ăp nau kan.

Tâm xã Rô Men, nkuăl Đam Rông, cử tri ŭch Đảng, Ngih dak ân lŏ kơl an ntrŭnh bôk nau kan, nau ntuh kơl tâm nkual rnoi mpôl đê̆, nau đăp mpăn tâm nau rêh, rklaih pă tơm prăk ntuh kơl an hun hao tuch tăm, ntrŭt dăng nau pă săm ƀŭt kơp dơn nau dơi dŏng neh, pă ngih gŭ ân ăp rnăk ach o, n’hao ndrel ma pơk hvi trong Quốc lộ 27, ntuh kơl nkra điện mpoh ang, trong hăn, trong dak kloh tâm ƀon lan...

Tâm rnôk nê, cử tri xã Mê Linh, nkuăl Lâm Hà ngăn ngên uănh kơl an nau kan njrăng rdâng sa khâm ân geh lŏ n’hao nau njrăng rdâng ndrel ntrŭt jăng, uănh khlay nau kan mêt uănh, ƀư tĭng pháp luật bah cán bộ tâm dâng, ƀư tâm ban ăp nau kan ntuh kơl nau hun hao nkual rnoi mpôl đê̆, ƀư ân tâm ban ăp nau kan ntuh kơl hun hao nkual rnoi mpôl đê̆, đăp mpăn nau rêh jêng ƀon lan...Cử tri Trương Văn Trình, tâm thôn 5, xã Mê Linh, nkuăl Lâm Hà, ngơi:

‘Njrăng rdâng nau sa khâm ri gưl n’gor hŏ geh rmôt kan tât uănh, n’ôih hôm. Yơn rnôk hăn mêt uănh tâm moh nkual, moh xã ri mêt uănh nê geh nau mbơh đŏng lah mô? Geh nau mbơh tât báo chí ân hên gĭt đŏng lah mô? Hôm êp aơ ngăn lah gưl nkuăl ân geh mêt uănh, rđau đă, uănh gưl kan bah dâng bah nơm ƀư dơi đŏng lah mô gay geh nau uănh ntrơn, pơk trong, ân geh ƀư ân dơi gay leo tât nau rnơm ân ƀon lan. Yơn mô di lah geh nau đă bah cử tri đă mbơh ri ma nkual mô rđau, mô geh nau nkah mbơh tât nê lah nau mô dơi”.

Ntoh măt ăp ntŭk kan, rmôt kan, n’gâng kan ăp nkuăl bah n’gor Lâm Đồng hŏ geh nau mbơh ăp nkô̆ nau, nau kan ma cử tri uănh kơl an. Rmôt kan ntoh măt bah Quốc hội n’gor Lâm Đồng hŏ kơp dơn, rgum ăp nau đă gay mbơh đă ăp ntŭk kan geh nau dơi uănh, rklaih tâm rơh tât./.