Tĭng nău mbơh bâh Công ty Điện lực Đăk Lăk, ăp khay bôk năm 2024 nău ŭch dŏng điện bâh n’gor hao âk lơn đah ăp năm ba năp. Na nê̆, tâm khay 2 nău ŭch dŏng hao 30% đah năm 2023. Ăp nar bôk khay 3 rnoh dŏng điện ta rnoh 510MW n’hanh mbra geh tât 550MW tâm ăp nar tât tay.

Gĭt lor nău tât kơt aơ, bâh bôk khay wai, Công ty lĕ ntĭm đă ăp ntŭk kan điện lực bâh nău mât uănh ƀa ƀơ n’hanh mât nkra ngăch ăp ntŭk dŏng jâk ir bâh trong rse, trạm biến áp, aptomat hạ thế...gay ma leo dŏng đăp mpăn, uănh nđôi trong rse n’hanh trạm biến áp, n’hao rnoh veh ta ăp ntŭk geh tâm mâp, ngăn lah ăp ntŭk geh dŏng jâk ir gay ma ngăch geh saơ nău tât ndal n’hanh ngăch njrăng nkra nău tât. Ta meng nĕ, Công ty lĕ n’hao nkre, ƀư mhe du đê̆ trong rse trung áp gay ma mât đăp mpăn nău dơi têk drăng điện rnôk dŏng âk ir, der geh dŏng jâk ir tâm du đê̆ trạm biến áp. Wa Trần Tấn Phùng, groi giám đốc Công ty Điện lực Đăk Lăk an gĭt, ntŭk kan lĕ nchrăp lor ăp nău mbra tât rnôk geh dŏng điện âk ir n’hanh geh trong kan njrăng rdâng săk rnglăy, mât đăp mpăn rnoh pă điện an nău pah kan jan sa n’hanh nău rêh jêng.

"Rdâk njêng du trong kan pă điện mbra tâm rdâng đah nău hun hao rnoh dŏng âk tâm ban kơt geh nău tât n’hanh Công ty mbra geh mât nkra lĕ rngôch trong điện gay ma tâm di đah lĕ rngôch trong điện an năch tâm nĕ geh trong điện năch dôl dŏng. Tâm nĕ, an lor geh UBND n’gor an dŏng lor kơt ngih dak si, ăp ntŭk kan Hành chính n’hanh ăp Trạm bơm dak”.