Nai nti Hoàng Trọng Hải, tâm ngih săm ƀŭt THCS Cư Pui, xã Cư Pui, nkuăl Krông Bông, n’gor Dak Lak, rlau 10 năm ƀư nau kan ntĭm nti kŏ jŏ tâm ban ma nê đŏng păng hăn tât ăp ngih gay ma bonh đă kon se hăn nti. Nai Hoàng Trọng Hải nkoch: Cư Pui lah xã nkuăl 3, jêr ngăn, kon se rnoi mpôl đê̆ geh tât 80%. Me mbŏ kon se ta aơ ân kon nơm rlu nti gay ma hăn kan rgala ma hăn nti. Nau bonh đă kon se hăn nti lah nau mô nơih. Yơn đah nai Hải bol ma jêr kŏ nsôih ƀư đŏng, ƀư yor nau geh dơi bah kon se:

‘Nai nti hăn tât ăp ngih kon se, bonh đă me mbŏ kon se ân kon nơm hăn nti. Tal 2 lah nơm mbơh, bonh đă tay mô ân kon se hăn kan mir rnôk ê tât năm. Ngih săm ƀŭt tâm rgop ma n’gâng kan tâm nkuăl ƀa ƀư ƀư nau kan aơ”.

Kŏ lah xã nkuăl 3 jêr jŏt, xã Ea Sin, nkuăl Krông Búk, n’gor Dak Lak ăp năm kŏ ân kon se hăn nti tŏng ăp rnôk ê tât năm hăn nti, ân geh nau lăp kơl an bah ntrong kan chính trị. Wa Trần Văn Tiến, Kruanh UBND xã mbơh, tâm xã geh du ngih săm ƀŭt mầm non ndrel du ngih săm ƀŭt nti ntơm jrâu 1-5 ndrel 6-9. Rnoh kon se tâm năm nti 2024-2025 geh rlau 500 oh. Ntơm bôk khay 8, xã rđau ăp rmôt kan rgum rnoh kon se dôl năm hăn nti tât nti, ngăn lah mầm non ndrel nti jâtu 1-5 gay tât ăp ngih đă me mbŏ leo kon hăn nti tâm di nau ntrŭnh:

‘Rnôk rlau aơ ndrel ma Ban giám hiệu ngih săm ƀŭt hŏ rđau ăp ntŭk kan rmôt kan tâm rgop nkoch mbơh leo kon se hăn nti tâm rnôk tâm di năm. Uănh nsum nau ân lăp nti jrâu 1 ndrel mầm non kŏ geh dơi kơt nau jao đă. Tât rnôk aơ, ăp ngih săm bŭt hŏ săch ăp kon se hăn nti nchrăp tâm năm nti mhe”.

Nau kan mât kơl an ân kon se mâp nau jêr kŏ geh ntrŭt dăng. Tâm jrâu kan Đoàn-Đội, ngih săm ƀŭt Tiểu học Tô Hiệu, nkuăl ƀon têh Buôn Ma Thuột, n’gor Dak Lak tâm ăp nar aơ, mro geh nau nti ndơn săm ƀŭt, kho ao ơm bah kon se bah năp nê ma kon se jrâu ba kơi geh nau jêr jŏt. Ăp ndrôm săm ƀŭt geh pă, ndrom ân ueh, kho ao geh pih kloh, phăp ueh gay pă ân kon se. Nai nti Đoàn Thị Tuyết Yến, Hiệu trưởng ngih săm ƀŭt mbơh: Năm nti 2024-2025 ngih săm ƀŭt geh rau 1.200 kon se ntơm jrâu 1 tât jrâu 5. ¼ tâm rnoh nê lah kon se rnoi Rđe tâm ƀon Alê B, âk kon se lah rnăk ach o:

 ‘Ngih săm ƀŭt hŏ ntrŭnh mbơh tât Tổng phụ trách Đội kơp uănh ăp kon se tâm rnăk jêr jŏt geh nau kơl an lor lơn. Ngih săm ƀŭt hŏ kơp rgum ndrel geh âk nklâm ndơ pă ân kon se tâm nar lăp năm nti mhe. Đăp mpăn săm ƀŭt nchih nti gay ăp kon se hăn nti geh tŏng săm ƀŭt, ndơ dŏng kơt băl êng. Tal 2 lah rgum tă bah ăp băl tâm ngih săm ƀŭt năm bah năp nê kho ao, ndơ dŏng hôm ueh gay ma ân ăp băl mô tŏng geh”.

Tâm nkuăl n’har bri Buôn Đôn, n’gor Dak Lak tâm rnôk aơ, ăp ngih săm ƀŭt ntơm năm nti mhe. Wa Đỗ Ngọc Anh, Kruanh jrâu kan ntĭm nti nkuăl mbơh, năm nti 2024-2025, lam nkuăl geh rlau 16 rbăn kon se tâm 34 ngih săm ƀŭt ntơm mầm non tât jrâu 12 ndrel ntĭm nti ƀa ƀơ. 50% kon se lah rnoi mpôl đê̆, nau rêh jêr jot. Gay kon se geh hăn nti, jrâu kan ntĭm nti hŏ mbơh nchră nau ân UBND nkual, tâm rgop ma ăp ntŭk kan ơm ƀư nau kơl an ân kon se. Nkre tâm rgop nsum ma ngih săm ƀŭt ƀư nau kan n’hêl tâm nau n’hao rgum kon se hăn nti, ntrŭt dăng nau kơl an tâm nau ntĭm nti, ƀư ân geh săk tam nau kan kơl an kon se ach o. Wa Đỗ Ngọc Anh, mbơh:

‘Ăp ngih săm ƀŭt kŏ geh nau tâm nthoi ma ăp ntŭk kan kơl an, ăp nŭih geh nuih n’hâm lŏng kơl an kon se săm ƀŭt nti, ka-ta, ndơ dŏng nti, kho ao gay kơl an kon se geh nau ŭch dơih hăn nti”.

 Tâm nkuăl Ea Sup, kŏ lah du nkuăl n’har bri bah n’gor Dak Lak, năm nri aơ nchrăp geh bơi tât 18 rbăn kon se hăn nti. Êp nau n’hao nâp ntŭk ntu ân nau ntĭm nti ueh bah kon se, ntĭm nti nau kan ân nŭih nai nti, ntŭk kan ntĭm nti nkuăl hŏ ƀư nau kơp uănh ăp kon se geh nau jêr gay ma tâm rgop ma ntŭk kan chính trị kơl an, ăp nŭih geh nuih n’hâm lŏng kơl kon se, mô ân kon se rlu nti. Wa Nguyễn Văn Khoá, Kruanh jrâu kan ntĭm nti nkuăl Ea Súp, n’gor Dak Lak, mbơh:

‘Jrâu kan ntĭm nti hŏ rđau ăp ngih săm ƀŭt kơp uănh kon se geh nau rêh jêr jŏt gay ma bonh đă kơl an săm ƀŭt nti, săm ƀŭt nchih, ndơ dŏng nti gay ma n’hao ƀư nau kan kơl an ân kon se hăn nti năm nti 2024-2025. Tât rnôk aơ geh ndơn rlau 18.700 ndrôm săm ƀŭt nchih ndrel pă 50 bôk bôk ndeh vah jâng, 50 nklâm ndơ ân kon se rnoi mpôl đê̆, ach o”.