Gŭ rêh ta nkual dơn ƀư du ntil nău kan tuch tăm dơm bu ur ta Dak Lak hŏ nănh rgâl trong leo tuch tăm mât rong gay hun hao wăng sa. Đah nău ntop kơl bah ăp gưl hội bu ur ta ntŭk, khân păng hŏ tĭng kơn rgâl nău mĭn, sơch trong ƀư tâm di đah nău geh ngăn ngăn gay nsĭt tay nău geh, n'hao wăng sa an rnăk wâl.  

    Tâm ăp nar rhơn năm mhe, wơt tết, yuh H Búi Ayun, ta buôn Drai Sí, xã Ea Tar, nkuâl Cư Mgar, n'gor Dak Lak hôm mô chuêl mât chăm ndơ mât rong đŏng. Hang rhiăng mblâm sŭr, djăr, rpai, be n'hanh ndrôk khuh ndrău rnôk an bor sa ăp tŏng n'hanh kuaih rao kloh uĕh ndrung n'gar. Yuh H' Búi nkoch, nơm geh ndơ mât dja ma năm aơ rnăk wơt tết ăp tŏng lơn, rvăt năp âk ndơ dŏng, manh prăk ngân hàng geh ndơ ma trok tâm lĕ du n'gul đŏng.

Yuh H Búi nkoch: Ntơm nơh wăng sa lĕ ma rnăk wâl yuh nơm tâm 1ha cà phê. Ntơm bah rnăk lăp Chi hội bu ur bah buôn, năm 2019, yuh H Búi dơi manh 70 rkeh prăk bah ngân hàng chính sách nkuâl đah deh prăk kon đêt. Geh tơm prăk, ur sai yuh tâm nchră wăng sa, tăm âk ntil tơm, mât âk ntil ndơ gay ntop geh wăng sa. Yuh H Búi Ayun nkoch:

    Nơm geh râng sinh hoạt đah hội bu ur, ăp oh yuh ntĭm nti, nchŏng leo ri he kơt nti, ƀư kơt tĭng. Nơm geh nê ma he kơt nti n'hanh gĭt trong mât rong, tuch tăm, rgâl si tăm ndơ mât tâm di. He tăm pih n'hanh tơm mbo ta mir, nsĭt ƀư ndơ sa an ndrôk, be, nơm geh kơt nê ri nsĭt geh wăng sa âk lơn. Rđĭl đah ntơm nơh dơn tăm êng du ntil cà phê ri  aƀaơ wăng sa hŏ mbơm oi hôm.

Tĭng wa H Blên Ayun, Kruanh Hội bu ur xã Ea Tar, nkuâl Cư Mgar, gay kơl ăp hội viên hun hao wăng sa, đăp mpăn nău rêh, Hội bu ur xã Ea Tar hŏ rgŏ jă ăp oh yuh tâm kơl nsum hun hao ma âk trong ƀư; rdâk njêng n'hanh mât ăp trong ntĭt leo mpêt nkrem kơt: Dĭng prăk mpêt nkrem; mât sŭr uk; trong leo 10 yuh kơl 1 hê yuh ta ăp chi hội thôn 1, thôn 2, thôn 3, buôn Ea Tar; trong leo kơl nar luh kan ta chi hội buôn Ea Kiêng… Hội hŏ ƀư rgop dơi 7 rmôt mpêt nkrem manh tơm prăk n'hanh dâk nchăm manh đah Ngân hàng Chính sách xã hội nkuâl Cư Mgar an rlău 300 hội viên manh tơm prăk klaih rlău ach o đah n'gluh an manh 6 rmen prăk.

Hội nkoch trêng an ăp oh yuh kơt nti, ƀư tĭng trong kan uĕh gay nta joi nău kan an oh yuh đŏng. Tâl bar lah kơt nti mpeh tât gĭt gay dŏng tâm nău rêh bah rnăk wâl, đăp mpăn nău rêh, nsĭt geh wăng sa bah rnăk wâl he, hun hao tĭng trong rƀŏng jŏ jong nâp dăng.

