Rmôt kan ntoh măt Quốc hội n’gor Gia Lai hŏ geh nar mâp cử tri tâm ăp nkuăl Phú Thiện, Đức Cơ, Chư Păh, Đăk Đoa, Kbang, Chư Prông, Đăk Pơ ndrel Ia Grai. Tâm ăp nar mâp, cử tri ntoh nau rhơn bah năp nau dơi bah rơh rƀŭn tal 4, Quốc hội gưl XV. Cử tri kŏ rnê prêh nuih n’hâm kan bah ăp ntoh măt bah năp Quốc hội n’gor Gia Lai hŏ geh âk nau rgop khlay tâm nau dơi bah rơh rƀŭn.

Cử tri đă âk nau kan hôm nkol bah nkuăl, kơt nau ntuh kơl, n’hao nkra ngih vâl ntŭk kan ƀon lan, ngăn lah trong hăn. Nau khĭt rmok dak tâm kon se geh hao prêh tâm năm rlau aơ, mô tŏng ntŭk pâl ân kon se nkual jru ngai, nkuăl rnoi mpôl đê̆. Tâm nar mâp, âk cử tri kŏ đă n’gâng kan geh ăp nau kan đăp mpăn ntŭk tăch phân poh, ndơ dŏng mât chăm tơm tăm gay ƀon lan đăp mpăn pah kan. Cử tri Lê Văn Trung, gŭ tâm thôn 3, xã Ia Tô, nkuăl Ia Grai, ngơi:

‘Nau rnoh tăch mô geh đăp mpăn, tal bar lah phân poh ri hao khlay, kônh wa mât chăm cà phê mô geh săk rnglau, ma tăm âk năm ma aơ hôm, dŭm âk kŏ nkhŭt tâm prăk rvăt phân. Bah năp nơh 600 rbăn/ƀao, rnôk aơ ri bơi tât du rkeh prăk/ƀao hôm prăk nkhôm rnôk klih play đŏng...Kônh wa kŏ ŭch Quốc hội, Chính phủ uănh gay ma kơl an ân ueh rnoh ndơ tăm ndrel phân poh”.

 Hôm tâm n’gor Dak Nông, rmôt kan ntoh măt Quốc hội n’gor aơ hŏ ƀư ăp rơh mâp cử tri tâm ăp nkuăl Dak Rlâp, Dak Mil, Cư Jut ndrel Nkuăl ƀon têh Gia Nghĩa. Cử tri Dak Nông rnê prêh ngăn nau dơi bah rmôt kan ntoh măt bah n’gor râng nchră ndrel ôp nau tâm ngih rƀŭn Quốc hội. Cử tri ta Dak Nông kŏ đă âk nau rgâl mhe hành chính tâm nau kan neh ntu, rgum dŏng neh, ntuh kơl ƀư ăp ntŭk kan ƀon lan, răk kloh ntŭk ntu...

Tâm nau njrăng rdâng sa khâm, cử tri ŭch n’gor Dak Nông ntrŭt dăng nau rklaih nau nkol bah nkuăl. Kơt tâm xã Dak Nia, nkuăl ƀon têh Gia Nghĩa, âk ntoh măt đă ơm ƀư kloh nau dơi ndrel rklaih trong hăn thác Liêng Nung geh rluh neh, koh gưl. Cử tri Nguyễn Đình Thi, tâm ƀon Sê-rê-u, xã Dak Nia, ngơi:

“Đă ân cử tri phung hên dơi gĭt lah jêh rnôk ndâk rnâng kan rđau nau njrăng rdâng sa khâm bah n’gor ri tât rnôk aơ Rnâng kan hŏ leo lăp tâm nau kan rklaih ndrel ma djăt nau geh dŭm âk nau tât bah nau khuch tâm n’gor?. Rnôk aơ cử tri xã Dak Nia phung hên dŭt n’hâm ji nuih, lah bơi tât 30 rmen prăk ntuh kơl ân nkuăl ƀư pâl n’aih Liêng Nung kơp n’ăp ma trong hăn rnôk aơ ri mô hôm geh ueh, ma ta aơ lah ntŭk ƀư pâl n’aih nsum mpôl tâm nau ndâk ƀư”.

Kŏ tâm pơh rlau aơ, wa Phan Đình Trạc, Uỷ viên N’gâng kan Chính trị, Bí thư Trung ương Đảng, Kruanh Ban Nội chính Trung ương ndrel rmôt kan ntoh măt Quốc hội n’gor Lâm Đồng hŏ geh nar mâp cử tri tâm xã Đạ Nhim, nkuăl Lạc Dương.

Tâm nar vơt, kônh wa cử tri xã Đạ Nhim, nkuăl Lạc Dương hŏ ntoh nau rhơn mpeh nau tă dơi geh bah rơh rƀŭn tal 4, Quốc hội gưl 15, ngăn lah ăp Luật, nau ntrŭnh khlay geh nchră. Nkre lah, lŏ đă tât Rmôt kan ntoh măt Quốc hội n’gor Lâm Đồng du đê̆ nau nkol ndrel đă nkuăl, n’gor ndrel Trung ương gay ơm uănh, kơl rklaih. Tâm nê, geh nau kan trong Quốc lộ 27C khuch djơh, vay kol trong rluh neh, âk ntŭk kue ndrel mô ueh rnôk hăn trong, ân ngăch kơp, pă săm ƀŭt kơp dơn ân dơi dŏng neh ân ƀon lan, prăk khay nkhôm bah cán bộ kơl nau kan bah xã hôm rêh, rklaih pă tơm prăk manh gay ƀư tuch tăm... Rđau kan UBND n’gor Lâm Đồng, UBND nkuăl Lạc Dương kŏ mbơh nau, rklaih du đê̆ nau kan geh tât nau dơi ma cử tri xã Đạ Nhim mboh.

Wa Phan Đình Trạc, Kruanh Ban Nội chính Trung ương ndơn ăp nau đă bah cử tri ndrel mra rgum, geh nau mbơh tât Quốc hội ân ăp rơh rƀŭn tât. Tâm nê, đă ntuh kơl pơk hvi, n’hao nau nkra trong Quốc lộ 27C lah nau đă ngăn bah cử tri ndrel tâm di ma nau rƀŏng hun hao nkuăl Tây Nguyên bah N’gâng kan chính trik. Wa Phan Đình Trạc, ngơi:

‘Mpeh Quốc lộ 27C, gâp saơ Rmôt kan Quốc hội nơm ân geh nar pah kan đah N’gâng kan gung trong gay ma ndrel đah n’gor doh rklaih ăp nau jêr aơ. Aơ kŏ lah nau kan tâm ntrong rƀŏng nsum bah N’gâng kan Chính trị mpeh nau đă Ntrŭnh kan nkuăl Tây Nguyên. Tâm nê, du ntrong khlay đŏng nê lah nthoi ăp nkuăl nsum, nkuăl Tây Nguyên đah ăp nau nsôih gay ma dơi hun hao mpeh miền Đông, đah Nkual ƀon têh Hồ Chí Minh, đah Khánh Hoà”./.