Tâm ngih mhe geh bu ndâk kơl an hvi bơi tta 70m2, rnoh 200 rkeh prăk, yuh Nguyễn Thị Tặng, đảng viên tâm đảng bộ phường Thành Công, nkual ƀon têh Buôn Ma Thuột rhơn ngăn. Đah nau geh bah bar hê ur sai rlau 10 rkeh/khay, rnăk yuh Tặng knŭng tŏng ngêt sa, ân 2 kon hăn nti. Rnơm geh nau kơl an năn bah 70 rkeh prăk tă bah tơm prăk “Đảng viên têm nkrem ƀư tĭng nau rêh Hồ Chí Minh” bah nkuăl ƀon têh Buôn Ma Thuột ndrel nau kơl an bah nŭih tâm rnăk vâl, rnôk aơ nau ŭch ndaka ngih gŭ nâp nâl bah yuh Tặng mơ jêng nau ngăn:

‘Mô geh mĭn tât ôi nar aơ geh ngih ueh kơt aơ, gâp knŭng mĭn lah rvăt neh dơm, yơn ngih ri mô geh mĭn tât ôh yor prăk âk ngăn, ma nau geh dơi bah 2 hê ur sai knŭng tŏng rong kon yor ngih hên geh me ranh đŏng. Geh ngih aơ lah nau ueh ngăn ndrel rhơn ngăn, ntoh măt ân rnăk vâl kŏ dăn lah ueh ma ăp đồng chí đảng viên tâm lam đảng bộ geh nau kơl an ân rnăk vâl hên”.

Yor n’hâm lĕ ranh, nau văng sa mô geh, ri ma rnăk wa Nguyễn Văn Chau, 62 năm, 30 năm Đảng tâm Tổ dân phố 5, Phường Tự An, nkuăl ƀon têh Buôn Ma Thuột ê dơi geh nkra ơm ngih nkra tă bah rlau 30 năm ma aơ.

Bah năp nau geh kơt nê, khay 4/2021, geh kơl an 25 rkeh tă bah tơm prăk Đảng viêm têm nkre ƀư tĭng nau rêh bah Hồ Chí Minh” bah nkual ƀon têh Buôn Ma Thuột ntop ma prăk têm, rnăk wa hŏ geh nkra ngih ân nâp tay lơn:

‘Bah năp nơh ngih hên lĕ sat hôm, truh đŏng ri ma geh nau kơl an bah Thành uỷ hŏ kơl an, bar năm ma aơ gâp hŏ lăn oi nau nar yor n’hâm soan gâp kŏ mô hgôm dăng ôh. Kŏ dăn lah ueh đŏng”.

Geh ntrŭnh ntơm năm 2013 tât rnôk aơ, Đảng viên têm nkrem ƀư tĭng nau rêh Hồ Chí Minh bah nkuăl ƀon têh Buôn Ma Thuột hŏ ƀư geh nau dơi ueh ngăn, rgum âk mpưm cán bộ, đảng viên ndrel ƀon lan râng rgop kơl. Gay njêng tơm prăk, ăp đảng uỷ, chi uỷ, chi bộ tâm ntŭk kan nkoch trêng, bonh đă cán bộ, công chức, viên chức lah đảng viên bah ntŭk kan, rmôt kan nơm gay ma râng rgop đah rnoh n’hêl: Nŭih geh oi ri rgop đê̆ ngăn 30 rbăn prăk/khay, nŭih mô lăng geh ri rgop đê̆ ngăn lah 15 rbăn/khay, nŭih mô geh ngăn ri rgop đê̆ ngăn 6000 prăk/khay ndrel nŭih tal 4 ri mô geh nchâp ôh, dah ma geh ân. Nua rgum ntơm bah năm 2013 tât rnôk aơ, tơm prăk kơl an tâm rgop rgum geh rlau 8,6 rmen prăk. Bah nê, kơl an ndâk nkra mhe ndrel nkra nâp tay 15 mlâm ngih, kơl an văng sa ân 11 nŭih, kơl an săm ji ân 697 nŭih ndrel geh âk nau kơl an êng êng đŏng. Wa Trần Văn Châu, Groi Kruanh Rnâng kan nkoch trêng nau Thành uỷ Buôn Ma Thuột, n’gor Dak Lak, mbơh:

 ‘Tơm prăk aơ gâp saơ geh nau ueh ndrel nau khlay ngăn. Tal bôk năp lah kơl an ân ăp đảng viên mâp nau jêr jŏt, mâp nau khuch, sôt rmanh tât ndal jêh ri du đê̆ đảng viên ach o ŭch pah kan văng sa yơn lŏ mô geh âk prăk ri hên kŏ geh nau rgop kơl an ân khân păng hun hao ueh, jêh ri đảng viên geh ngih lĕ sat ngăn, đảng viên mô geh nau dơi gay ma ndâk ngih kŏ geh rnâng kan rđau nau leo rgop dŏng prăk geh nau uănh ndrle kơl an ân năn, khân păng gĭt saơ dơi ntŭk kan Đảng mro lah ntŭk kơl an ân khân păng”.

Mra dơi saơ, ntơm bah rnoh prăk têm nkrem bol ma mô âk, yơn hŏ jêng tơm prăk têh. Aơ lah nau kan geh tât nau ueh, geh nau khlay ngăn ngên, gay ƀư ân ueh nâp ngăn tay nau kan ntĭm nti ndrel pah kan tĭng nau ueh bah Wa Hồ bah Đảng bộ ndrel ƀon lan nkuăl ƀon têh Buôn Ma Thuột, rgop nau kơl an ân ăp nŭih, đảng viên rlet rlau nau jêr, nsôih tâm nau rêh./.