Hang rbăn nklâm ndơ geh nkô̆ dơi jao an rnăk wâk geh nău rêh jêr jŏt ta nkuăl Cư Kuin mpeh tâm bôk nău kan Rgum tăch ndơ Tết kơl nuĭh năm 2024 yor Hội chữ thập đỏ n’gor Dak Lak ƀư. Nchrăp ăp nar tât mbra geh 25 rbăn nklâm ndơ, dĭng lĕ khlay 17,5 rmen prăk tât đah ăp nuĭh ƀon lan geh nău rêh jêr jŏt tâm lam n’gor. Bôk nău kan lĕ jao an 33 nklam ndơ n’hanh 300 phiếu hăn chợ mô sŏk prăk, dĭng lĕ rlău 233 rkeh prăk an nuĭh ƀon lan geh nău rêh jêr jŏt ta lam nkuăl Cư Kuin.

Ăp ndơ mô sŏk prăk geh ƀănh chưng, ƀănh kĕo, ndơ dŏng (dak ngi, dak mắm, xì dầu, sĭk, ƀôt ngot, mì tôm, phe). Rlău ma 3 bôk nău kan gŭ ta ăp nkuăl Cư Kuin, Cư Mgar n’hanh Ea Kar yor Hội chữ thập đỏ n’gor tâm rgop đah n’gang kan ƀon lan ƀư, ăp ntŭk ƀa ƀă mbra săch trong ƀư tâm di đah nău geh bah ƀon lan.