Rmôt kan ntoh măt Quốc hội n’gor Dak Nông hŏ ƀư tâm mâp cử tri tâm ăp Phường Nghĩa Đức (nkuăl ƀon têh Gia Nghĩa), xã Nam Bình (nkuăl Đắk Song), xã Đăk Lao (nkuăl Đak Mil) ndrel xã Cư Knia (nkuăl Cư Jút). Tâm ăp nar mâp, ăp ntoh măt Quốc hội hŏ mbơh đah âk mpưm cử tri mpeh nau tă geh bah rơh rƀŭn tal 5, Quốc hội 15. Rnê prêh nau kan bah rmôt kan toh măt Quốc hội n’gor Dak Nông tâm rơh rƀŭn, cử tri ntoh nau ŭch đă Ngih dak kơl an âk lơn tât ngih vâl gung trong, doh rklaih nau jêr mpeh trong hăn, ngih săm ƀŭt, ngih dak si tâm nkuăl gay hun hao văng sa rêh jêng, n’hao nau rêh ân nŭih ƀon lan. Êp nê, cử tri Dak Nông mbơh nau rmok dak tâm kon se yơn ê geh nau rklaih săk tam gay ma n’huch, âk nau kan điện sial ntuh kơl tâm Đăk Song hŏ jêh yơn ê geh leo dŏng.

            Cử tri kŏ đă ăp ntoh măt Quốc hội ân ơm geh nau kan “nkân jâng” cán bộ nai dak si, nau kan kơl an đah nŭih âk năm deh. Ntoh nau lah nau kan neh ntu, cử tri tâm ăp nkuăl bah n’gor Dak Nông đă mpeh ăp nau nkol mpeh ntrơn rgâl neh ntu, nkol mpeh nau nkhah êng neh, nkah nkô̆ nau dŏng neh, nchrăp dŏng neh ăp năm...Cử tri Trần Văn Chức, ta Phường Nghĩa Đức, Nkuăl ƀon têh Gia Nghĩa, mbơh:

            ‘Gâp saơ bản đồ rgum bah năp nơh ndrel bản đồ rgum mhe geh âk nau tâm rkăng, ngăn lah nau nchrăp dŏng neh năm 2022 ndrel nau nchrăp dŏng neh bah năm 2023 kŏ geh nau tâm rkăng, ntơm bah nê ma âk rnăk hŏ ƀư nau đă gay ma ntrơn rgâl nau dŏng neh tă bah neh tuch tăm jêng neh thổ cư yơn lah hôm âk tŏ hăn ro ndrel roh âk prăk manh neh veh, jêh ri dăch dŭt mô dơi geh ƀư, ƀư nau jêr ngăn ân ƀon lan”.

   Kŏ tâm pơh rlau aơ, ăp ntoh măt bah Quốc hội bah n’gor Dak Lak hŏ geh âk nau nar mâp cử tri tâm nkuăl Cư Mgar, Lắk, Krông Bông ndrel nkual ƀon têh Buôn Ma Thuột. Tâm ăp ntŭk mâp, ăp ntoh măt Quốc hội n’gor Dak Lak hŏ mbơh nau tât cử tri nau tă geh bah bôk nau kan bah rơh rƀŭn tal 5, Quốc hội gưl 15 mhe geh ndrel nau kan bah rmôt kan Quốc hội n’gor Dak Lak rƀŭn, djăt nau ndrel rgum nau đă bah cử tri njoăl tât Quốc hội.

Tâm ăp nkuăl, nau kan ma cử tri uănh khlay ngăn tât nau đăp mpăn chính trị ndrel nau rêh, nê lah nau jêh geh tât tâm nkuăl Cư Kuin, n’gor Dak Lak. Cử tri ân lah, nau kan nê geh nau uănh, rklaih năn bah rmôt kan ndrel n’gâng kan, njêng nau đăp mpăn, tâm ban tă bah ƀon lan. Yơn lah, aơ lah nau tât mô ueh, lah nau gay nkah lam ntrong kan chính trị ân geh n’hao lơn nau tâm rnglăp, nkah đah ăp mrôt bah dih. Cử tri Lê Đình Trúc, tâm thôn 1, xã Ea Kiết, nkuăl Cư Mgar, mbơh:

‘Phung hên ŭch mhâm ƀư nau kan văng sa geh đăp mpăn tâm n’gor Dak Lak lah nsum, bah ăp xã lah êng, kơt xã Ea Kiết phung hên ri mhâm ƀư moh nŭih mô lah moh nau kan mpeh đăp mpăn hŏ geh nau tât ri ân geh nkân njrăng ân rjăp ndrel ndŏ luh mô ân geh nau khuch nsum ân nau đăp mpăn. Kơt lah xã hên kŏ dôl nsôih rƀŏng tât ndâk njêng ƀon lan mhe. Gay dơi geh nau aơ ri ân geh mhâm ƀư ân tŏng, ndrel ma nau kan văng sa, chính trị, rêh jêng, đăp mpăn neh dak”.

Ndrel ma nê, cử tri tâm nkuăl ƀon têh Buôn Ma Thuột uănh kơl ngăn tât nau rgum dŏng neh lvang năm 2021-2030 yor UBND nkual ƀon têh mhe mbơh tâm dŭt khay 5 rlau aơ. Tĭng nau aơ, mra geh rlau 1.100 ha neh bah 12 xã, phường tâm nkuăl ƀon têh ê geh ntrơn ta ưbah neh tăm tơm jŏ năm ndrel neh tăm tơm si. Cử tri ăp nkuăl aơ mbơh đă, lah mô rgum ƀư nau aơ ri du đê̆ ƀon mra mô hôm geh rnoh. Cử tri Y Mnông Hmok, tâm xã Ea Kao, nkuăl ƀon têh Buôn Ma Thuột, đă:

 ‘Tâm 14 rmôt kan thôn, ƀon ri gâp saơ nau rgum geh mô âk, ê tâm di ma nkual ƀon lan. Kônh wa hên ân geh neh gŭ mơ dơi ndâk dơi ngih gŭ ndrel pă nkhah ân oh kon. Đah ƀon Huê, xã Ea Kao, nkuăl ƀon têh Buôn Ma Thuột, tĭng gâp saơ tâm bản đồ rgum neh ri rnôk aơ mô geh neh lah geh thổ cư ôh, knŭng geh nau rgum neh tăm tơm jŏ năm, neh ƀư kan tăch rgâl, neh ƀư nau kan pâl n’aih ndrle neh dŏng nau kan êng. Ri ma ƀon Huê xã Ea Kao têh ntơm bah jŏ năm ma aơ yơn mô gĭt jêh aơ ƀon Huê ntŭk trong tât ôh”.

 Kơp dơn ndrel ma rnê prêh ăp nau đă bah cử tri, rmôt kan ntoh măt Quốc hội n’gor Dak Lak hŏ đă ăp ntŭk kan geh nau dơi ndrle rmôt nkuăl bah nơm mbơh nau. Đah ăp nau kan êng, rmôt kan mra rgum, đă tât Quốc hội, Chính phủ ndrel N’gâng kan, ntŭk kan tâm ăp rơh rƀŭn ba kơi./.