Đề án hun hao dŏng rgum prăp nău lư ƀon lan gŭ, năl săk n’hanh gĭt ngăn ma điện tử rhŏ dŏng an rgâl mbrô gưl neh dak lvang năm 2022 - 2025, uănh ngai tât năm 2030 (way kuăl lah Đề án 06) bah Chính phủ geh nkô̆ khlay tâm nău buăt nthoi ntŭk rgum prăp nău lư, mât dŏng geh nău tam ăp nău kan wăng sa- rêh jêng kon nuĭh, rƀŏng tât nuĭh ƀon lan dơn mbơh gĭt du tơ̆ đah Nhih pah kan ngih dak tâm rnôk hăn ƀư siƀŭt dơm. Yor kơt nê̆, tâm bah ri aơ, n’gor Dak Lak hŏ n’hao dăng nău rđău kan bah Đảng, tâm ntrôl dăng tĭng ƀư Đề án 06 bah Chính phủ, bah nê njêng nău ăp kôp, geh nău tam tâm rnôk tĭng ƀư.

Wa Huỳnh Văn Ánh, xã Phú Lộc, nkuâl Krông Năng, n’gor Dak Lak dŭt di  nuih n’hâm rnôk ƀư siƀŭt ma trong pơk bah ngai ta ntŭk kan du mpông bah xã du trong dơh ngăch. Mô dơn nôp hồ sơ ta trôm ntŭk pơk bah ngai ma păng hôm sơch trong ndơ̆ prăk nkhôm ma trong ngân hàng điện tử. Wa Huỳnh Văn Ánh an gĭt:

“He mô hôm kâp hăn ƀư si ƀŭt pă an thẻ bảo hiểm mô lah mô kâp ƀư siƀŭt dăn mã mbrô định danh ta Công an. Khân păng ntĭnh tât nar nê nơh lah he hăn tât sŏk ăp siƀŭt ƀư lôch jêh 1 tâm 3 ntil du tơ̆. Hôm prăk ƀư kơt nê đŏng, he geh mã mbrô geh quét mô lah njuăl an mpeh aơ dŭt dơh n’hanh ngăch đŏng”.

Hôm đah wa Nguyễn Ngọc Anh, xã Hoà An, nkuâl Krông Pắk, n’gor Dak Lak lôch rnôk ăp nuĭh tâm rmôt Đề án 06 bah xã nkoch trêng, păng saơ dơi nău dơh rnôk dŏng tài khoản định danh điện tử kơt: mpêt dơi mông nar, prăk kaih yor mô hôm kâp nchih âk ntil siƀŭt, hŭch glêh siƀŭt rnôk hăn ƀư, mbra rgâl Căn cước công dân n’hanh ăp ntil siƀŭt rnôk nău lư rgum mbơh dơi pơk luh ta ứng dụng định danh điện tử gưl neh dak kơt: siƀŭt ƀĭt ndeh, bảo hiểm y tế...wa Nguyễn Ngọc Anh hŏ mô rnam hăn đăng ký:

Rgâl mbrô, cài đặt định danh điện tử aơ lah nău dŭt dơh an nuĭh ƀon lan jêng dơi ăp n’gâng kan nsum mpôl bah xã, nkuâl uănh khlay tât tĭng rnăk kơl nuĭh ƀon lan mpôl hên gĭt mhâm lah cài đặt mã định danh điện tử dŭt dơh nsĭt tay an nuĭh ƀon lan tâm rnôk hăn kan tâm ban kơt rnôk hăn ƀư siƀŭt jêng nuĭh ƀon lan mpôl hên dŭt rhơn nđơr”.

Đề án 06 bah Chính phủ geh nău ring tam lam hvi, rgop n’hao nău dơi tam mât kan ngih dak ta âk trong kan. Đah nău khlay n’gâng tơm tâm nău tĭng ƀư Đề án 06, tâm bah ri aơ nơh, mpôl công an n’gor Dak Lak hŏ nsrôih an ƀư, dơn nkra ăp siƀŭt sitra, rgŏ jă, ntĭm nti ƀon lan ƀư siƀŭt pă an Căn cước công dân, n’hao dăng ăp trong nkra đăp mpăn ƀư lôch jêh ăp rnoh tât ƀư kloh rgum prăp nău lư. Trung tá Trần Văn Dũng, công an xã Hoà An, nkuâl Krông Pắk, n’gor Dak Lak an gĭt:

