Tâm rơh rlau aơ, bôk nau kan 8 hŏ leo tât nau rgâl âk ân nau rêh bah bu ur ndrel kon se tâm nkuăl jêr, ntoh kloh bah ăp nau kan kơl an nau rêh, nkoch trêng n’hao nau dơi, njrăng tâm gŭ ur sai ơm, tâm kăl tâm rnăk vâl...tâm rnôk ƀư, rmôt bu ur Bu ur Việt Nam lah ntŭk kan tơm ƀư nkô̆ bah Bôk nau kan 8. Rmôt hŏ ân saơ nau nchrăp, kan rjăp ndrel nsôih têh, tă bah ƀư tât nau pă tơm prăk. Rnơm nê, âk bu ur ach o, bu ur rêh ndrâu, kon se jê̆ tâm nkualư jru, ngai hŏ geh ƀư dŏng dơi tơm prăk, tă bah nê nsôih tâm nau rêh.

Yơn lah, êp nau tă geh, nau ƀư Bôk nau kan 8 kŏ mâp âk nau jêr. Geh rlau 200 rnoh mrô uănh tĭng, tâm nê geh 70 rnoh mrô geh tât nau tâm ban. Tĭng wa Phùng Quốc Huy, Groi Văn phòng Rđau đă Trung ương Bôk nau kan Nkô̆ nau neh dak, nau aơ lah n’hêl, yơn njêng nau nchâp têh ân cán bộ tâm gưl xã, gưl nkuăl (bah năp nơh), ntŭk ma âk nŭih cán bộ ƀư nau mô âk. Khân păng mô geh nŭih ndrel ndơ dŏng gay rgum, rgop mrô n’hêl. Ntŭk ƀư kan nkoch mbơh nau tâm âk ntŭk mô dăng, ƀư nau mbơh ndrel uănh nau jêr:

‘Tâm rnôk ndâk ƀư, âk nau kan kŏ geh nau nchih “Kơl an bu ur”. Yơn lah, nơm mhe knŭng njưh jâng tâm ăp nau ntoh nau ntrŭnh ma ê geh ƀư nâp ‘moh nau geh kơl”. Nau aơ ƀư nơm mô êng njêng păng jêng nkô̆ ƀư kan n’hêl tâm ăp nau kan nê ma hôm ân geh veh ndrel năl nau tam”.

Ndri ma, gay n’hao nau tâm ban bu ur bu klô tâm rơh tât, ân geh nau kan nâp lơn. Ê lor, ân rgum tâm nau kan, hŏ mpơl saơ nau tam, rgâl ma ntoch jong. Kơt lah, ăp nau kan kơl an ân bu ur rnoi mpôl đê̆, ăp jrâu ntĭm nti nau dơi tâm nau rêh, nkoch trêng nau njrăng tâm gŭ ur sai ơm...ân saơ kloh ngăn ndrel ân geh pơk hvi.

Tal 2, ân uănh nau pă tơm prăk. Lah ăp ntŭk kan jê̆ du rnoh prăk ƀư kan êng, nau  rgum ndrel pă tơm prăk mra jêr. Wa Phùng Quốc Huy ân lah, ân geh mât tơm prăk êng rmôt bu ur gay ntrŭnh ƀư nau kan tơm, kơt nê mra nơih lơn ân Bu ur gay ƀư nau kan mât ndrel kan. Êng nê, ân n’hao nau ƀư kan ân nkuâl, jao ăp nkô̆ ndrel nau dăng tơm ân n’gâng kan xã, ntŭk nchrăp ƀư nau kan tâm di ma nau geh bah ăp ntŭk:

“Nơm ân n’huch tơm prăk mât ƀư kan tâm Trung ương, rgâl ma nê lah jao âk lơn nau kan ân tâm dâng. Nkuâl lah ntŭk gĭt kloh lơn nau rêh bah ƀon lan, pă nau dơi ân khân păng mra kơl an nau pah kan geh tâm dăch ndrel săk tam lơn”.

Du nau kan êng kŏ ân geh rklaih nê lah ăp nau rluk mâl hôm nkol, kơt tâm gŭ ur sai ơm, tâm gŭ tâm dăch dak mham...aơ lah nkô̆ jru ƀư nkol nau hun hao bah bu ur ndrel kon se rnoi mpôl đê̆. Ndrel nê, ân geh tâm rgop đah ăp n’gâng kan gay der tâm rkăng nau kan, dŏng tam nau dơi.

Nau n’hao nau dăng, nau dơi bah bu ur, mât chăm ân kon se mô êng lah nau dơi tơm, ma hôm lah ntuh kơl ân nau rêh jŏ jong. Tâm rnôk mhe, tâm ban bu ur bu klô ân geh leo tâm nau ngăn lơn; kơt lah geh nkô̆ n’hêl, geh nau veh rah vah, geh nau tơm gay ma rgum, ndrel geh nau râng ƀư bah n’gâng kan tâm dâng. Geh kơt nê, nơm mơ geh leo tât nau rgâl ueh, nâp ân nau rêh bah bu ur ndrel kon se nkuăl rnoi mpôl đê̆, rgop nau ƀư ân dơi nau tam bah neh dak mpeh nau tâm ban bu ur bu klô tât năm 2030./.