Âk ntŭk kan, ntŭk đô thị geh ndâk âk năm yơn mô geh nŭih gŭ. Âk ntŭk pah kan dôl rmeh, ăp ntŭk ƀư nau ntuh kơl nsum, ndâk ma tơm prăk ngih dak geh nchlơi dơm...nau aơ mô êng ƀư roh rui tơm prăk ngih dak ma hôm ƀư huch nau rnơm bah ƀon lan đah nau rđau kan bah Đảng, nau mât bah Ngih dak.

            Ngoai tâm ăp nkô̆ nau ƀư nau kan têm nkrem, rdâng mpŭng lir ê geh dơi lah yor ê geh tŏng dơi nau đă. Luật ƀư nau têm nkrem, rdâng mpŭng lir ê geh lăp ngăn tâm nau rêh yor ăp nau ntrŭnh ê dơi dăng, mô tŏng nau nchâp đă nau kan n’hêl gay ƀư jêng rnôk geh ƀư ê prêh, ngăn lah hôm nsing tâm nau nau mĭn ƀư bah nŭih dâk bôk ntŭk kan, rmôt kan ndrel bah ăp cán bộ, công chức, viên chức, ăp nŭih rnăk vâl. Wa Hoàng Văn Cường, Uỷ viên Uỷ ban văng sa ndrel tơm prăk bah Quốc hội:

            ‘Tâm nau ngăn nê nơm ntrŭnh ƀư Luật têm nkrem, rdâng mpŭng lir ê geh ƀư ngăn, knŭng ƀư đê̆ đă, kơt nau nchâp đă, mô geh nau tam, knŭng geh nau mbơh ân tâm di nau kan. Tâm nkuăl, ta ntŭk kan, tâm rmôt kan tâm ăp nkuăl kŏ mô geh ăp nau mbơh ƀư mpŭng lir, ăp nau hôm nkol ri nau kan năm ba kơi ân rgum tâm nau nê đŏng lah mô ri ê saơ”.

            Bah năp nau aơ, Uỷ ban Rnâng kan Quốc hội hŏ tâm ban nau mbơh Quốc hội uănh, rgâl ăp ntil Luật ƀư têm nkrem, rdâng mpŭng lir tâm rơh rƀŭn tal 10 tât aơ. Nkô̆ nau lah ân geh rgum dơi ntrong kan chính trị pháp lý ăp ntil, nâp nâl ân nau ƀư têm krem ân ăp ntŭk kan, nau kan, ăp cán bộ, đảng viên ndrel nŭih ƀon lan, pơk luh nau rgâl nau dơi mpeh nau nâp tâm nau têm nkrem, rdâng mpŭng lir. Tĭng wa Bùi Hoài Sơn, rmôt kan ntoh măt Quốc hội nkuăl ƀon têh Hà Nội, gay ăp nau ntrŭnh mô knŭng geh tâm săm ƀŭt ri an geh nau kan mêt uănh ân rjăp:

            ‘Ân geh nau ntrŭnh geh nsum ma nau ƀư kan, kŏ kơt lah ăp nau kan mêt uănh n’hêl ngăn. Ntơm bah nê, geh nsum ma nau kan rnê nkhôm đah nau mhal rklaih ăp nau tih du trong tâm di ngăn, ueh ngăn, kloh nŭih, kloh nau kan. Ăp nau nê ân geh ƀư ân n’ho ro gay pơk luh ntŭk ntu kơl an ân jêng nau mơng, jêng nau vay têm nkrem, tâm nê ăp ntrong ƀư bah nau rêh, nau kan nau rêh mô lah ăp nau êng êng ân lăp ngăn jêng ƀư”.

            Nchrăp Luật têm nkrem, rdâng mpŭng lir nau geh rgâl êp tât geh mpŏng mra pơk du trong pháp lý kloh, săk tam, n’hao nau mĭn ndrel nau kan bah lam nau rêh tâm nau kan têm nkrem, rdâng mpŭng lir, leo neh dak lăp tâm rach năm geh hun hao nâp nâl./.