Mê̆ Việt Nam anh dăng Nguyễn Thị Khả ta thôn La Bông, xă Hòa Tiến, nkuăl Hòa Vang, nkual ƀon têh Đà Nẵng geh sai n’hanh kon lah lĕ khĭt. Năm 1968, sai mê̆ lah Võ Văn Cảnh, khĭt tâm rnôk pah kan ta nkuăl Nông Sơn, n’gor Quảng Nam. Tât năm 1978, kon bu klô Võ Văn Bình rnôk pah kan dak bah dih khĭt ta ntŭk tâm lơh Campuchia. Năm aơ, lĕ 84 năm deh, mê̆ Nguyễn Thị Khả rnôk nkah gĭt, rnôk chuêl. Nchrăp nkah gĭt Nar Thương binh-Liệt sĩ (27/7 aơ), dơi gưl ủy, n’gâng kan ƀon lan tât khâl, mê̆ Khả saơ răm nuih:

          “Sai kon khĭt lĕ rngot đŏng, yơn ma knơm ngih dak uănh mĭn tât rnăk wâl jêng đah nău rngot bah đêt. Nar 27/7 ăp năm dơi Rmôt bu ur n’hanh n’gâng kan ta ntŭk tât khâl mê̆. Saơ Ngih dak uănh mĭn tât rnăk wâl jêng dŭt rhơn”.

Âk nar aơ, rnăk wâl wa Ngô Văn Hồng, ta xă Hòa Bắc, nkuăl Hòa Vang, nkual ƀon têh Đà Nẵng răm rhơn rnôk sĭt gŭ tâm jay mhe. Năm 1966, wa Hồng hăn du kích geh pănh sôt săk. Aƀaơ, wa lah sôt săk hạng 4/4. Nău rêh jêr jŏt, rnăk wâl mô mĭn tât nău ƀư jay gŭ. Bôk năm aơ wa Ngô Văn Hồng dơi n’gâng kan ƀon lan nkual ƀon têh Đà Nẵng ntop kơl 60 rkeh prăk, wa manh tay dơi ƀư jay nâp nâl:

“Gâp lah tahen ơm, Ngih dak ntop kơl prăk ăp khay. Mhe aơ Ngih dak uănh mĭn ntop kơl prăk ƀư jay, nău rêh gâp dŭt uĕh lăng, bah aƀaơ let bah kơi mô klach mih sial tay”.

Nkual ƀon têh Đà Nẵng aƀaơ geh rlău 100.000 nuĭh geh soan đah cách mạng. Bah tơm prăk bâh trung ương, tơm prăk nkual ƀon têh, ăp nuĭh lŏng bôk tôr, doanh nghiệp rgop, tât aƀaơ, ntŭk aơ lĕ ndâk ƀư mhe n’hanh nkra rlău 10 rbăn jay an nuĭh geh soan, dĭng lĕ rnoh prăk bơi 330 rmen prăk. Wa Lê Văn Minh, Groi Giám đốc N’gâng kan Lao động, Thương binh n’hanh xã hội nkual ƀon têh Đà Nẵng an gĭt: bah năp đaơ, rnoh ntop kơl ndâk ƀư jay tâm kơl bah 30 rkeh tât 40 rkeh ri aƀaơ hao 60 rkeh/rnăk jay, geh jay dơi ntop kơl 100 rkeh prăk, ndâk ƀư gay gŭ nâp nâl, dơi rdâng đqah mih sial:

“Nău kơl an rnăk wâl nuĭh geh soan jêr jŏt, lơn lah rnăk ach o, nkual ƀon têh uănh mĭn mro n’hanh ntĭm rđău an ăp ntŭk kơl lor. M’hâm ƀư rnoh rêh bah ăp rnăk geh soan đêt ngăn an tâm ban mô lah rlău rnoh rêh rĭng tâm ban ta nkual ƀon lan gŭ. Nkual ƀon têh tĭng nău ntĭm bah Trung ương n’hao rnoh ntop kơl ƀư jay mhe. Nău mât uănh ndâk ƀư mhe kơt nkra jay an rnăk nuĭh geh soan an lah geh nkô̆ dŭt khlay, nta an nuĭh geh soan dơi geh ntŭk gŭ nâp n’hanh kloh ueh”.