Hội bu ur xã Ea Mnang, nkuâl Cư Mgar hôm sơch trong hăn ndrel, mbơh nti gay oh yuh dŏng rgâl mhe khoa học kỹ thuật - công nghệ tâm nău kan, rgâl si tăm ndơ mât an tâm di. Njêng ăp rmôt manh tơm  prăk mpêt nkrem gay kơl oh yuh geh tơm prăk tuch tăm mât rong. Hội rgum ăp tơm ndơ, kan nsum nta an ăp trong ntĭt leo wăng sa an hội viên ach o n'hanh dăch kêng ach o. wa Phạm Thị Ngọc Trang, Kruanh Hội bu ur xã Ea Mnang nkoch trong ƀư bah n'gâng kan ta ntŭk:

Gay an oh yuh rnăk ach o n'hanh ăp rnăk dăch kêng ach o klaih rlău dơi ach o jŏ jong ri Hội bu ur xã an oh yuh manh ăp tơm prăk đŏng, bah tơm prăk mpêt nkrem bah Hội. Hội bu ur xã kan nsum đah Ủy ban Mặt trận Tổ quốc xã nta an ăp trong ntĭt leo mât rong be gay oh yuh rnăk ach o, dăch kêng ach o tât dơi n'hanh kơt nti, hăn uănh ăp trong ntĭt leo gay oh yuh kơt nti sĭt kơt dŏng khoa học kỹ thuật tâm mât rong an rơ̆ jêng hun hao wăng sa gay klaih rlău ach o n'hanh dăch kêng ach o.

    Tĭng wa Lê Thị Thu Hiền, Kruanh Hội Liên hiệp bu ur nkuâl Cư Mgar, tâm bah ri aơ nơh, ăp gưl hội bu ur nkuâl Cư Mgar hŏ an ƀư âk trong ntĭt leo hun hao wăng sa jut jăng ji ngot n'hŭch ach o, ntop kơl bu ur ntơm njêng nău kan...bah nê hŏ geh 14 trong ntĭt leo hun hao wăng sa tâm rnăk wâl bu ur rnoi mpôl đê̆ dơi jêng, wăch rgum rlău 100 hội viên bu ur râng. Ăp trong ntĭt leo hŏ ntop kơl tơm prăk rlău 300 rkeh prăk gay ăp oh yuh ntuh kơl mât be, ndrôk, rpai, tăch chrai ndơ. Nơm geh kơt nê̆ hŏ an tay nsĭt nău geh ngăn ngăn, kơl hội viên ntop geh tay wăng sa n'hanh tĭng kơn n'hŭch ach o. wa Lê Thị Thu Hiền lah:

Tâm let năp tay ri Hội bu ur nkuâl mbra ntrôl dăng tay pah kan nkoch trêng, rgŏ jă, pơk hvi ăp trong ntĭt leo mhe, ăp trong ƀư uĕh, blău mhe tâm cán bộ, hội viên bu ur, lơn lah nău rgâl trong mĭn, trong kan tâm hun hao wăng sa bah rnăk wâl bu ur rnoi mpôl đê̆.

Nkuâl Cư Mgar, n'gor Dak Lak aƀaơ geh 72 thôn, buôn ƀon lan rnoi mpôl đê̆, âk rlău 45% lĕ rngôch rnoh nuĭh lam  nkuâl. Ntơm bah nău kan tuch tăm tĭng trong way ơm, jê̆ chrai mô săk geh âk tâm ban kơt hôm nău mĭn kâp nơm tâm trong ntop kơl bah Ngih dak, tât aƀaơ, rnăk nuĭh rnoi mpôl đê̆ hŏ rgâl trong mĭn, trong kan, tĭng kơn kơt nti ăp rgâl mhe khoa học kỹ thuật, rgâl si tăm ndơ mât gay hun hao wăng sa. Tâm rnoh dja, âk rnăk hội viên bu ur hŏ ƀư tơm nsan hao klaih rlău ach o jŏ jong, rgop n'hao nău geh wăng sa, đăp mpăn nău rêh./.

H’Xíu H’Mốc/Nuĭh rblang: Điểu Thân