2 năm rlau aơ, mir dâu tây bơi tât 1000m2 bah rnăk Cil Pam Ka Duyên, tâm thôn Đak Tro, xã Đạ Nhim, nkuăl Lạc Dương, n’gor Lâm Đồng jêng ntŭk mbơh nau tuch tăm mhe bah ƀon lan tât kơt tĭng. Đảng viên Cil Pam Ka Duyên mbơh, geh nŭih ngăn, kan ngăn ri nau nkoch mbơh ăp nau ntrŭnh bah Đảng, pháp luật bah Ngih dak mơ leo nsĭt nau săk tam ueh, kônh wa mơ blau kơt tĭng nơih:

            ‘Rnôk jêng đảng viên, gâp geh tay nau gay ma dơi gĭt kloh lơn nau ntrŭnh bah Đảng, pháp luật bah ngih dak. Rnơm bah nê, gâp dơi ƀư ueh nau kan geh Đảng uỷ, n’gâng kan jao. Ndrel ntơm bah nê, gâp kơl an kônh wa nơm gĭt âk lơn. Ngăn lah, nau bonh đă kônh wa ntrơn rgâl nau kan tuch tăm, nsôih tăm tơm gleh nar gay ma hun hao văng sa rnăk vâl. Rnôk aơ, nau rêh bah kônh wa ta aơ bah oi nau jêr âk ngăn rđil đah bah năp nê”.

            Mô êng knŭng đảng viên Cil Pam Ka Duyên, âk đảng viên êng lah rnoi mpôl đê̆ bah xã Đạ Nhim kŏ gĭt nau kan ndrel nau dơi bah nơm tâm nau leo trong lor tâm âk nau kan. Tâm nê, gay nkoch tât nau kan ntrơn rgâl nau kan tơm tăm, tâm kơl nau kan hun hao tuch tăm, kơl an nar kan, tơm ntil, nau tuch tăm...Rnơm nê, nau kan tuch tăm bah Đạ Nhim hŏ geh âk ntil tơm tăm, ăp nhoat tuch tăm tĭng nau đă ŭch rvăt ndrel n’hao nau geh jêng bah ndơ tăm. Tă bah nau knŭng tăm êng cà phê, rnôk aơ, Đạ Nhim hŏ hun hao geh 16 ha tơm dak si Atiso, 6 ha dâu tây, 40 ha kao koh n’ging, 3000 ha tuh byăp ăp ntil ndrel rlau 330 ha tơm sa play. Rnoh rnăk ach o kŏ huch, rnôk aơ knŭng hôm 7% tĭng nau kơp mhe. Đảng viên Cil Pam Ka Phương, Kruanh thôn Đarahoa, xã Đạ Nhim, mbơh:

            ‘Phung hên nkoch trêng, bonh đă tât ăp rnăk rnoi mpôl đê̆ tâm thôn mât chăm ân nau hun hao văng sa, rêh jêng. Bah jŏ ma aơ nau tơm bah kônh wa lah tăm cà phê, rnôk aơ ntrơn rgâl tât nau kan tuch tăm êng tĭng nau bu ŭch âk kơt byăp, tuh, blên ăp ntil gay ma hun hao dăng lơn”.

            Đảng bộ Xã Đạ Nhim geh 122 đảng viên, rƀŭn tâm 10 chi bộ, tâm nê đảng viên rnoi mpôl đê̆ geh 52%. Tĭng wa Kon Sơ Ha Vương, Kruanh UBMTTQ Xã Đạ Nhim, ndrel đah nau kan tuch tăm văng sa, nau ƀư leo trong lor bah ăp đảng viên hŏ geh ƀư âk tâm âk nau kan, ngăn lah tâm nau kan ndâk njêng ƀon lan mhe, n’huch ach o nâp nâl, tâm rnglăp rnoi mpôl, ndâk ntrong kan chính trị nâp nâl:

            ‘Ƀư tĭng nau ntrŭnh bah Đảng ndrel pháp luật bah Ngih dak, rơh rlau aơ, Đảng uỷ, n’gâng kan hŏ nkoch trêng ân kônh wa ƀư ueh nau kan ndâk njêng ƀon lan mhe. Đah nau ngih dak ndrel ƀon lan ndrel ƀư, âk ntŭk trong hăn, ntung, trong hoch hŏ geh ntuh kơl ƀư nâp. Ndrel nau kan văng sa nâp, nau rêh drăp ndơ, nuih n’hâm bah kônh wa geh n’hao prêh âk ngăn”.

            Ƀư tĭng nau ueh bah đảng viên tâm nkual rnoi mpôl đê̆, ƀư nau kan geh săk tam bah ăp nau kan yor nkual rgŏ jă, nau văng sa, rêh jêng bah Đạ Nhim mro geh nau ntrơn rgâl âk ntil ndrel dôl mô rlu hun hao ăp nar./.