Ta rơh rƀŭn tal 4, HĐND n’gor Kon Tum, gưl XII (năm kan 2021-2026), nchră tât nau tă geh dơi ƀư năm kan 2022 ân saơ, âk nkô̆ nau nchrăp luh mô geh nau dơi. Ngăn lah, năm 2022 nau hun hao ăp ntil ndơ bah n’gor Kon geh 9,5% rđil năm 2021. Rnoh ndoh ndơ geh tâm du hê bôk nŭih geh 47 rkeh hao 52 rkeh. Nau geh sŏk prăk Ngih dak geh ƀư 4000 rmen, geh 100% nau nchrăp jao. Tâm năm n’gor Kon Tum rgum geh 19 nau kan ntuh kơl, đah rnoh đăng ký nklăp 1.600 rmen.

            Êp ăp nau tă dơi geh, geh 4 nau khlay bah n’gor Kon Tum mô geh dơi, lah: Nau hun hao ndơ mô geh tŏng kơt Nau ntrŭnh ntơm 10% hao gŏ, Nau dŏng tơm prăk n’gor, pă tơm prăk ntuh kơl nsum ndrel ndâk njêng ƀon lan mhe kŏ mô geh kơt nau nchrăp. Ndrel ma nê lah nau rgâl mhe hành chính, rgâl ntŭk ntu ntuh kơl, n’hao n’hâm rlong bah n’gor ê geh nau ntrơn rgâl ngăn, Nau trok tâm, ntrơn ntŭk ƀư kan khlay hôm mbrơi, nau rgum ntuh kơl ê âk...Jêh rnôk mbơh ta rơh rƀŭn, wa Dương Văn Trang, Bí thư n’gor uỷ, Kruanh HĐND n’gor Kon Tum đă ăp ntoh măt rgum ƀư kloh nau kol, nau ê dơi ndrel nau geh năl ăp nau rklaih:

            ‘Ăp ntoh măt rgum nchră, mbơh, ntĭm kloh nau jêr, nau kol, nau ê dơi, nau mô nâp ndrel nkô̆ nau, ngăn lah nkô̆ nau ê rjăp ân geh rgum doh, rklaih. Tâm nê, uănh năl dơi ăp nau kan ngăn, dơi, đăp mpăn dơi ƀư ăp nau geh dơi, nkô̆ nau hun hao văng sa, rêh jêng, tơm prăk, ntuh kơl bah năm 2023”.

            Tâm rơh rƀŭn aơ, HĐND n’gor Kon Tum gưl XII hŏ uănh, ntrŭnh 22 nau mbơh ndrel 31 nau ntrŭnh nkô̆ nau khlay geh nau dơi ngăn tât nau rêh văng sa, rêh jêng bah ƀon lan tâm lam n’gor.

            Kŏ tâm pơh rlau aơ, rơh rƀŭn tal 5, HĐND n’gor gưl X, năm kan 2021-2026, âk nau duh mpeh nau ê nâp dơi tâm nau pă tơm prăk ntuh kơl dŏng nsum, ndâk nkuăl ƀư nau kan tuch tăm geh rnoh mrô nkuăl tuch tăm kơl tăch luh, pă kan pah ân druh ndăm...kŏ geh mbơh.

            Nchră tât nau ƀư nau kan năm 2022, ăp ntoh măt ân lah, nau kan văng sa, rêh jêng bah lam n’gor Dak Lak năm aơ geh âk nau ang. Yơn lah, tơm prăk ntuh kơl hôm dêh (knŭng geh 29,5%), ndrel nê lah nau ƀư rgâl nau ntop nau kan âk tŏ, nau kan ê nâp kŏ khuch tât nau rnơm bah ƀon lan kŏ kơt lah nau ndâk nau kan văng sa jêh bah srê Covid-19. Ndri ma, wa Tô Thị Tâm, nkuăl Ea Kar, đă:

            “Ntuh kơl ăp nau kan đăp mpăn nau nâp. Geh ăp ntŭk kan lŏ joi ntơm bah bôk năp tât dŭt năm mô lôch ơm. Nau nâp ntŭk kan kŏ geh ăp nau ma ân tâm nchră đŏng, gay ƀon lan geh kơl an ăp ntŭk ƀư nau kan nê ri ân bu geh nau rhơn, geh nau rnơm tâm nau ntrŭnh ntuh kơl tâm di”.

            Đah nau kan tuch tăm, ăp ntoh măt HĐND n’gor Dak Lak đă ân nchrăp luh nau kan, nau kơl an ngăn gay ma kơl an ƀon lan hun hao tuch tăm nau kan prêh, njêng nau tâm rgop ngăn đah ntŭk kan tăch rgâl ndrel ƀon lan. Êp nê, ân geh rgum n’hêl, ndâk mro nkuăl tăm âk ăp ntil tơm sa play, ngăn lah play sầu riêng, der nau tăm âk ntil tơm aơ, plŏ tay nau “tăm-sreh” rnôk geh âk play ma mô khlay rnoh. Wa Lại Thị Loan-Kruanh Rmôt kan lŏ mir n’gor Dak Lak, mbơh:

            ‘Nau ntrŭnh mô pơk hvi neh tăm sầu riêng ma knŭng rgum gay ma n’hao nau nâp ri phung he ân geh ntrong rƀŏng nau rgum mhâm ƀư ân n’hêl, mô ri ƀon lan tăm âk ir, jăng lơi cà phê gay ma tăm sầu riêng. Ma tĭng nau nchrăp bah ăp nŭih knŭng 5 năm dơm lah ntŭk tăm sầu riêng tơm yor Trung Quốc nơm tăm mra geh âk ngăn”.

            Êp nê, ăp ntoh măt kŏ ntoh nau kan duh bah n’gor Dak Lak, kơt rklaih pă kan pah ân nŭih pah kan tă bah mpeh ba dâng sĭt yor geh nau khuch bah hao khlay ndơ, roh kan pah, pă biên chế đăp mpăn ân nŭih cán bộ, công chức, viên chức pah kan bah rmôt kan hành chính gưl nkuăl, ndâk nau kan, nau kơl ân tâm di đah cán bộ pah kan tâm dâng, n’hao nau geh jêng, nau rêh gay nai ntĭm nti kon se pah kan đăp mpăn.

            Kŏ tâm pơh rlau aơ, rơh rƀŭn tal 23, Rnâng kan HĐND n’gor Dak Nông gưl IV hŏ tâm nchră, uănh, nchră ăp nau mbơh, nau ntrŭnh bah rtơh rƀŭn tal 5, HĐND gưl IV, năm kan 2021-2026. Tâm nê, âk nau mbơh, nau nchrăp geh ntoh măt uănh khlay, rgop âk nau gay ma đăp mpăn geh nau dơi./.