Ntrŭnh ƀư bôk nau kan “Sóng ndrel máy tính ân oh”, ntŭk kan ntĭm nti n’gor Dak Lak hŏ rgŏ jă, kuăl jă nau rgum kơl an gay ma rvăt 14 rbăn máy tính ân ăp oh kon se rnăk ach o. Rơh rlau aơ, N’gâng kan ntĭm nti Dak Lak hŏ kuăl jă nau rgum tu tơm kơl an geh 40 rmen, geh: 5 rmen tă bah tơm prăk kơl an rgop kơl an bah n’gâng kan ntĭm nti; 35 rmen prăk kơl an tă ba Rmôt kan Điện lực Việt Nam yor N’gâng kan ntĭm nti đă nau pă ân n’gor.

Jêh rnôk ndơn 35 rmen, N’gâng kan ntĭm nti Dak Lak hŏ tâm rgop nsum đah Ntŭk kan ƀư Đấu giá drăp ndơ bah n’gor gay ma ƀư nau đấu thầu, rvăt tĭng nau ntrŭnh. Nau geh jêh nê, rmôt kan bah 3 công ty geh nau dơi ntuh kơl pă 14 rbăn máy tính bảng ân kon se, đah rnoh 2.294 rbăn/mlâm, tâm ban ma rlau 32 rmen.

Rnoh prăk têm nkrem bah rnôk đấu thầu 3 rmen hŏ geh N’gâng kan ntĭm nti pă geh rnoh nau dơi lŏ rvăt năp ntop tay gay ma pă ân năn ân kon se dôl mâp nau jêr. Wa Đỗ Tường Hiệp, Groi Giám đốc N’gâng kan ntĭm nti n’gor Dak Lak, mbơh:

‘Bah nau rgŏ jă rnôk aơ, phung hên ƀư rêng lam nau mô knŭng đah ntŭk kan ntĭm nti ma hôm tât âk ntŭk kan êng êng đŏng, kơp n’ăp ma ƀon lan, nau rêng lam tâm ƀon lan du ntrong ueh êng gay ma ăp dĭng lĕ kon se nti bah lam n’gor Dak Lak đă geh ntĭm nti tâm nti tâm rnôk dôl ma geh srê Covid-19, mô ân kon se geh nchlơi ba kơi”./.