Mhe aơ, rmôt bu ur Việt Nam hŏ ƀư “Nar rƀŭn bu ur ndâk nau kan” đah nkô̆ “Bu ur Dak Lak ndâk nau kan mhe blau mhe ndrel nthoi ma ntŭk tăch rgâl” hŏ geh ƀư âk nau kan kơt: Nkoch mbơh ntil ndơ ndâk kan bah bu ur, tâm rlong nau blau ndâk nau kan tăch rgâl năm 2023, tâm nchră nau kan tăch rgâl rơh 4.0, pă tơm prăk manh ân bu ur ndâk kan.

Aơ lah rnôk gay bu ur tâm n’gor tâm mâp, nkoch ăp nau tă blau tâm nau ndâk kan, hun hao văng sa, ryơk ăp bu ur ntoh lư tâm nau kan ê nkra, tăch rgâl. Râng rnôk aơ, yuh H’ Chi Mlô, tâm xã Ea Đar, nkuăl Ea Kar, n’gor Dak Lak, nkoch:

‘Gâp tât râng nar bu ur ndâk kan đah nau ƀư nthoi leo ăp ndơ ƀư nau ndâk kan bah bu ur tâm nkuăl hên leo tât ta aơ kŏ lah rnôk gay ăp nŭih bu ur geh leo ndơ bah nơm nkra gay ma mbơh, nthoi trong pơk tăch mhe, pă kan pah ân bu ur, ngăn lah oh nur bu ur rnoi mpôl đê̆”.

Tâm rnôk Bôk nau kan Nar bu ur ndâk kan n’gor Dak Lak năm 2023, rmôt bu ur Việt Nam n’gor Dak Lak ƀư nau kan tăch rgâl rnôk 4.0 gay nchrăp nau blau ndrel ntrong kơl ân bu ur ndâk nau kan, ndâk tăch rgâl.

Tâm nchră ntoh măt geh djăt ăp nau tât nkô̆ kơt: Ăp nau kan nsum mpeh kan tăch rgâl rgum năch tâm rnôk 4.0, nau kan ƀư tăch rgâl ta Dak Lak rnôk aơ, nau nkhêp ndrel ntul rlong đah bu ur ndâk kan, tăch rgâl, n’hao nau blau, rgâl nau geh, nau dơi bah ăp ntŭk bôk năp. Âk bu ur mbơh nau tâm nchră đah ăp nŭih tât nau kơl an tâm rnôk ndâk săk ntơ, ndoh ndơ ndrel joi ntŭk tăch ndơ. Yuh Nguyễn Thị Ngọc Thắng, tâm Phường Tân Lập, nkual ƀon têh Buôn Ma Thuột, mbơh:

‘Nkô̆ nau ma gâp saơ ueh nê lah nau ndâk nau ƀư kan tăch rgâl, ngăn lah lor ma ƀư dŏng du ntŭk kan. Nau nê lah nau ma ntŭk kan hên ê geh yor gâp kŏ lah du hê nŭih ƀư nau kan kơl an, gâp ndâk nau kan tĭng nau rklaih nau kan ân ƀon lan ri ma ê dơi geh nau ndâk nau kan bah nơ. Ri ăp nkô̆ nau kơt nê ri ngăn ngên geh nau dơi ngăn gay gâp dơi geh ndâk nau kan bah nơm mhâm ƀư”.

Đah nau mbơh ngăn, nhêl, tâm nchră kơl an bu ur geh nau blau ndrel trong kan ueh gay ndâk ƀư tăch rgâl, dŏng nau kan mhe n’hao ndơ ƀư, ndâk săk ntơ, n’hâm tâm rlong. Kŏ rnôk aơ, rmôt bu ur Việt Nam ƀư tâm rlong nau blau ndâk nau kan tăch rgâl năm 2023. Rơh tâm rlong rgum 84 nau râng bah bu ur tâm n’gor. Ăp nau kan tâm rlong geh tâm ăp nau kan, rgum âk ngăn nau tuch tăm, đah ăp ntil cà phê, ca cao, tanh njuh, n’gon ndrănh. Tâm nê “ndơ kah bah grăp n’hiăr” hŏ geh giải nhất. Wa Tô Thị Tâm, Kruanh rmôt bu ur Việt Nam n’gor Dak Lak, Kruanh rnâng kan mbơh:

‘Rnoh nŭih rlong năm aơ âk ngăn ndrel geh nchrăp ueh đŏng, mbơh kloh, dŏng geh ăp ntil ndơ bah nkual nơm gay ma ƀư ueh ndrel jêng ndơ tăch. Nŭih săch kŏ njoăl ân ăp nŭih rlong nau mbơh, ntop tay tâm nau kan bah nơm gay jêng geh ƀư ngăn ndrel geh nau jri, ngăn lah kơl an nau kan leo tăch ndrel nau nâp bah ndơ, ntô lir ndơ gay ma mbơh tăch ân bu gĭt tât ntil ndơ bah nơm”.

Ndơn saơ bu ur ndâk nau kan mô geh tâm nau ntrơn rgâl mrô nsum bah neh dak, ma âk năm ma aơ, rmôt bu ur Việt Nam geh nau kan gay bu ur ndâk nau kan văng sa mrô. Êng ăp jrâu nti gay oh nur tâm bên ma nau kan ngăn, rmôt bu ur hôm geh dŏng tâm nau ƀư tăch rgâl điện tử, nthoi trong tăch tâm ăp rmôt ƀư nau kan tăch rgâl điện tử bah nê oh nur geh nau ƀư kan tăch rgâl, mbơh ăp ntil ndơ. Wa Nguyễn Thị Minh Hương, Groi Kruanh rmôt bu ur Việt Nam mbơh:

‘Nau saơ kloh ngăn bah ăp nkual, rnôk nau kan ƀư geh pơk, nar ndâk nau kan ri mro geh nau tâm rgop đah ăp ntŭk ndrel rmôt kan bu ur Việt Nam gay kơl an oh nur râng nau kan nê. Rơh tât rmôt kan hôm mra lŏ kơl an bu ur ndâk kan geh dŏng ƀư ntŭk kan tăch rgâl yơn rgum âk tâm nau kan văng sa nsum ndrel bu ur ndâk kan tâm nau dŏng nau kan prêh, kơl an hun hao nau trong kan tuch tăm ndrih ndrel kloh gay tâm ban ma nau hun hao ndrih ndrel nâp nâl rnôk aơ”./.