Công an xã kan nsum đah ăp n’gâng kan hăn tât ăp thôn buôn ƀư cài đặt định danh điện rnoh 1 an nuĭh ƀon lan n’hanh kan nsum đah rmôt mât ƀư siƀŭt cài đặt định danh điện tử rnoh 2. Rnôk tĭng ƀư ri nuĭh ƀon lan dŭt ŭch tĭng mpeh cài đặt định danh điện tử đah ƀon lan”

Gay n’hao nău khlay kan, nău dơn kan bah gưl ủy đảng ăp gưl tâm trong an ƀư Đề án 06, nar 20/3/2023, Ban Thường vụ Tỉnh ủy Dak Lak n’gluh an dŏng nău ntrŭnh mbrô 33 mpeh n’hao dăng nău rđău kan bah ăp gưl ủy đảng tâm ntrôl dăng an ƀư Đề án hun hao dŏng nău lư ƀon lan gŭ, năl săk n’hanh di ngăn săk điện tử rhŏ dŏng an rgâl mbrô gưl neh dak lvang năm 2022 - 2025, uănh ngai tât năm 2030 ta n’gor. Ntơm bah nău ntrŭnh dja,  UBND n’gor Dak Lak n’gluh an âk trong nchrăp gay an ƀư Đề án. Nkre hŏ rđău đă ăp n’gâng kan ăp nkuâl njêng bơi 2.400 rmôt pah kan an ƀư Đề án 06 bah n’gor tât thôn buôn, tổ dân phố. Tât aƀaơ, n’gor Dak Lak hŏ n’glăp lôch 2,1 rkeh nău lư nuĭh ƀon lan tâm ntŭk rgum prăp nău lư gưl neh dak mpeh ƀon lan gŭ, mât dŏng geh nău tam rhŏ dŏng ngih dak mpeh pah kan mât rnă njrăng ta ntŭk. Ndrel đah nê, hŏ pă an rlău 1,6 rkeh thẻ căn cước công dân ntrŭp chíp điện tử an ƀon lan, dơn geh rlău 500 rbăn tài khoản định danh điện tử ta rnoh 1, rnoh 2. Trong nkra siƀŭt bah n’gor hŏ dơi buăt nthoi đah ntŭk rgum prăp nău  lư gưl neh dak mpeh ƀon lan gŭ, an ƀư bah ngai ta rnoh 3, rnoh 4 dơi ŭanh khlay ntrôl dăng đŏng, lơn lah 25 ntil siƀŭt khlay mpeh Đề án 06 rgop n’hao nău dơi tam mât siƀŭt rhŏ dŏng an ƀon lan. Thiếu tướng Lê Vinh Quy, Giám đốc Công an n’gor Dak Lak, groi kruanh rmôt rnâng kan Rmôt pah kan Đề án 06 gưl n’gor:

Aơ lah đề án bah chính phủ nău an ƀư ân geh nău tât râng bah ăp gưl n’gâng kan nău ŭch tĭng bah ƀon lan. Tâm nê, mpôl công an lah n’gâng tơm, lah rnâng kan, nkra bah nău mĭn tĭng nău nŏng êng nơm mpeh nău lư. Lĕ rngôch ân rƀŏng tât nău geh nsum lah nta trong an dŭt dơh an nuĭh ƀon lan n’hanh doanh nghiệp. Tâl 2 lah nsrôih nkoch trêng gay nuĭh ƀon lan n’hanh doanh nghiệp saơ dơi nău geh bah Đề án 06 tĭng kơn jêng văn hoá ƀon lan mbrô, nău rêh mbrô”.

Đah nău rđău đă bah gưl uỷ đảng, nău nsrôih tĭng ƀư bah ăp gưl n’gâng kan, ăp nău dơi bôk năp tâm nău an tĭng ƀư Đề án 06 ta n’gor Dak Lak hŏ njêng ntŭk nsing tâm di an nău n’hao nău dơi tam ƀư siƀŭt pơk bah ngai. Bah nê rgop n’hao nău dơi tam mât kan ngih dak nta trong dơh an nuĭh ƀon lan n’hanh doanh nghiệp tâm nău hun hao wăng sa- rêh jêng kon nuĭh rhŏ dŏng pah kan rgâl mbrô gưl neh dak./.