Tâm nau ntuh kơl nsum, ăp ntoh măt Quốc hội kŏ nkah tât nau pă tơm prăk ê geh dơi kơt nau ŭch tâm 3 Bôk nau kan neh dak, ngăn lah đah nau kan mhe mpeh hun hao văng sa, rêh jêng nkuăl rnoi mpôl đê̆ ndrel gôl yôk. N’ăp ma nau kan geh ƀư jŏ rơh lah nau ndâk njêng ƀon lan mhe ndrel n’huch ach o nâp nâl, kŏ hôm geh âk nau kol ê rklaih ueh. Wa Đinh Ngọc Quý, uỷ viên Rnâng kan uỷ ban Xã hội bah Quốc hội nkah:

            ‘Ăp nkô̆ nau geh rgop hôm mâp nau jêr, nau nkol ndrel Thủ tướng Chính phủ hŏ ntrŭnh nau ntrŭnh ân doh rklaih rlau 400 nau nkol, tât rnôk aơ ri ăp ntŭk kan, n’gâng kan hŏ geh nau mbơh nau ôp hôm. Yơn lah, nau ntrơn rgâl nau ntrŭnh geh tât nau ƀư, nau rđau pă bôk nau kan aơ ê geh ntrŭnh năn ndrel Chính phủ dôl tâm rnok ƀư ân jêh. Mpŏng lah tâm rơh tât, Chính phủ mra năn ntrŭt dăng ngăch nau kan aơ, mô knŭng kơl an ăp n’gâng kan, ntŭk kan ma hôm kơl an ân ăp nkuăl doh rklaih dơi, ngăn lah nau ƀư nau kan tâm gưl nkual, gưl xã”.

Cử tri Nguyễn Thị Hải, gŭ tâm Thôn Phú Vinh, xã Ia Băng, nkuăl Chư Prông mbơh tâm ăp năm rlau aơ, nau ntrŭnh nau kan bah neh dak tâm nkual jru ngai bah n’gor Gia Lai ê geh dơi kơt nau ŭch. Tâm nê, nau khlay lah ân ntih kơl ngih vâl gung trong gay ma rgop nau n’hao prêh lơn tay nau rêh jêng, ntrŭt dăng nau tăch rgâl ân hun hao tâm nkuăl jêr jŏt:

‘Gâp saơ lah ăp nkuăl jru, ngai ri ân geh ntuh kơl âk lơn, ma nau khlay lah nau kan ntuh kơl mpeh ngih vâl gung trong, yor nê kŏ lah ngoai tâm ăp nau nkol geh tât nau ma kon se geh rlu nti âk, nŭih ƀon lan hăn ro jêr, trong tăch ndoh ndơ kŏ dôl mâp âk nau jêr, âk rnôk geh ndơ tuch tăm ma mô geh leo tât ntŭk tăch năn”.

Cử tri Dak Lak kơl an tât nau kan tăch rgâl jê̆ ndrel bah găp tâm rnôk nau kan văng sa dôl geh tŭp rŭch kơt rnôk aơ. Dak Lak rnôk aơ geh nklăp 13.500 ntŭk kan dôl pah kan, tâm nê ntŭk kan jê̆ ndrel bah găp, geh 97,5% rnoh geh tăch rgâl tâm lam n'gor Rơh rlau aơ, du đê̆ nau kan hŏ geh ƀư dŏng ueh rgop nau kơl an tât ntŭk kan tăch rgâl bah găp ndrel ma jê̆. Yơn lah, âk cử tri ân lah, nau ngăn ntŭk kan dôl hôm âk nau jêr ngăn lah tâm nau kan manh prăk gay ma hun hao ntŭk kan tăch rgâl tâm rnôk du đê̆ ntŭk kan, n'gâng kan geh tât ba lơ nê ê geh nau mbơh ntĭm ngăn, leo tât nau vĭ vĕ rnôk ntrŭnh ƀư, ngăn lah đah ăp ntŭk kan tăch rgâl tâm nau kan tuch tăm. Wa Nguyễn Thị Hường, cử tri ta nkuăl ƀon têh Buôn Ma Thuột, n'gor Dak Lak, đă:

‘Ngih dak ân geh nau kơl an ân ăp ntŭk kan pah kan tâm nau kan tuch tăm. Bah năp nơh ri ăp nau kan geh tât nau dŏng nchâp ân ƀon lan tuch tăm ân nau tâm boh nau kan ri hŏ geh nau pah kan ueh hôm, rnôk aơ ân geh tay ăp nau kan kơl an ân ăp ntŭk kan tăch rgâl pah kan tâm nau kan tuch tăm bah găp ndrel jê̆ kơt lah ăp nau kơl an manh prăk ndrel ăp nau kan kơl an êng ân nau kan tuch tăm. Tâm rnôk rƀŭn aơ ri ntŭk kan ŭch Quốc hội tâm nchră tay mpeh nau kan aơ”.

Nau khlay lah ân n’hao săk tam lơn tay ăp nau kan ndâk ndrel ntrŭt dăng nau hun hao văng sa, mô di lah ân geh ntop tay ăp nau kan mhe. Aơ lah nau geh năl dơi geh âk ntoh măt Quốc hội mbơh tâm êp rơh rƀŭn nchră nau kan bah Quốc hội tâm rnôk aơ.

Ăp ntoh măt Quốc hội lah rjăp, nau khlay lah ân n’hao nau săk tam bah tơm prăk leo dŏng gay ma ntrŭt dăng nau ntuh kơl nsum, mô lah gay ma kơl an ntŭk kan tăch rgâl rlet rlau nau jêr rnôk aơ. Nê mơ lah nau dŏng tơm prăk ƀư ân geh săk tam ngăn gay ma n’hao nau ndâk tay văng sa ndrel ntrŭt dăng hun hao. Ndri ma, ntoh măt Phan Đức Hiếu, Uỷ viên Rnâng kan uỷ van văng sa bah Quốc hội mbơh nau đă đah nau mbơh bah Chính phủ lŏ ƀư nau n’huch 2% soay rnoh hao khlay-VAT:

‘Ƀư nau kan n’huch rnoh soay hao khlay rnôk mhe rlau, kŏ ƀư geh âk nau kol, tâm nê geh âk nau jêr ân ntŭk kan mât kan ndrel ntŭk kan tăch rgâl tâm nau kơt tĭng, kơt nau trơn rgâl ntrong ƀư kan, mô lah ăp nau ôp kơl nau geh dŏng bah năp nar nchrăp yơn hoá đơn ba kơi mơ dĭng geh geh dơi đŏng lah mô? Ri rnôk aơ ân geh rhuăt luh dơi nau kan tă geh gĭt ân rơh bah năp, gay kơl an ndrle ntĭm gay lah rnôk Quốc hội nchră n’huch soay VAT aơ ri geh ƀư tâm nau ngăn ma mô mâp nau jêr nkol. Mâp nau jêr nkol lah nau săk tam geh ƀư bah nau ntrŭnh geh n’huch âk”./.