Rmôt kan ntoh măt Quốc hội n’gor Dak Nông hŏ ƀư 2 nar mâp cử tri tâm ăp xã Trường Xuân (nkuăl Đăk Song), xã Dak Som (nkuăl Dak Glong). Tâm rơh rƀŭn mhe rlau, Quốc hội nchră nau ntrŭnh ntuh kơl nkra trong hăn ngăch Gia Nghĩa-Chơn Thành đah 130 km, rnoh ntuh kơl 25.540 rmen.

            Âk cử tri ntoh nau rhơn, rnê prêh nau kan bah rmôt kan ntoh măt Quốc hội n’gor Dak Nông hŏ mbơh nau ŭch bah âk cử tri jêng tâm nchră bah Quốc hội mpeh nau nkra trong. Cử tri kâp nau kan ơm geh ƀư, gay ơm tŏng nau ŭch hăn ro, ƀư kan, ndrel kơl ƀon lan nơih geh dŏng nau khám săm ji gưl kan ba lơ.

            Nau mbơh tât nau aơ, wa Ngô Thanh Danh, Bí thư n’gor uỷ, Kruanh rmôt kan ntoh măt Quốc hội n’gor Dak Nông mbơh, đah nuih n’hâm kan prêh bah bar n’gor Dak Nông ndrel Bình Phước, âk tŏ đă, Chính phủ rđau nau ƀư ngăch nkra trong Gia Nghĩa (Dak Nông)-Chơn Thành (Bình Phước) mra ƀư ntơm dŭt năm 2024, jêh tâm năm 2026, leo dŏng tâm năm 2027. N’gor dôl đă ƀư trong Gia Nghĩa-Buôn Ma Thuột gay pơk trong têh kơl an Tây Nguyên hun hao:

            ‘Cử tri đă pơk trong Quốc lộ 14 ntơm Gia Nghĩa tât ntung 20, ri trong aơ hên kŏ đă jêh hôm. Jêh nau nkra trong hăn ngăch Gia Nghĩa-Chơn Thành ri hên mra lŏ đă nau ntuh kơl nkra trong hăn Gia Nghĩa-Buôn ma Thuột, ndrel ngăn lah tâm năm kan ba kơi. Ndrel đah trong aơ ri ân geh nkoch lah trong rloh rlau Tây Nguyên đŏng ri mơ dơi hun hao. Rnôk aơ ndrel hăn n’gor Dak Nông âk, tâm di nar geh 2.500 bôk ndeh rlet trong trạm, hôm ăp nar lễ rlu ri ndreh âk rlau 2-3 tŏ đŏng”.

            Tâm ăp nar mâp, cử tri ăp nkuăl lŏ mbơh ma ntoh măt Quốc hội âk nau hôm ntoh. Cử tri nkuăl Phú Thiện, n’gor Gia Lai mbơh nau ƀư kan hành chính tâm neh ntu hôm jêr. Cử tri Hoàng Thanh Tùng, Tổ dân phố 3, nkuăl têh Phú Thiện, mbơh:

            ‘Âk tŏ nŭih ƀon lan nộp hồ sơ đăng ký nau dôl geh neh ntu tât jrâu kan đăng ký neh ntu nkual gay nkra ngih rong sĭm Yến. Jrâu kan đăng ký neh ntu ndơn săm ƀŭt, ndŏ tâm di nau ntrŭnh, yơn kŏ ndơn geh nau ơh lah kâp tâm nau mbơh bah Jrâu kan đăng kí neh ntu n’gor. Tât rnôk aơ ri hôm âk hồ sơ ndŏ tât 5 khay jêh, yơn ê saơ geh nau ơh. Mhâm ƀư mô ntrơn rgâl ân ƀon lan tĭng nau ntrŭnh, ma lŏ kâp nau đă. Ndri nơm ân geh njoăl tât jrâu kan đăng ký neh ntu nkuăl leo ân nkuăl mât an tâm dăch lơn đŏng?”

            Cử tri nkuăl ƀon têh Bảo Lộc n’gor Lâm Đồng, đă, nau kan rgum khoáng sản hôm geh rkăng tât âk nau rgum êng bah Trung ương ndrel n’gor. Nau aơ ƀư âk nau nkol mpeh pháp lý, nau rkăng ƀư kol trong tâm nau ntrŭnh ƀư du đê̆ nau kan tơm bah n’gor. Wa Phạm Thị Hường, tâm Phường lộc Tiến, nkuăl ƀon têh Bảo Lộc mbơh, lĕ 2 ha neh bah rnăk păng geh nkol tâm nau rgum, mô dơi geh nchăm, manh prăk ngân hàng gay ma ƀư kan tuch tăm, nau nkra ngih gŭ, nkhah pă neh ân ăp kon ndrel âk nau kan êng êng kŏ geh nkol lĕ. Nau rêh rnăk vâl dôl tât tâm nau jêr, nkol yor geh nau rgum:

            ‘Đah ma rnăk hên ri ngăn lah geh âk nau nkol ngăn. Gŭ ta aơ âk jêt năm ma aơ hôm, rnôk aơ dăn ntrơn neh ƀư nau kan êng kŏ mô dơi, ƀư ngih ân kon kŏ mô dơi ri ma rnăk hên mâp âk nauẹêr mơpeh văng sa. Rnăk hên kŏ kơt ma ăp kônh wa êng êng tâm nkuăl kŏ đă rgum ôp uănh mpeh ntŭk ntu, lah dơi ri ƀư nkre, lah mô ri doh rklaih lĕ ân hên, rnôk aơ kônh wa hôm geh âk nau rvê ngăn”.

            Lŏ djăt ăp nau đă, nau rgop mbơh, ăp rmôt kan Quốc hội kŏ đă ntoh măt ăp ntŭk kan, n’gâng kan ndrel nkuăl ân geh rklaih âk nau ôp, nau đă. Đah ăp nau kan geh nau dơi, ntŭk kan ndrel Quốc hội ri âk lŏ rgum gay njoăl tât ăp ntŭk kan geh nau dơi./.