Ta ntŭk tăch ndơ nklang Buôn Ma Thuột – ntŭk tăch ndơ way ơm dŭt têh ta n’gor Dak Lak, lĕ geh tăch pla n’hơ âk ntil drăp ndơ, tâm di đah rơh tăch rvăt ndơ ta dŭt năm. Âk ngăn lah ăp ntil ndơ kho ao, ntô jot jep, banh keo...yuh Đoàn Thị Phong, tăch kho ao ta khu B ntŭk tăch ndơ Buôn Ma Thuột an gĭt.

 “Năm aơ gâp geh nchrăp ndơ tăch têt hao 20% đah ăp năm, gâp lĕ geh tăch nchrăp ndơ gay ma tăch lôch tết dương lịch n’hanh tăch tât tết dâl.  Mĭn ŭch roh rvăt âk, tăch geh ngăch lơn. Rnoh khlăy năm aơ lah mô ir khlăy , drăp ndơ âk ntil đŏng. Năm aơ, ndơ tuch tăm lah nsum ta ntŭk geh dŭt âk, tăch geh âk bu rvăt, gâp ŭch tât têt bu rvăt âk lơn”.

Tĭng nău mbơh bâh yuh Lưu Thị Hồng Hạnh, tơm ntŭk tăch ndơ ta khu C, ntŭk tăch ndơ Buôn Ma Thuột ăp năm dăch aơ, năch mô geh rvăt ndơ têt ndôl ndal kơt ntơm nơh, bu rvăt kanŭng uănh nău ueh kah nâp ndơ jêng lah ăp nuĭh tăch rgâl geh săch tăch ăp ndơ geh gĭt na nê̆ tu tơm, ndơ mât đăp mpăn ueh tâm di gay ma tăch an bu rvăt.

  “Rnoh khlăy ndơ năm aơ mô ir khlăy, geh thuk lơn lah năm ba năp. Uănh nsum lah drăp ndơ năm aơ dŭt âk. Tâm rnôk gâp rvăt ndơ gay ma kơl an ƀon lan rvăt năp ndơ tết, gâp lĕ geh ndơ geh lir tem da dê, geh hoá đơn gŭr, mbơh dăn nău đăp mpăn kloh ueh ndơ sa đah ăp ntil banh keo , lĕ rngôch ăp ndơ sa ƀon lan đăp mpăn lah ueh kloh da dê”.

Kơl an ta rơh tết Giáp Thìn năm aơ, ăp doanh nghiệp, ntŭk tăch ndơ ta n’gor Dak Lak lĕ geh rnoh ndơ tăch, ký tâm ton kan đah ăp ntŭk tăch ndơ geh nău knơm gay ma mât đăp mpăn ueh kloh  Ăp siêu thị ta Dak Lak lĕ mbơh ƀư âk nău kan an kơl n’hanh âk nău kơl rnoh tăch kơt lah : n’huch rnoh khlăy lah rvăt ndơ, rgum điểm, an phiếu rvăt ndơ êng, pă ndrel đah ndơ êng, rvăt 2 an 1...

Tĭng nău mbơh bâh wa Bùi Văn Quân, giám đốc siêu thị Go Buôn Ma Thuột, tât rnôk aơ siêu thị lĕ ƀư lôch nău nchrăp ndơ tết, đah rnoh ndơ dŭt âk hao tât 32 rmen prăk.

“Siêu thị nchrăp an nău nchrăp tết ta năp 2 khay. Năm aơ, mpôl hê lĕ ntêm drăp ndơ hao 10% đah năm ba năp, trong kan bâh hên năm aơ lah n’huch rnoh ndơ ndrănh bia tât 50% yor nău dŏng ta ntŭk tăch rgâl huch n’hanh yor nău ntrŭnh bâh chính phủ. Mpôl hên n’hao tay ndơ an nđik, n’hanh pah kan đah ăp ntŭk pă an tăch rgâl gay ma nchrăp âk ndơ an nar tết”.

Tĭng nău mbơh bâh wa Nguyễn Văn Nghiêm, groi giám đốc sở công thương n’gor Dak Lak, nău ŭch dŏng ndơ tết Nguyên đán Giáp Thìn 2024 ta n’gor Dak Lak nchrăp hao klâp ma 15%.N’gâng kan công thương lĕ ntim đă ăp ntŭk kan tăch rgâl ta ntŭk mbơh ƀư nău nchrăp ntêm nkrem drăp ndơ an âk, ueh mât đăp mpăn, rnoh khlăy an tâm di n’hanh đă ăp doanh nghiệp tăch ndơ mât kơt ơm rnoh khlăy, ton mô an geh nău mô tŏng ndơ, rnoh tăch khlăy. Ndrel đah nĕ, mbơh tơih ăp nău kan n’hao nău rvăt ndơ, ƀư ăp rơh tăch ndơ bah dih, pla n’hơ, rơh tăch ndơ Việt sit nkual ƀon lan..wa Nguyễn Văn Nghiêm an gĭt.

 “Tât aƀaơ geh 11 doanh nghiệp tât râng bôk nău kan mât đăp mpăn drăp ndơ way  dŏng âk. Lĕ rnoh khlăy bơi tât 500 rmen prăk , ê hŏ  nkoch tât rn ă k vâl  kan tăch rgâl, rn ă k pah kan geh nt ŭ k tăch ndơ  ta n’gor. Năm aơ geh nău dơh nơih đŏng, nĕ lah ăp doanh nghiệp nchrăp rnoh ndơ nkre âk, nkre tŏng ăp n’hanh âk ntil ndơ mât kloh ueh đăp mpăn ndơ sa...Nkre lah hên lĕ pah kan đah doanh nghiệp, ăp ntŭk i mô tŏng ndơ âk rĭ mbra geh ndơ̆ ndơ tât ta ntŭk mô tŏng lah geh ŭch dŏng”.

Nău nchrăp ueh na nê̆ bâh ăp ntŭk tăch ndơ, doanh nghiệp n’hanh ntŭk kan têh lah nău kan ueh gay ma n’hao nău dŏng ndơ, njêng nău ueh nơih an ƀon lan Dak Lak geh vơt têt tŏng ăp đăp mpăn.