Nkuăl Cư Kuin lah ngoai tâm ăp nkuăl tâm Dak Lak geh âk nŭih tĭng chroh. Tâm nê Công giáo (geh rlau 67%), Tin lành (geh rlau 26%) ndrel phật giáo (geh bơi tât 7%). Đah nkô̆ nau n’hao rnoh nŭih đảng viên lah nŭih tĭng chroh, lơ 14/12/2017 nkuăl uỷ Cư Kuin hŏ ndâk ndrel ntrŭnh bôk nau kan mrô 02 mpeh “Ntrŭt dăng nau hun hao đảng viên lah nŭih tĭng chroh ndrel ma nau pă, dŏng cán bộ lah nŭih tĭng chroh tâm trong kan chính trị tâm dâng”.

            Nkô̆ nau bah bôk nau kan mrô 2 lah njêng nau mhe mpeh nau mĭn tâm cán bộ, đảng viên ndrel ƀon lan, ngăn lah nŭih tĭng chroh mpeh nau mĭn du ding, sŏng ngăn bah Đảng tâm nau ƀư nau tĭng chroh. Ntơm bah nê rnơm tâm nau rđau kan bah Đảng, nau kơl an, mât, rđau bah Ngih dak. Nkre lah, kŏ rgop nau ntrơn rgâl rmôt nŭih đảng viên tâm ăp đảng bộ, n’hao nau rđau kan, n’hâm tâm lơh bah ntŭk kan đảng ndrel đảng viên tâm ăp nkuăl nŭih ƀon lan rnoi tĭng chroh.

            Ntrŭnh ƀư ăp nkô̆ nau kan tâm bôk nau kan mrô 02 bah nkuăl uỷ, ăp đảng bộ tâm dâng hŏ ƀư ngăn đah ăp nau ntrŭnh tĭng ăp năm. Ngăn lah, tâm Đảng bộ xã Hoà Hiệp hŏ ƀư ngăn đah nau ntrŭnh tĭng nkô̆ nau mrô 12 mpeh nau n’hao nau rđau kan bah Đảng đah nau kan hun hao đảng viên. Tâm nê năl kloh nkô̆ nau “Ntrŭt dăng nau ntĭm nti, rnglăp đảng viên mhe lah nŭih rnoi mpôl đê̆ ndrel nŭih tĭng chroh’. Ntơm bah aơ, ăp chi bộ tâm lam đảng bộ xã hŏ ntrŭnh rjăp ngăn đah âk ntrong kan ndrel nau kan êng êng. Wa Trần Văn Du, Bí thư Chi bộ thôn Giang Sơn, xã Hoà Hiệp, nkuăl Cư Kuin, n’gor Dak Lak, mbơh:

            ‘Chi bộ rgŏ jă du nau kan, pă nkô̆ nau ân ăp đảng viên tâm chi bộ gay ƀư nau kan pă ntĭm nŭih. Ndrel nkra lah, pă ân ăp cán bộ, rmôt kan kŏ ndơn dŏng nkô̆ nau đă aơ”.

            Ntơm bah ăp nau kan ngăn tâm nkuăl, ăp chi bôk săch ăp nŭih geh nau blau tâm nkuăl geh tĭng chroh gay ma ntĭm nau kan, rnglăp tâm ntŭk kan đảng, rgop nau njêng rmôt nŭih cán bộ, đảng viên ân nkuăl. Wa Trần Văn Thục, Bí thư Đảng uỷ xã Hoà Hiệp, nkuăl Cư Kuin, n’gor Dak Lak, mbơh:

            ‘Phung hên ƀư rơh rƀŭn nkô̆ nau mpeh nau kan hun hao đảng viên, tâm nê, uănh khay nau kan hun hao đảng viên tâm nkuăl nŭih ƀon lan tĭng chroh, kŏ kơt lah hun hao đảng viên nŭih rnoi mpôl đê̆. Gay ma jŏ jong geh nŭih ndơn rgâl nau kan ân ăp cán bộ tâm ntrong kan chính trị, ma tât rnôk aơ n’hâm hŏ ranh hŏ ŭch geh rlu rlau”.

            Tĭng wa Phúc Bình Niê, Bí thư nkuăl uỷ Cư Kuin, đah âk nau nsôih doh rklaih, kơt tĭng ăp nau ntrŭnh bah Trung ương tâm nau hun hao đảng, tât rnôk aơ, Đảng viên nkuăl Cư Kuin geh 33 ntŭk kan đảng tâm dâng, geh 25 đảng bộ, 08 chi bộ tâm dâng, 4.400 đảng viên. Rnoh đảng viên tĭng chroh nar lơn ma âk, nau aơ rgop nau ƀư rgâl nau geh dơi tâm đảng viên, n’hao nau rđau kan, n’hâm tâm lơh bah ntŭk kan đảng:

            ‘Rnoh nŭih ndrel nau nâp dơi bah ăp nŭih đảng viên lah nŭih tĭng chroh bôk năp geh n’hao âk. Tâm năm 2016, rnoh đảng viên tĭng chroh tâm lam nkuăl lah 108 nŭih. Jêh rnôk ntrŭnh ƀư bôk nau kan tât rnôk aơ, rnoh đảng viên lah nŭih tĭnh chroh bah nkuăl lah 245 nŭih, geh 5,5% rnoh đảng viên bah lam nkuăl. Nkuăl kŏ pă dŏng 13 nŭih đảng viên nŭih rnoi mpôl đê̆ tĭng chroh ƀư cán bộ tơm ndrel ăp Kruanh, groi kruanh ăp rmôt kan chính trị rêh jêng tâm xã”.

            Ăp nau tă dơi geh tâm nau kan hun hao đảng viên lah nŭih tĭng chroh hŏ ân saơ nau tâm ban đah nau dôl geh bah nkuăl Cư Kuin, pơk njêng ăp ntung nthoi, nau tâm rgop dăch đah “chroh” ndrel ‘ngăn”. Bah nê n’hâm dăng tâm rnglăp ăp rnoi, ăp mpôl chroh nar lơn geh n’hao, rgop nau hun hao văng sa, rêh jêng, njrăng rdâng nau ƀư rlăng, nau nsing ndăn bah phung rlăng ƀư ndăn nau tĭng chroh gay ma nkhah, ƀư roh nau tâm rnglăp ăp rnoi tâm nkuăl./.