Rmôt kan ntoh măt Quốc hội n’gor Dak Lak hŏ ƀư rơh rƀŭn sŏk nau rgop ân ăp nau nchrăp luật nchrăp geh Quốc hội ndŏ luh tâm rơh rƀŭn rơh aơ. Tâm rơh rƀŭn, cử tri dak Lak hŏ rgop âk nkô̆ nau ngăn geh tât Luật Viễn thông (rgâl nkra) Luật dak dŏng (rgâl nkra), Luật ăp ntŭk kan ân manh prăk (rgâl nkra), Luật mât, njrăng ăp ntŭk kan bah neh dak ndrel nkuăl tahen; Luật tăch rgâl neh ntu (rgâl nkra) ndrel Luật ngih gŭ (rgâl nkra).

Rgop nau mpeh Luật tăch rgâl neh ntu (rgâl nkra), âk ntoh măt ân lah: Đah ăp nau ntrŭnh mhe, mra njêng ăp ntrong kan pháp lý tŏng ăp, tâm ban gay ma mât neh ntu, kơl an, ntrŭt dăng nau kan tăch rgâl hun hao. Pơk trong nơih tâm nau kan tăch rgâl neh ntu, đăp mpăn ntŭk tăch rgâl neh ntu hun hao ueh, tâm di, tâm ban, kloh. Yơn lah, gay n’hao nau kan, nau dơi bah ntŭk kan mât ngih dak mpeh nau kan tăch rgâl neh ntu ân geh ntop tay du đê̆ nkô̆ nau tĭng uănh rjăp nau kơt dŏng pháp luật mpeh nau kan tăch rgâl neh ntu. Wa Hoàng Trọng Phùng, Groi Giám đốc Sở Tư pháp n’gor Dak Lak, rgop nau:

‘Khoản 6 điều 87 mbơh nkô̆ nau mât ngih dak mpeh nau kan tăch rgâl neh ntu ri đă ntop tay du đê̆ nkô̆ nau uănh n’ôi nau kan kơt tĭng pháp luật mpeh nau kan tăch rgâl neh ntu. Nê lah nkô̆ khlay tâm nau mât ngih dak. Ndrel tâm điều 89 kŏ geh nkô̆ nau jao ân N’gâng kan ndâk njêng kơl nchră nau ân Chính phủ uănh nau kan  tĭng pháp luật tâm nau kan tăch rgâl neh ntu yor ri đă ntop tay nau aơ”.

Ntoh nau tâm nar rƀŭn lôch, Groi Kruanh rmôt ƀư du nau kan, rmôt kan ntoh măt Quốc hội n’gor Dak Lak Lê Thị Thanh Xuân kơp dơn, rnê prêh ăp nau đă rgop bah ăp ntoh măt đah nau nchrăp nchră. Nkre ŭch ăp ntoh măt lŏ mĭn ndrel geh tay ăp nau đă đah săm ƀŭt njoăl ân ntoh măt Quốc hội n’gor djăt, rgum gay mbơh tâm rơh rƀŭn tal 5.

Kŏ tâm pơh rlau aơ, rmôt kan ntoh măt Quốc hội n’gor Kon Tum tâm rgop đah Rnâng kan Uỷ ban MTTQ Việt Nam n’gor Kon Tum ndrel Rnâng kan Liên đoàn Lao động n’gor ƀư mâp nkô̆ nau đah 100 nŭih lah công nhân lao động tâm n’gor.

Tâm rơh rƀŭn, cử tri lah nŭih pah kan bah n’gor Kon Tum đă đah rmôt kan ntoh măt Quốc hội n’gor 6 nau kan đah 38 nkô̆, geh: Rmôt nau kan rđau, ƀư nau đă, rmôt ƀư nau kan ndơ tuch tăm, tăm bri, rmôt ƀư nau kan tăch rgâl, rmôt ƀư nau kan dak si, rmôt ƀư nau kan ntĭm nti ndrel rmôt ƀư nau kan kơl an, kơl tâm nau rêh jêng.

Nau mbơh tât cử tri, wa Phạm Đình Thanh, Groi Kruanh rmôt ƀư nau kan rmôt ntoh măt Quốc hội n’gor Kon Tum mbơh, ăp nau kan cử tri lah nŭih pah kan tâm lam n’gor đă Rmôt kan ntoh măt Quốc hội n’gor ân geh nau tŏng ăp tât Chính phủ, Quốc hội ndrel ăp N’gâng kan, ntŭk kan geh tât. Ngăn lah kơt nau kan kơl an đah viên chức, nŭih pah kan tâm ăp Rnâng kan mât njrăng bri, nau kơl an đah ăp rmôt nau dak si ngăn lah tâm rnok ƀư nau kan njrăng rdâng srê ji...Gay ăp nau đă, nau rgop bah cử tri lah nŭih pah kan tâm n’gor geh djăt, rklaih, wa Phạm Đình Thanh đă:

‘Rmôt kan ntoh măt Quốc hội n’gor đă Rnâng kan Liên đoàn Lao động n’gor kơp uănh ăp nau đă ngăn đah ăp nkô̆ nau, kơt lah 38 nkô̆ nau aơ ri nơm ân geh lŏ kơp uănh ndrel geh nau đă n'hêl mô dơi nchih nkoch nsum nsum. Yor lah nơm nchih nsum nsum ri păng jêr ngăn ân ntŭk kan Ngih dak rklaih ơh nau. Ăp nkô̆ nau bah moh nau kan ri ơh nau bah ntŭk kan Ngih dak tâm Trung ương ri hên mra rgum, đă bah Uỷ ban Rnâng kan Quốc hội"”

 Tâm ăp rơh mâp cử tri, rmôt kan ntoh măt Quốc hội ăp n’gor tâm nkuăl Tây Nguyên hŏ mbơh nau nchrăp ân rơh rƀŭn tal 5, Quốc hội gưl 15, nkra lah djăt, kơp dơn ăp nau đă, nau mbơh bah cử tri gay ma rgum, mbơh nkoch tât ntŭk kân ăp nau đă bah cử tri tâm nau dơi rklaih tĭng nau ntrŭnh.

Tổng thư ký Quốc hội, Kruanh ntŭk kan bah Quốc hội Bùi Văn Cường mbơh, rơh rƀŭn tal 5, Quốc hội gưl 15 ntơm ƀư tâm lơ 22/5, lôch tâm lơ 26/6/2023 (nchrăp lah 21/6/2023). Nchrăp, rnoh mông ma Quốc hội pah kan tâm rơh rƀŭn aơ lah 22 nar. Nau nchrăp nkô̆ nau rƀŭn hŏ geh ntŭk kan ƀư ndal gay ma đăp mpăn nâp, tâm ban nar, năn kơl an ân rơh rƀŭn./.