Ủy ban Thường vụ Quốc hội n’glêh an ƀư tâm nchră đại biểu Quốc hội way rnâng kan tâl 4, năm kan khóa XV gay tâm nchră, rgop  mpeh 9 trong nchrăp luật hao mbơh dăn Quốc hội ta rơh hop tâl 6. Tâm nchră đại biểu Quốc hội way rnâng kan mbra dơi ƀư tĭng trong hop rgum ta Hội trường Diên Hồng, Jay Quốc hội ntơm bah 28 - 30/8/2023.

Na nê̆, ăp  đại biểu Quốc hội mbra rgop tâm ăp trong nchrăp Luật: Neh ntu (rgâl nkra); Tăch rgâl neh ntu (rgâl nkra); ăp rmôt an manh tơm prăk (rgâl nkra); Jay gŭ (rgâl nkra); Tơm dak mpêt khlay (rgâl nkra); Viễn thông (rgâl nkra); Căn cước công dân (rgâl nkra); Mpôl râng mât rnă njrăng, đăp mpăn tâm dâng; Mât dŏng ndơ njrăng n’gang neh dak n’hanh nkual tahen. Aơ lah ăp trong nchrăp luật geh du đêt nkô̆ nău têh hôm êng êng, hŏ dơi Quốc hội an nău rgop ta rơh hop tâl 5 mhe aơ, tâm nê, Quốc hội an nău rgop tâl 2 đah trong nchrăp Luật neh ntu (rgâl nkra); n’hanh an nău rgop lor bôk năp tâm 8 trong nchrăp luật hôm ƀa ƀă./.