Ƀon Mlốc B, xã Krông Jing, nkuăl Mdrak, n’gor Dak Lak geh 160 rnăk đahr lau 500 nŭih, dĭng lĕ lah rnoi Rđe. Năm 2022, lam ƀon geh bơi tât 100 rnăk ach o, rnôk aơ jur hôm 80 rnăk. Nau rêh drăp ndơ ndrel nuih n’hâm bah ƀon lan tâm ƀon geh âk nau rgâl rđil bah năp. Geh nau aơ lah rnơm tâm Đảng uỷ, n’gâng kan, rmôt kan hŏ ƀư ueh ăp nau kan tâm nau kơt ƀư ăp nau ntrŭnh bah Đảng, Ngih dak. Ngăn lah bah 3 bôk nau kan bah neh dak: Ndâk njêng ƀon lan mhe, n’huch ach o nâp nâl, hun hao văng sa, rêh jêng tâm nkuăl rnoi mpôl đê̆ ndrel gôl yôk. Wa H’Hương Hwing, Bí thư chi bộ Ƀon Mlốc B, ngơi:

‘Ntrong kan chính trị kơt Kruanh bon, ăp ntŭk kan rmôt kan bah ƀon mro rgum tâm nau ntrŭnh rđau bah chi bộ nê lah tâm dăch ma ƀon lan, ntĭm nti ân ƀon lan hun hao văng sa, blau nau kơt tĭng khoa học mhe tâm nau kan mât rong ndrôk, rong sur, blau gĭt ngăn ăp nau kan bah ăp ƀon, ăp yan ntơm bah nê nkoch trêng ân kônh wa tâm ƀon”.

Xã Ea Sol, nkuăl Ea Hleo geh 12 thôn ndrel 7 ƀon, 13 rnoi mpôl ndrel gŭ reh. Lăp tâm nau ndâk njêng ƀon lan ê tŏng dơi geh nau ŭch hun hao văng sa, rêh jêng, tâm rnôk tơm prăk ntuh kơl mô geh âk. Bah năp nau nê, Đảng uỷ, n’gâng kan xã Ea Sol hŏ ntrŭt dăng nau kan nkoch trêng, njêng nau tâm ban nuih n’hâm tâm ƀon lan, nsum ty ndâk njêng ƀon lan mhe. Rgum geh ăp tu tơm ntuh kơl tâm nuih n’hâm ŭch êng bah ƀon lan. Wa Ksor Y Gư, Groi Bí thư Đảng uỷ, Kruanh UBND xã Ea Sol, nkuăl Ea Hleo, mbơh:

‘Xã rgŏ jă nau kan ndâk njêng ƀon lan mhe đah thôn, ƀon aơ ndrel thôn, ƀon êng. Bah nau ƀư, ăp nau geh jêng bah xã geh âk nau rgala mpeh ngih vâl gung trong, ngăn lah tỉnh lộ 15 mhe rlau geh nkra, pơk hvi jêh ri ăp trong xã sĭt tât ƀon geh ntuh kơl ndâk njêng”.

Kŏ kơt âk nkualư geh âk nŭih rnoi mpôl đê̆ êng bah n’gor Dak Lak, bah năp nơh xã Yang Tao, nkuăl Lăk geh rnăk ach o âk, lam xã geh rlau 2.500 rnăk ri âk nŭih rnoi mpôl đê̆ tâm ntŭk geh tât 96%. Gay kơl an ƀon lan rklaih ach o ndrel nau kơl an âk ntil bah Đảng ndrel ngih dak, nkuăl Lăk hŏ geh âk nau dơi gay ntuh kơl ân xã Yang Tao hun hao văng sa rêh jêng. Tât rnôk aơ mra saơ nau ntrơn rgâl âk ntil tât ăp rnăk bah ƀon lan ta aơ. Wa H Loan Uông, Groi Bí thư, Kruanh UBND xã Yang Tao, nkuăl Lăk, nkoch:

“Tâm xã Yang Tao geh nau rgâl âk ngăn. Nau ntrơn rgâl mpeh tơm tăm, mpa rong bah năp nơh geh âk rnăk mô ŭch njrăng ngăn tât nau kan mât rong ndrôk, rpu, sur kik djar, yơn rnôk aơ ri lah ăp rnăk kŏ geh nau rgâl ngăn tâm nau mât rong. Ăp ngih kŏ geh ndrộ, mô geh ndrôk rpu kŏ rong kik djar đŏng”.

Tĭng nau ntrŭnh Đại hội Đảng bộ n’gor Dak Lak năm kan 2020-2025 ăp năm, n’huch ntơm 1-2% rnăk ach o. Rnăk ach o tâm nkuăl rnoi mpôl đê̆ n’huch ntơm 3-4%. Rnăk ach o bah ăp nkuăl ach o jur ntơm 4-5%. Gay dơi geh nkô̆ nau nchrăp luh, ta rơh rƀŭn lôch n’gul năm kan ƀư nau ntrŭnh Đại hội Đảng bộ n’gor Dak Lak mhe aơ, Uỷ viên Trung ương Đảng, Bí thư n’gor uỷ Dak Lak Nguyễn Đình Trung lah rjăp:

‘Lŏ rđau đă n’hao lơn nau kan bah ăp gưl uỷ đảng, ntrŭnh ân rjăp, ƀư ân rjăp ăp nau ntrŭnh, ntrong kan bah Đảng, nau ntrŭnh pháp luật bah ngih dak mpeh nau hun hao văng sa rêh jêng ngăch ndrel nâp nâl. Kơl an pă tơm ƀư nau kan bah bôk nau nchrăp kan, nau ntrŭnh đah nkual rnoi mpôl đê̆, nkual jri, nkuăl ngai, nkuăl n’har bri gay ma ƀư ân dơi ăp nkô̆ nau, nau nchrăp ƀư kan ma nau ntrŭnh Đại hội ntoh măt đảng bộ n’gor tal 17 nchrăp luh”.

N’gor Dak Lak kŏ dôl ntrŭt dăng nau ƀư ăp bôk nau kan bah neh dak n’huch ach o nâp nâl, ăp nau kan kơl n’huch ach o kơt: tơm prăk ân manh deh prăk kon đê̆, bonh ƀư nau kan tuch tăm, tăm bri, hun hao nau kan mât rong tui ka, nti nau kan, dak si, ntĭm nti. Nau kơl uănh khlay lơn đŏng tât nau kan cán bộ nkual rnoi mpôl đê̆. Hun hao nŭih pah kan lah rnoi mpôl đê̆ tŏng dơi ma nau đă nau kan tâm rnôk aơ./.