Kêng măng dŭt pơh, Thượng úy Y Biza Rya, Đội trưởng Rmôt rgŏ jă ƀon lan Pôih tahen mât njrăng n’har bri Ia Rve, ndrel đah rmôt lăp ôp khâl nuĭh ƀon lan thôn 1, xă Ea Rvê. Thượng úy Y Biza an gĭt, nkoch trêng n’hao nău wât pháp luật an nuĭh ƀon lan du trong an kônh wa wât n’hanh ndrel ty mât uănh rnă njrăng đăp mpăn nkual n’har bri.

Âk ntil trong nkoch trêng tât nuĭh ƀon lan n’har bri.

“Pôih tahen mât njrăng n’har bri kơt lah ăp ngih pah kan, ban, nău kan bah ƀon lan ƀa ƀơ tâm rgop nkoch trêng ăp luật geh tât kônh wa ƀon lan đah trong nkoch trêng tâm rgop tâm ăp nar rƀŭn thôn, rƀŭn chi bộ mô lah ăp rƀŭn nchră ta ăp thôn. Bôk năp lah kônh wa nuĭh ƀon lan gĭt nâp, wât n’hanh ƀư tĭng di ăp nău ntrŭnh bah pháp luật”.

Yuh Lâm Thị Hợp, thôn 1, xă Ia Rvê an gĭt, bơi 17 năm tă bah ƀon tơm Bến Tre lăp nkuăl Ea Súp ndâk njêng nău kan, knơm geh nău uănh kơl, mât uănh, bah n’gâng kan ƀon lan n’hanh ăp rmôt ta ntŭk ma rnăk wâl wât ăp nău kơl, bah Đảng, Ngih dak, đăp mpăn ƀư sa, gĭt nău di ri ƀư, nău kan tih ri dêr.

“Âk nô tahen mât njrăng n’har bri uănh mĭn rvê an nuĭh ƀon lan jêh nĕ hăn nkoch trêng an ƀon lan. Tă bah ăp nar nkoch trêng ri gâp wât mpeh luật pháp n’hanh tâm rgop đah ăp rmôt ndrel mât njrăng n’har bri”.

Tahen mât njrăng n’har bri Dak Lak dăch dêh hăn ndrel đah nuĭh ƀon lan gay ndrel ty mât rnă njrăng đăp mpăn nkual n’har bri.

Xă n’har bri Ia Rvê, nkuăl Ea Súp, n’gor Dak Lak aƀaơ geh rlău 2.000 rnăk đah rlău 6.900 nuĭh ta 23 rnoi nuĭh gŭ rêh. Tâm ăp năm bah năp, ndrel đah n’gâng kan ƀon lan, Pôih tahen n’har bri Ia Rvê lĕ tĭng ƀon lan, râng mkra ăp nău rnă njrăng thôn ƀon, đăp mpăn rnă njrăng chính trị, đăp mpăn nău rêh jêng. Thướng tá Nguyễn Xuân Sơn, Chính trị viên Pôih tahen mât njrăng n’har bri Ia Rvê, an gĭt: dăch dêh tĭng đah nuĭh ƀon lan, ƀư tĭng “Ndrel gŭ, ndrel sa, ndrel nău ngơi”, Ia Rvê lĕ ndâk njêng dơi lam ƀon lan mât njrăng rnă njrăng n’har bri.

“Ntŭk kan geh 17 đồng chí pah kan ta ntŭk. Rlău ma nău kan way kan, trong kan groi nđôi, ma túy, rgŏ jă ƀon lan ri ƀư uĕh trong kan nkoch trêng, rgŏ jă kônh wa ƀư tĭng nău ntrŭnh trong hăn bah Đảng, nău kơl pháp luật bah ngih dak, rgŏ jă nuĭh ƀon lan ƀư tĭng uĕh nău ntrŭnh n’har bri, mô tih nău ntrŭnh n’har bri, mât rnă njrăng đăp mpăn tâm thôn, ƀon, xă”.

Ndâk njêng tủ ndrôm sam ƀŭt pháp luật ta ăp xă n’har bri gay nuĭh ƀon lan dơi ƀư tơm

Tĭng Đại tá Đỗ Quang Thấm, Groi Chính ủy N’gâng kan ntĭm rđău Tahen mât njrăng n’har bri n’gor Dak Lak, năm bah năp, ndrel đah nău kơl hun hao wăng sa, đăp mpăn nău rêh, rmôt mât njrăng n’har bri lĕ rgâl ăp trong nkoch trêng, mbơh rblang, ntĭm nti pháp luật tât nuĭh ƀon lan nkual n’har bri. Bah nău nkoch trêng tă bah trong loa ntuh ngơi, loa hăn rgŏ jă nkoch trêng, rgum rƀŭn ta thôn ƀon, phăt sam ƀŭt, mô lah tĭng rnăk, tâm rgop tâm ăp nău ƀư kơl ƀon lan kan lŏ mir... năm 2022, tahen n’har bri Dak Lak lĕ ƀư âk rơh nkoch trêng, rgŏ jă kônh wa ăp xă n’har bri râng njrăng n’gang nuh srê, njrăng n’gang ăp nău tih mpeh ma túy, tăch rwăt nuĭh, rlet rlău n’har bri mô tâm di. Nkre, ndâk njêng ăp “Tủ ndrôm sam ƀŭt pháp luật trong n’har bri”, tâm rgop đah ƀon lan ndâk njêng ăp rmôt mbơh ntĭm pháp luật, câu lạc bộ ƀư tĭng pháp luật... Tât aƀaơ ta Dak Lak lĕ geh 26 tủ ndrôm sam ƀŭt pháp luật đah rlău 20 rbăn ndrôm sam ƀŭt; 38 Rmôt mât uănh êng rnă njrăng đăp mpăn, mât êng trong n’har bri... Đại tá Đỗ Quang Thấm an gĭt tay:

“Ngoăy tâm âk ntrong kan aƀaơ mpôl hên dôl ƀư tâm rgop đah ƀon lan, nĕ lah ntrong kan “Rnăk wâl mô geh tih nău ntrŭnh n’har bri” n’hanh “Thôn mô geh druh ndăm tih pháp luật” gay an rêng hvi kơt nău nkoch trêng dơi lam ăp ntŭk. Bah meng nĕ mpôl hên mât nău ƀư tơm bah bu ranh ƀon, kruanh thôn, nuĭh geh nsing nơm gay ƀư uĕh trong kan nkoch trêng, mbơh rblang, ntĭm nti pháp luật an nuĭh ƀon lan”.

N’gor Dak Lak geh 73 km trong n’har bri kâng n’har đah n’gor Mondulkiri, dak Campuchia; geh 4 xă n’har bri ta 2 nkuăl Ea Súp n’hanh Buôn Đôn. Ăp nău ƀư mĭn uănh hun hao wăng sa, mât uănh săk soan n’hanh n’hao nău wât pháp luật an nuĭh ƀon lan lĕ rgop mât rnă njrăng chính trị, đăp mpăn nău rêh jêng, ndâk njêng nkual n’har bri nar lơ đăp mpăn hun hao./.